ភ្នំពេញ៖វិស័យទូរគមគមន៍កម្ពុជាបច្ចុប្បន្នទោះបីមានការខិតខំប្រឹងប្រែងយ៉ាងណាក៏ ដោយក៏នៅតែ​ជួប​​បញ្ហាប្រឈមដ៏ធ្ងន់ធ្ងរដូចជាតម្លៃVOIP ធ្លាក់ចុះដោយសារទីផ្សារមានការប្រកួត​ប្រជែងដ៏ខ្លាំង​សម្បើមបំណុលរ៉ាំរ៉ៃដែលក្រុមហ៊ុននិងស្ថាប័នមួយចំនួននៅជំពាក់ពុំព្រមសង ដែលអាចបង្កជាវិធាន ធនចំណូលថ្លៃឆ្លងកាត់(Transit Fee) ធ្លាក់ចុះយ៉ាងខ្លាំង ដោយក្រុមហ៊ុនចាប់ផ្តើមធ្វើDirect Route លែងឆ្លងកាត់ទូរគមនាគមន៍កម្ពុជាដូចមុនទៀតហើយ ដែលកាលពីឆ្នាំ២០១១អាចទទួលបាន ប្រាក់ ចំណូលពីការឆ្លងកាត់នេះចំនួន១៦លានដុល្លារអាមេរិក(និយាយជាតួលេខមូល)នៅឆ្នាំ២០១២ ធ្លាក់ចុះ​មកនៅត្រឹម១១លានដុល្លារអាមេរិកនៅឆ្នាំ២០១២​ហើយនៅឆ្នាំ២០១៣នេះរឹតតែធ្លាក់ចុះកាន់​តែច្រើន​ឡើងទៀត។

នេះបើតាមរបាយការណ៍របស់លោក កិម វិក្រា ក្នុងឳកាសទទួលតំណែងជាអគ្គនាយក​សហគ្រាស​សាធារណៈទូរគម​​នាគមន៍កម្ពុជា​ដែលបានប្រព្រឹត្តទៅនៅទីស្តីការក្រសួងក្រោមវត្តមានលោក សូរ ឃុន រដ្ឋមន្តីក្រសួងប្រៃសណីយ៍និងទូរគមនាគមន៍ព្រឹកថ្ងៃទី១៨ ខែមីនា ឆ្នាំ២០១៣នេះ។​

លោកអគ្គនាយកថ្មីបានលើកឡើងថាឧបសគ្គនេះបានធ្វើឲ្យទូរគមនាគមន៍កម្ពុជាមានការ​ព្រួយ​បារម្ភជាខ្លាំង។តែទោះជាយ៉ាងណាក៏ដោយលោកបានធ្វើការ​​​ប្តេជ្ញាចិត្តសាមគ្គីគ្នាជាធ្លុង​មួយដឹក​នាំ​គមនាគមន៍កម្ពុជា ទៅរកផ្លូវរីកចំរើន និងតំកល់ផលប្រយោជន៍រួមជាធំ​ដោយលើកកម្ពស់​អភិបាល​កិច្ច​សហគ្រាស តាម​រយៈបង្កើនគណនេយ្យភាព តម្លាភាព និងភាពទទួលខុសត្រូវខ្ពស់ចំពោះ​ផល​ប្រយោជន៍រួមដោយគោរពតាមច្បាប់ប្បញ្ញត្តិដែលមានជាធរមាន។ជាពិសេសលើកកម្ពស់ការទទួល​ខុសត្រូវការងារឲ្យស្រប​​​តាមអនុសាសន៍លោករដ្ឋមន្ត្រីនៅក្នុងសន្និបាតបូកសរុបកាលពីពេលកន្លង​មក​នេះ គឺ”គ្រប់និយោជិកត្រូវជ្រោមជ្រែង TC មិនត្រូវជាន់ពន្លិចTCទេ”។

របាយការដដែលបានបន្តឲ្យដឹងថា ដើម្បីពង្រីកឲ្យវិស័យនេះឲ្យមានការអភិវឌ្ឍ និងរីកចម្រើន ទូរគមន៍កម្ពុជាបានពង្រីកបណ្តាញពីទីក្រុងរហូតដល់បណ្តាខេត្ត និងស្រុកនានាក្នុងព្រះរាជាណាចក្រ​កម្ពុជា ដើម្បីសំរួលដល់កិច្ចទំនាក់ទំនងរវាងទីក្រុង និងជនបទ ហើយអាចឲ្យប្រជាពលរដ្ឋគ្រប់​រូប​មាន​លទ្ធភាពប្រើប្រាស់​បណ្តាញទូរគមនាគមន៍តាមចំណង់ចិត្ត។លើសពីនេះទៀតការកែលម្អសេវា​សាធារណៈត្រូវបានធ្វើឡើងតាមគោលការណ៍របស់រាជរដ្ឋាភិបាល​ ប្រែក្លាយសេវាសាធារណៈឲ្យមាន​គុណភាពល្អ តម្លៃថោក អាចជឿទុកចិត្តបានពីសំណាក់អ្នកប្រើប្រាស់។​ជាងនេះទៅទៀតគមនាគមន៍​កម្ពុជា បន្ទាប់ពីសាងសង់កាប្លិ៍អុបទិកមេពីខេត្តកំពង់ចាមទៅខេត្តសៀមរាប ពីកំពង់ចាម ទៅខេត្ត​ក្រចេះ ខេត្តស្ទឹងត្រែងក្រោមជំនួយសម្បទានរបស់ប្រទេសចិន ដែលគម្រោងមានឈ្មោះថា GMS­_ISរួចមក ក៏មមាញ៉ឹក​​រៀបចំកសាងកាប្លិ៍អុបទិកមេមួយទៀត ពីភ្នំពេញ ទៅខេត្តកំពង់ចាម កណ្តាល តាកែវ កំពត និងខេត្តព្រះសីហនុ ក្រោមប្រាក់កម្ចីសម្បទានរបស់រាជរដ្ឋាភិបាលជប៉ុន JBICផងដែរ​ហើយគម្រោងនេះនឹងចាប់អនុវត្តនៅពាក់កណ្តាលឆ្នាំ២០១៣។

រដ្ឋមន្ត្រីក្រសួងប្រៃសណីយ៍លោកសូរ ឃុន បានមានប្រសាសន៍ថា ការផ្លាស់ប្តូរ​ទួនាទី​មន្រ្តីនៅក្នុងអង្គភាពនេះគឺស្របទៅតាមសភាពការណ៍នៃប្រទេសជាតិ ដែលកំពុងមានការអភិវឌ្ឍ​ផ្នែក​បច្ចេកវិទ្យា សេដ្ឋកិច្ច វប្បធម៌ ទាំងនៅក្នុងតំបន់អាស៊ី និងពិភពលោក។វិស័យគមនាគមន៍​នៅកម្ពុជា​មានការវវឌ្ឍន៍រីកចម្រើនគួរឲ្យចាប់អារម្មណ៍ ដែលបានរកចំណូលចូលក្នុងថវិកាជាតិរាប់លាន​ដុល្លារ​ក្នុង​មួយ​ឆ្នាំៗតាមរយៈអង្គភាពនេះ ក្រសួងប្រៃសណីយ៍បានផ្តល់អទិភាពធ្វើការអភិវឌ្ឍន៍​ជាមួយដៃគូរ​ឯកជននានារិះរកវិធីសាស្ត្រអភិវឌ្ឍន៍ស្ថាប័នរបស់ខ្លួនមានការរីកចំរើនបន្តទៀតទៅថ្ងៃអនាគត៕

ដោយ​ ស.ស្អាត