ភ្នំពេញ៖បន្ទាប់ពីកិច្ចចរចាលើ សេចក្តីព្រាងសន្ធិសញ្ញា ស្តីពីបត្យាប័ន បានបញ្ចប់ កម្ពុជា-វៀតណាមបានឯកភាពគ្នា និងចុះហត្ថលេខាលើកំណត់ហេតុរួម នៃកិច្ចពិភាក្សាចរចាលើកទី២នៃសន្ធិសញ្ញានេះដើម្បីជាសក្ខីភាព នៃការ​ឯក​ភាពគ្នាលើសេចក្តីព្រាងសន្ធិសញ្ញានេះ។

សន្ធិសញ្ញាស្តីពីបត្យាប័ន រវាងព្រះរាជាណាចក្រកម្ពុជា និងសាធារណរដ្ឋសង្គមនិយមវៀតណាម មានគោលបំណង​ពង្រឹង និងជម្រុញកិច្ចសហប្រតិបត្តិការឱ្យកាន់តែមានប្រសិទ្ធភាពរវាងភាគីទាំងពីរ ក្នុងការប្រយុទ្ធប្រឆាំងឧក្រិដ្ឋកម្ម និងបង្កើតកិច្ចសហប្រតិបត្តិការរវាងប្រទេសទាំងពីរអោយកាន់តែមានប្រសិទ្ធភាព។ដើម្បីឈានដល់ការបញ្ចប់​លើស​ន្ធិសញ្ញានេះ ភាគីទាំងពីរបានពិភាក្សា ចរចាបញ្ចប់លើមាត្រា៥ស្ទួន និងបន្តបន្ទាប់ពី​មាត្រា​​១៣ រហូតដល់មាត្រា២២ និងបានត្រួតពិនិត្យមើលឡើងវិញមួយមាត្រាម្តងៗ ក្នុងសន្ធិសញ្ញានេះ។

ក្នុងពិធីចុះហត្ថលេខាលើកំណត់ហេតុរួមនៅថ្ងៃទី ២៨ ខែវិច្ឆិកានេះ លោក ហ៊ី សោ​ភា ​រដ្ឋលេខាធិការក្រសួងយុត្តិធម៌ បាន​សម្តែងនូវសេចក្តីរីករាយ និងស្វាគមន៍ ចំពោះវត្តមានបស់គណៈប្រតិភូសាធារណរដ្ឋសង្គមនិយមវៀតណាម ដែល​បាន បំពេញទស្សនៈកិច្ចផ្លូវការនៅព្រះរាជាណាចក្រកម្ពុជា តាមការអញ្ជើញរបស់ក្រសួងយុត្តិធម៌កម្ពុជាដើម្បី​ចរចាបញ្ចប់លើសន្ធិសញ្ញានេះ និងការត្រៀមចុះហត្ថលេខារបស់តំណាងនៃព្រះរាជាណាចក្រកម្ពុជាជាមួយ​បសា​ធា​រណ​រដ្ឋសង្គមនិយមវៀតណាម ក្នុងដំណើរទស្សនៈកិច្ចរបស់សម្តេចអគ្គមហាសេនាបតី ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រកម្ពុជា ទៅកាន់សាធារណរដ្ឋសង្គមនិយមវៀតណាម នៅចុងខែធ្នូឆ្នាំ២០១៣។

លោក Pro. Dr. Nguye Ngoc Anh អគ្គនាយកកិច្ចការច្បាប់នៃក្រសួងសន្តិសុខសាធារ​ណ​វៀតណាម បានសម្តែង​សេច​​ក្តី​រីករាយ និងភាពកក់ក្តៅយ៉ាងខ្លាំងដែលព្រះរាជាណាចក្រកម្ពុជា បានអញ្ជើញគណៈប្រតិភូវៀតណាម ឱ្យ​មក​ជួបពិភាក្សាចរចាបញ្ចប់លើសេចក្តីព្រាងសន្ធិសញ្ញាស្តីពីបត្យាប័ននេះ ដើម្បីត្រៀមចុះហត្ថលេខានាពេលខាងមុខ៕ ដោយ៖ រតនា