ភ្នំពេញ៖ ធនាគារអភិវឌ្ឍន៍អាស៊ី ហៅកាត់ថា អេឌីប៊ី(ADB) បានប្រកាសថានឹងផ្តល់ជំនួយមនុស្សធម៌ សម្រាប់សង្គ្រោះបន្ទាន់ក្នុងទឹកប្រាក់ ៣ លានដុល្លារ ដល់ប្រទេសកម្ពុជា ដើម្បីរួមចំណែកស្តារការខូចខាតដោយទឹកជំនន់ ដែលមានផលប៉ះពាល់ដល់ប្រជាពលរដ្ឋ ១,៧ លាននាក់ និងធ្វើឲ្យមានការខាតបង់គិតជាទឹកប្រាក់ប្រមាណមួយពាន់លានដុល្លារ ។សេចក្តីប្រកាស ចេញផ្សាយនៅថ្ងៃទី២០វិច្ឆិកា បង្ហាញថា ជំនួយឥតសំណង ដែលបានពីកម្មវិធីឆ្លើយតបចំពោះគ្រោះមហន្ដរាយ នៅអាស៊ីប៉ាស៊ីហ្វិចនេះ នឹងត្រូវប្រើប្រាស់ដើម្បីផ្ដល់ស្រូវពូជធ្វើការជួសជុលបណ្ដោះអាសន្ន ចំពោះប្រឡាយស្រោចស្រព និងហេដ្ឋារចនាសម្ព័ន្ធពាក់ព័ន្ធនឹងស្ដារឡើងវិញ ឱ្យបានឆាប់រហ័សនូវការភ្ផាប់ទំនាក់ទំនងលើផ្លូវជនបទ ដែលទទួលរងការខូចខាតតាមរយៈកម្មវិធីពលកម្មប្ដូរនឹងសាច់ប្រាក់។ កម្មវិធីពលកម្មប្តូរនឹងសាច់ប្រាក់នេះ នឹងផ្តល់ការងារនិងចំណូលដល់ប្រជាជនជាពិសេសស្ត្រី ក្នុងមូលដ្ឋានរងគ្រោះដោយទឹកជំនន់ តាមរយៈការចូលរួមជួសជុលនិងថែទាំងផ្លូវ។លោក Eric Sidgwick នាយក អេឌីប៊ី ប្រចាំប្រទេសកម្ពុជា បាននិយាយថា ការគាំទ្ររបស់អេឌីប៊ីនេះ គឺជាការឆ្លើយតបដោយផ្ទាល់ចំពោះភាពចាំបាច់នៃការជួសជុលផ្លូវថ្នល់ឱ្យបានឆាប់រហ័សដើម្បីធានាឱ្យមានការផ្ដល់សម្ភារសម្រាប់សង្គ្រោះបន្ទាន់ ឱ្យបានរលូននិងការផ្ដល់ស្រូវពូជសម្រាប់បង្កបង្កើនផលឡើងវិញមុនពេលទឹកស្រក។សេចក្តីប្រកាសដដែលបានបន្តថា ខណៈខេត្ដមួយចំនួនបានទទួលរងផលប៉ះពាល់ខ្លាំងជាងគេ។ បើតាមការប៉ាន់ប្រមាណ មានផ្លូវជាតិប្រវែងយ៉ាងហោចណាស់ ៤៤០ គីឡូម៉ែត្រ និងផ្លូវជនបទ ៣.៦៩៣ គីឡូម៉ែត្រ បានទទួលរងផលប៉ះពាល់ដោយសារទឹកជំនន់ ដែលចាប់ផ្ដើមមានតាំងពីខែកញ្ញាមក។ ដីស្រែស្ទូងរួច ឬដីសំណាបជាង ២៤០០០០ ហិចតា បានទទួលរងផលប៉ះពាល់ ហើយមានសាលារៀន មន្ទីរពេទ្យជាច្រើន ទទួលរងការខូចខាតយ៉ាងធ្ងន់ធ្ងរ។សេចក្តីប្រកាសនោះលើកឡើងទៀតថា គេរំពឹងថា ផលប៉ះពាល់ដែលបង្កឡើងដោយទឹកជំនន់លើកនេះ នឹងខ្លាំងជាងផលប៉ះពាល់ដោយសារទឹកជំនន់នៅក្នុងឆ្នាំ២០០០ និង២០០១ ដោយសារតែរយៈពេលលិចលង់អូសបន្លាយពេលយូរ ដែលបន្ទុចបង្អាក់ដល់កិច្ចខិតខំប្រឹងប្រែងដំបូងៗដើម្បីកាត់បន្ថយការខូចខាត។ជាការកត់សម្គាល់ គ្រោះទឹកជំនន់ នៅឆ្នាំ២០១៣ បង្កដោយទឹកទន្លេមេគង្គ និងទឹកភ្លៀង បានសម្លាប់មនុស្ស ១៦៨ នាក់ និងបង្កការខូចខាតទ្រព្យសម្បតិ្ត សរុបប្រមាណ ១.០០០ លានដុល្លារអាមេរិក។ នេះបើតាមរបាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយ៕ ដោយ៖ ស.ស្អាត