ភ្នំពេញ ៖ នៅព្រឹកថ្ងៃទី៣ខែឧសភានេះនៅសាលារាជធានីភ្នំពេញមានរៀបចំពិធីប្រកាសតែងតាំងអភិបាលអភិបាលរងរាជធានីភ្នំពេញអភិបាលខណ្ឌនៃរាជធានីភ្នំពេញក្រោមវត្តមានលោកឧបនាយករដ្ឋមន្រ្តី ស ខេង រដ្ឋមន្រ្តីក្រសួងមហាផ្ទៃ។ លោក កែប ជុតិមា អភិបាល និង លោកស្រី ទុច សារ៉ុម អភិបាលរងនៃគណអភិបាលរាជធានីភ្នំពេញត្រូវបានចូលនិវត្សហើយអគ្គនាយកនៃអគ្គនាយកដ្ឋានរដ្ឋបាលមូលដ្ឋានក្រសួងមហាផ្ទៃបានប្រកាសនូវព្រះរាជក្រិត្យរបស់ព្រះមហាក្សត្រ និងអនុក្រិត្យរបស់រាជរដ្ឋាភិបាលតែងតាំង លោក ប៉ា សុជាតិវង្ស ជាអភិបាលនៃគណអភិបាលរាជធានីភ្នំពេញជំនួស លោក កែប ជុតិមា ដែលត្រូវទៅបំពេញការងារថ្មី។លោក សេង រតនៈ អភិបាលខណ្ឌទួលគោគជាអភិបាលរងរាជធានីភ្នំពេញ ជំនួសតំណែង លោកប៉ាសុជាតិវង្ស។ លោកស្រី ម៉ក់ វណ្ណស៊ីថា ប្រធានមន្ទីរវប្បធម៌រាជធានីភ្នំពេញជាអភិបាលរងជំនួសតំណែង លោកស្រី ទូច សារ៉ុម។
ចំណែកលោក ឯក ឃុនឌឿន អភិបាលរងខណ្ឌដូនពេញត្រូវឡើងមកជាអភិបាលខណ្ឌទួលគោកជំនួសតំណែងលោក សេង រតនៈ។ ក្រៅពីនោះមុខតំណែងអភិបាលរងរាជធានីចំនួន៤នាក់ទៀតនិងមុខតំណែងអភិបាលខណ្ឌចំនួន៨ទៀតគឺនៅរក្សាដដែល៕
ដោយ ៖ សំអាត