ភ្នំពេញ៖ លោក ព្រុំ សំខាន់ដែលជាអភិបាលរងខណ្ឌចំការមន ​ត្រូវបានប្រកាសតែងតាំង​អភិបាល​ ជំនួសលោក ឡូ យុយ​ដែល​ត្រូវ​បានចូលនិវត្តន៍។​ពិធីតែងតាំងនេះត្រូវបានធ្វើឡើង​កាលពីរសៀលថ្ងៃទី១៤វិច្ឆិកា២០១៣ នៅសាលាខណ្ឌចំការមន ក្រោម​វត្តមានលោកប៉ា សុជាតិវង្ស​ អភិបាលរាជធានីភ្នំពេញ​មន្ត្រីរាជការក្រោមឱវាទជាច្រើនរូបទៀត។

លោក ព្រុំ សំខាន់ ដែលត្រូវបានតែងតាំងជាអភិបាលខណ្ឌចំការមនថ្មីបានប្តេជ្ញាចិត្តថា នឹងគោរពប្រតិបត្តិតាមគោលនយោបាយ​យុទ្ធសាស្រ្តចតុកោណ ដំណាក់កាលទី៣​របស់​រាជរដ្ឋាភិបាលអាណត្តិទី៥ ដែលមានសម្តេចតេជោជាប្រមុខដឹកនាំអោយ​ទទួល​បានជោគ​ជ័យ។ ​គោរពនិងអនុវត្តរដ្ឋធម្មនុញ្ញច្បាប់លិខិតបទដ្ឋានគតិយុត្ត​និងបទបញ្ជានានា​របស់រាជ​រដ្ឋាភិបាលក្រសួងមហាផ្ទៃ​និងសាលារាជធានីភ្នំពេញ។ពង្រឹងការអនុវត្តគោលនយោបាយភូមិសង្កាត់មានសុវត្ថិភាពទាំង៩ចំណុច។ បង្កើនសាមគ្គីភាពផ្ទៃ លើមូលដ្ឋានច្បាប់និងគោល​ការណ៍​អភិបាលកិច្ចល្អក្នុងជួរនៃគណះអភិបាល ក្រុមប្រឹក្សា មន្ត្រីកងកម្លាំងប្រដាប់អាវុធ​និង​អាជ្ញាធរ​គ្រប់លំដាប់ថ្នាក់ព្រមទាំងជាមួយប្រជាពលរដ្ឋអោយបានល្អ។ ​បង្កលក្ខណៈនិង​សហការមួយវិស័យឯកជននិងអង្កការ​សង្គមស៊ីវិល​នានា សំដៅធ្វើយ៉ាងណាគៀងគរអោយ​មានការអភិវឌ្ឍន៍នៅមូលដ្ឋានអោយកាន់តែប្រសើរឡើង។បន្តយកចិត្តទុកដាក់បន្តការ​ដោះ​ស្រាយអោយមានប្រសិទ្ធភាពនូវបញ្ហាប្រឈមនិងបញ្ហាសេសសល់ទាំងឡាយអោយមានប្រសិទ្ធិភាពខ្ពស់។

លោក ប៉ា សុជាតិវង្ស បានលើកឡើងថា ខណ្ឌចំការមន​ជាខណ្ឌនៅកណ្តាលក្រុង​ហើយ​ក្រោមការ​ដឹកនាំរបស់លោកឡូ យុយ​ប្រមាណ១០ឆ្នាំនេះ​បានធ្វើអោយខណ្ឌចំការមន​មានការអភិវឌ្ឍន៍រីកចំរើនខ្លាំងទទួលបានការកោតសសើរពីថ្នាក់ដឹកនាំ និង​ប្រជាពល​រដ្ឋ​ក្នុងមូលដ្ឋាន។ ការចូលចូលនិវត្តន៍របស់លោក ឡូ យុយ​ ជាការបាត់បង់ធនធាន​មនុស្សដ៏​សំខាន់មួយ តែលោកអាច​បំពេញការងារលើផ្នែកនយោបាយជូនជាតិបាន។លោក ប៉ា សុជាតិវង្ស ក៏បានធ្វើការណែនាំសម្រាប់លោក ព្រុំ សំខាន់​ដែលត្រូវ​បានតែងតាំងជាអភិបាលខណ្ឌចំការមនថ្មី ត្រូវតែយកចិត្តទុកដាក់ជាប្រចាំ២៤ម៉ោង​លើ២៤ម៉ោងលើកិច្ចការពារសន្តិសុខ សុវត្ថិ​ភាពជូនប្រជាពលរដ្ឋនៅក្នុងមូលដ្ឋាន ដែលកិច្ចការ​ងារនេះមិនមែនជាកិច្ចការងារសំរាប់តែប៉ូលីស ប៉េអ៊ឹមនោះទេ តែវាជាកិច្ច​ការងារ​សំរាប់យើង​ទាំងអស់គ្នារួមនឹងប្រជាពលរដ្ឋផងដែរ បើគ្មានប្រជាពលរដ្ឋចូលរួមទេកិច្ចការងារទាំងនោះមិន​បានសំរេច​ជាផ្លែផ្កាទេ។ដូច្នេះអ្វីដែលយើងត្រូវតែធ្វើជាប្រចាំនោះគឺប្រជុំវេទិការសាធារណះជាមួយប្រជាពលរដ្ឋ មានតែប្រជាពលរដ្ឋទេដែល​ដឹងរឿងច្រើន ហើយយើងក៏បានដឹងពី​បំណង​និងការចង់បានរបស់ប្រជាពលរដ្ឋនៅក្នុងមូលដ្ឋានរបស់យើងដែរ។

ចំពោះវិធានការបន្ត សាលារាជធានីភ្នំពេញនឹងប្រតិភូកម្មអំណាចនេះមកខណ្ឌ​ទាំង៩​នឹងមន្ទីរពាក់ព័ន្ធដើម្បីបំពេញការងារ​និង​ទទួល​ខុសត្រូវ ។កាងារសំណង់អត់ច្បាប់ ការរំលោភ​បឹងប្រឡាយត្រូវតែមានវិធានការទប់ស្កាត់មិនត្រូវអោយមានបន្តទៀតទេ ។ សាលារាជធានី​ភ្នំពេញនឹងអាចធ្វើកិច្ចសន្យាមួយអោយទទួលខុសត្រូវហើយជាមួយអាជ្ញាធរខណ្ឌ និងមន្ទីរ​ជំនាញទាំងអស់ដើម្បី​អោយ​មានការទទួលខុសត្រូវខ្ពស់។ ចំពោះចំណាត់ការរបស់​សាលា​រាជធានីភ្នំពេញក្នុងការហាមរថយន្តធំៗគ្រប់ប្រភេទ​មិនអោយ​ចូល​ក្រុងពេលថ្ងៃមកដល់ពេលនេះបាន២សប្តាហ៍ ហើយអ្វីដែលជាលទ្ធផលដែលយើងទទួលបាននោះគឺពុំមានគ្រោះថ្នាក់​ចរាចរ​ដោយសាររថយន្តធំ ដែលមុននេះគ្រោះថ្នាក់ចរាចរដោយរថយន្តធំនេះមានស្ទើររាល់ថ្ងៃ ហើយវិធានការនេះពិតជាទទួល​បានការ​គាំ​ទ្រពីប្រជាពលរដ្ឋយ៉ាងច្រើនលើសលប់ ដែលធ្វើ​អោយសាលារាជធានីភ្នំពេញមានទឹកចិត្ត ក្នុងការបន្តជម្រុញការងារនេះ​អោយ​រិតតែ​ប្រសើរ​ឡើងនិងទទួលបានជោគជ័យ៕ ដោយ៖ ស.ស្អាត