អ្នកស្លាប់ដោយសារជំងឺគ្រុនចាញ់បានថយចុះ ២៩នាក់ក្នុងរយៈពេល១០ខែនៃឆ្នាំ២០១៣នេះ។តាមរបាយការណ៍របស់មជ្ឈមណ្ឌលជាតិប្រយុទ្ធនឹងជំងឺគ្រុនចាញ់បាន បង្ហាញថា ក្នុងរយៈពេល១០ខែ ដើមឆ្នាំ២០១៣នេះ អ្នកស្លាប់ដោយជំងឺគ្រុនចាញ់មានចំនួន៨នាក់ គឺថយចុះ៧៨%បើប្រៀបធៀបទៅនឹងរយៈពេលដូចគ្នាក្នុងឆ្នាំ២០១២ដែល អ្នកស្លាប់មានរហូតដល់៣៧នាក់។
ក្នុងរយៈពេល១០ខែមកនេះ ចំនួនករណីគ្រុនចាញ់ដែលព្យាបាលនៅមន្ទីរពេទ្យរដ្ឋ ឬមណ្ឌលសុខភាពរដ្ឋ ឬភ្នាក់ងារស្មគ្រ័ចិត្តភូមិ មានចំនួណ៣ម៉ឺន៣ពាន់៧៦៩នាក់គឺថយចុះ៤៣% បើប្រៀបទៅនឹងឆ្នាំ២០១២ មានចំនួន៥ម៉ឺន៩ពាន់៦៦៨នាក់។ ការធ្លាក់ចុះនៃចំនួនអ្នកស្លាប់ដោយជំងឺគ្រុនចាញ់នៅឆ្នាំនេះ ត្រូវបានមន្ត្រី សុខាភិបាលកម្ពុជានិយាយថា ជំងឺគ្រុនចាញ់លែងជាមូលហេតុចំបងនៃការស្លាប់របស់ប្រជាជន កម្ពុជាទៀតហើយ។ ប៉ុន្តែទោះជាយ៉ាងណាក៍ដោយ ក្រសួងសុខាភិបាលក៍អំពាវនាវឲ្យប្រជាពលរដ្ឋមានការប្រុងប្រយត្ន័ កុំឲ្យមានមូសដែកគោលខាំ ដែលនាំឲ្យឆ្លងជំងឺគ្រុនចាញ់ និងចំពោះអ្នកដែលមានអាការៈគ្រុនក្ដៅ សង្ស័យថាមានជំងឺគ្រុនចាញ់ ត្រូវប្រញាប់ទៅរកការពិនិត្យនិងព្យាបាលនៅតាមមន្ត្រីពេទ្យរដ្ឋ ឬភ្នាក់ងារសុខភាពភូមិ។
កម្ពុជាមានផែនការលុបបំបាត់ជំងឺគ្រុនចាញ់ឲ្យអស់នៅឆ្នាំ២០១៥ និងលុបបំបាត់លែងឲ្យមានអ្នកស្លាប់ដោយជំងឺនេះចាប់ពីឆ្នាំ២០១៥ តទៅ។ក្នុងរយៈពេល១០ខែមកនេះ ខេត្តដែលគេរកឃើញថាមានជំងឺគ្រុនចាញ់ខ្ពស់មានដូចជា ស្ទឹងត្រែង មណ្ឌលគិរី ឧត្តរមានជ័យ ក្រចេះ និងពោធិ៍សាត់។
បើយោងតាមរបាយការណ៍របស់មជ្ឈមណ្ឌលជាតិប្រយុទ្ធនឹងជំងឺគ្រុនចាញ់បានបង្ហាញឱ្យដឹងថា ចំនួនអ្នកស្លាប់ដោយជំងឺគ្រុនចាញ់នៅឆ្នាំ២០១០ មានចំនួន១៥១នាក់ នៅឆ្នាំ២០១១មានចំនួន៩៣នាក់ នៅឆ្នាំ២០១២មានចំនួន៤៥នាក់ និងរយៈពេល៨ខែនៃឆ្នាំ២០១៣នេះ មានចំនួន៦នាក់៕ ដោយ ៖ មករា