ភ្នំពេញ៖ កាលពីព្រឹកថ្ងៃទី ១១ តុលា សហព័ន្ធអ្នកនាំចេញអង្ករកម្ពុជា បានរៀបចំពិធីបុណ្យអង្ករកម្ពុជាលើកទី១ ដែលប្រារព្ធឡើងនៅខេត្តសៀមរាប ក្នុងគោលបំណងផ្សព្វផ្សាយពីគុណភាពអង្កររបស់កម្ពុជាសម្រាប់នាំចេញទៅក្រៅប្រទេសតាមរយៈនៃភ្ញៀវទេសចរអន្តរជាតិ ដែលបានមកទស្សនាកំសាន្តក្នុងខេត្តសៀមរាប ព្រមទាំងការដាស់តឿនពញ្ញាក់ស្មារតីប្រជាកសិករក្នុងខេត្តនេះឲ្យយកចិត្តទុកដាក់លើបញ្ហាពូជស្រូវ។
ជួបសម្ភាសន៍តាមរយៈទូរស័ព្ទពីក្រុងសៀមរាបជាមួយអ្នកសារព័ត៌មាន លោក គីម សាវុធ ប្រធានសហព័ន្ធអ្នកនាំចេញអង្ករកម្ពុជាបានឲ្យដឹងថា គោលបំណងសំខាន់នៃការរៀបចំពិធីនេះ គឺជាការបង្ហាញអំពីគុណភាពអង្កររបស់ប្រទេសកម្ពុជាជូនដល់ភ្ញៀវទេសចរអន្តរជាតិ ដែលបានមកទស្សនាកំសាន្តក្នុងខេត្តសៀមរាបនេះ ដើម្បីឲ្យពួកគេជួយផ្សព្វផ្សាយបន្តទៅប្រទេសរបស់ពួកគេ។
លោកប្រធានសហព័ន្ធអ្នកនាំចេញអង្គរកម្ពុជាបន្តថា មហិច្ឆតារបស់សហព័ន្ឋ គឺដើម្បីពង្រីកការនាំចេញអង្ករ និងធ្វើការដោយមិនខ្លាចនឿយហត់ ដើម្បីលើកកម្ពស់អង្ករកម្ពុជា។សហព័ន្ឋនឹងអាចជួយដល់គោលដៅសម្រេចការនាំចេញអង្ករ១លានតោនក្នុងមួយឆ្នាំចាប់ពីឆ្នាំ២០១៥ទៅ។
លោកបន្ថែមទៀតថា រហូតមកដល់ពេលនេះសហព័ន្ធអ្នកនាំចេញអង្ករមានសមាជិកចំនួន១២០ក្រុមហ៊ុនមកពីវិស័យផ្សេងៗក្នុងនោះ២៥ក្រុមហ៊ុនមកពីរោងម៉ាស៊ីនកិនស្រូវ។ សម្ព័ន្ធអ្នកនាំចេញអង្ករកម្ពុជាមិនមែនជាស្ថាប័នប្រកបអាជីវកម្មសំដៅរកប្រាក់ចំណេញនោះឡើយពោលគឺស្ថាប័នដែលជួយសម្របសម្រួលការងារជាមួយរដ្ឋាភិបាលវិស័យឯកជនព័ត៌មានទីផ្សារបច្ចេកទេសក្នុងការកែច្នៃអង្ករ សម្រាប់ផ្តល់ចំណេះដឹងនឹងជំនាញជូនសមាជិករបស់ខ្លួនធ្វើយ៉ាងណាអាចនាំចេញអង្ករទៅទីផ្សារអន្តរជាតិ។
លោកបានបញ្ជាក់ទៀតថា ក្រៅពីនេះ តាមរយៈនៃពិធីនេះ ក៏ការដាស់តឿន និងពញ្ញាក់ស្មារតីប្រជាកសិករក្នុងខេត្តសៀមរាប ក៏ដូចជាកសិករនៅទូទាំងប្រទេសកម្ពុជា ឲ្យយកចិត្តទុកដាក់ក្នុងការជ្រើសរើសពូជស្រូវដែលល្អនិងមានតម្លៃនៅលើទីផ្សារអន្តរជាតិ ក្នុងខណៈពេលដែលអង្ករកម្ពុជាមិនអាចបំពេញតាមតម្រូវការរបស់អតិថិជននៅក្រៅប្រទេសបានគ្រប់គ្រាន់។
ពាក់ព័ន្ធជាមួយនឹងបញ្ហានេះ បងប្រុសឈ្មោះ ណឺយ ណាំង ជាប្រជាពលរដ្ឋនៅក្នុងស្រុកសូទ្រនិគម ខេត្តសៀមរាប បានសម្តែងនូវការពេញចិត្តរបស់ខ្លួនថា ពិធីនេះពិតជាមានសារៈសំខាន់សម្រាប់កសិករដូច្នេះបងប្អូនប្រជាកសិករខ្មែរទាំងគួរតែយកចិត្តទុកដាក់ទៅលើបញ្ហាពូជស្រូវឱ្យស៊ីជ្រៅបន្ថែមទៀត។
ដោយឡែក នៅក្នុងរយ:ពេល១០ខែដល់ខែតុលា២០១២ក្រសួងពាណិជ្ជកម្មបាននាំចេញអង្ករចំនួន ១៤១.៤៧០តោន ដោយកើនឡើងចំនួន៤ភាគរយ បើប្រៀបធៀបរយ:ពេលដូចគ្នានៅឆ្នាំ២០១១។កម្ពុជាបានទទួលលុយចំនួនជាង ៩៧លានដុល្លារពីការនាំចេញនោះ ខណ:ដែលឆ្នាំមុនប្រាក់ចំណូលមានចំនួនជាង៧៨លានដុល្លារ។
គួរបញ្ជាក់ថា បើយោងតាមរបាយការណ៍សហព័ន្ធអ្នកនាំចេញអង្ករកម្ពុជាបានឲ្យដឹងថា នៅឆ្នាំ២០១២ បាននាំចេញអង្ករចំនួន២០៥ពាន់តោន និង៤ខែដើមឆ្នាំ ២០១៣នេះ បាននាំចេញចំនួន ១១៨ពាន់តោនហើយ។ប្រទេសដែលទទួលអង្ករកម្ពុជា ច្រើនជាងគេគឺប្រទេសបារាំង បូឡូញ និងម៉ាឡេស៊ី។ហើយរដ្ឋាភិបាលបានដាក់ផែនការ ដើម្បីនាំចេញអង្ករឲ្យបាន១លានតោននៅឆ្នាំ២០១៥ ខាងមុខនេះ៕ដោយ៖ សេរីមករា