ភ្នំពេញ៖ យោងតាមរបាយការណ៍របស់នាយកដ្ឋាននគរបាលសណ្តាប់ធ្នាប់នៃក្រសួងមហាផ្ទៃដែលបានចេញផ្សាយកាលពីថ្ងៃពុធបានឲ្យដឹងថា ករណីគ្រោះថ្នាក់ចរាចរណ៍នៅក្នុងឆ្នាំ២០១៣នេះ មានចំនួន៤៣២២លើក ក្នុងនោះស្លាប់ចំនួន១៩០១នាក់ និងរបួសធ្ងន់៤២០៥នាក់ និងរបួសស្រាល៣០០៣នាក់។ ចំនួននេះបើធៀបនិងរយៈពេលដូចគ្នា កាលពីឆ្នាំ២០១២ករណីគ្រោះថ្នាក់និងស្លាប់ត្រូវបានកើនឡើង០,៤ភាគរយ និងរបួសធ្ងន់ថយ៤ភាគរយ និងស្រាលថយចុះ២ភាគរយ។
លោកពា គីម វង មន្ត្រីទទួលបន្ទុកផ្នែកអប់រំ និងផ្សព្វផ្សាយនៃគណៈកម្មាធិការជាតិសុវត្ថិ ភាពចរាចរណ៍ផ្លូវគោកបានឲ្យដឹងថា មូលហេតុនៃការកើនឡើងនូវចំនួនគ្រោះថ្នាក់និងអ្នករងរបួសគឺ បណ្តាលមកពីការរឹតបណ្តឹងច្បាប់របស់កម្លាំងសមត្ថកិច្ចនៅមានការខ្វះចន្លោះ ដោយហេតុថា ក្រោយពេលបោះឆ្នោតរួចមករដ្ឋាភិបាលបានដកកម្លាំងមួយចំនួនធំ សម្រាប់ត្រៀមការពារសណ្តាប់ធ្នាប់នៅតាមដង ផ្លូវសំខាន់ៗមួយចំនួន ដូច្នេះទើបធ្វើឲ្យមានការខ្វះខាតនូវកម្លាំងផ្នែកចរាចរណ៍។
លោកគឹម បញ្ញា នាយកប្រចាំប្រទេសកម្ពុជា នៃអង្គការមូលនិធិបង្ការរបួសអាស៊ីបានឲ្យដឹងថា គ្រោះថ្នាក់ចរាចរណ៍កំពុងធ្វើឲ្យប៉ះពាល់យ៉ាងខ្លាំង ចំពោះយុវជននៅក្នុងប្រទេសកម្ពុជា ដោយចំនួនជាងពាក់កណ្តាល នៃអ្នកស្លាប់បាត់បង់ជីវិតនៅលើដងផ្លូវកាលពីឆ្នាំ២០១២ មានអាយុចន្លោះពី១៥-២៩ឆ្នាំ។ មនុស្សប្រមាណ៦៨ភាគរយ នៃអ្នកស្លាប់ដោយគ្រោះថ្នាក់ចរាចរណ៍តាមដងផ្លូវ គឺអ្នកធ្វើដំណើរតាមទោសចក្រយានយន្ត និង២ភាគ៣ក្នុងចំណោមនោះបានទទួលរងរបួសក្បាល។ លោកគឹម បញ្ហា បានបន្តថា ៖«ការយល់ដឹង ព្រមទាំងឥរិយាបថ របស់ប្រជាពលរដ្ឋពាក់ពន្ធ័និងការពាក់មួកសុវត្ថិភាពនៅមានកម្រិតគួរឲ្យព្រួយបារម្ភ»។
លោកPieter JM Van Maaren តំណាងអង្គការសុខភាពពិភពលោកបានបញ្ជាក់ថា យុទ្ធនាការផ្សព្វផ្សាយអំពី បើពិសាគ្រឿងស្រវឹងកុំបើកបរ គឺជាសារមួយសម្រាប់ពញ្ញាក់ស្មារតីរបស់ប្រជាជនឲ្យយល់ដឹងអំពីគ្រោះថ្នាក់ដ៏ធ្ងន់ធ្ងរ និងពិត ប្រាកដនៃការពិសាគ្រឿងស្រវឹងហើយបើកបរ បើទោះបីជាពិសាក្នុងកំរិតតិចតួចក្តី។ លោកបញ្ជាក់ថា៖«យើងចង់បង្ហាញឲ្យ ប្រជាជនយល់ដឹងអំពីតើហេតុដូចម្តេច បានជាអាចធ្វើឲ្យអ្នកបើកបរបាត់ម្ចាស់ការក្នុងការបញ្ជារយានយន្តមួយរំពេច នៅពេល ដែលពួកគេស្ថិតនៅក្រោមឥទ្ធិពលនៃគ្រឿងស្រវឹង»។ ដោយ៖ អភិរក្ស