ភ្នំពេញ៖ ក្រុមប្រឹក្សាជាតិ ដើម្បីកុមារ សហការជាមួយ ក្រសួងសង្គមកិច្ច អតីតយុទ្ធជន និង​យុវនី​តិសម្បទា រួមជា​មួយ​ក្រសួងពាក់ព័ន្ធជាច្រើនទៀត ដោយទទួលបានការគាំទ្រពី​ដៃគូរ​អភិវឌ្ឍន៍​​នានា ដែលធ្វើការទាក់ទិនដោយ​ផ្ទាល់​ជាមួយកុមារនៅកម្ពុជា បានធ្វើការផ្សព្វ​ផ្សាយគម្រោងស្តីពី ការលើកកម្ពស់សហគមន៍កុមារមេត្រី តាមរយៈការ​អភិវឌ្ឍ​​​​​​​​​​​​​​ប្រព័ន្ធ​​​​​​​​​​​ការពារ​កុមារថ្នាក់ជាតិនៅកម្ពុជា។

          តាមរបាយការណ៍របស់លោក ម៉ែន សុចិត្រ អគ្គលេខាធិការ​(ក.ជ.ក)​បានឲ្យដឹងថា​គោលបំណងនៃគម្រោង​នេះ ដើម្បីចូលរួមចំណែកក្នុងការបង្កើតប្រព័ន្ធការពារ​កុមារថ្នាក់ជាតិ​មួយ ក្នុងការធានាកុមារទាំងអស់ទទួលបានសិទ្ធិ​​​ការពារពីគ្រប់ទម្រង់នៃហិង្សានៅគ្រប់ទី​កន្លែង។លោកស្រី ខៀវ បូរី រដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិ​សម្បទាថ្លែងថា គម្រោងនេះមានរយៈពេល៣ឆ្នាំចាប់ពីឆ្នាំ២០១៤ដល់ឆ្នាំ២០១៦ ដែលមានទឹក​ប្រាក់​សរុប​ចំនួន ២.២៧៨.០៣៧ ដុល្លារអាមេរិក។ ដោយឡែកក្រុមប្រឹក្សាជាតិ​កម្ពុជា​ដើម្បី​កុមារបានទទួលទឹកប្រាក់ចំនួន​៩១.៤៣៩ ដុល្លារអាមេរិក ដោយផ្តោតលើសកម្មភាព​សំខាន់ៗ​ចំនួន៣ គឺទី១-ការកសាងសមត្ថភាពមន្ត្រី​ក្រុមប្រឹក្សា​ជាតិ​កម្ពុជាដើម្បីកុមារ (ក.ជ.ក) ថ្នាក់ជាតិ និងថ្នាក់ក្រោមជាតិ ទី២-ការគាំទ្រដល់(ក.ជ.ក) ក្នុងការកសាងសមត្ថ​ភាព​សមាជិក​ថ្នាក់ក្រោម​ជាតិ និងទី៣-ជួយដល់(ក.ជ.ក) ក្នុងការបង្កើតផែនការសកម្មភាពជាតិ ស្តីពីអំពើហិង្សាប្រឆាំង​កុមារដោយផ្តោតជាសំខាន់ទៅលើផ្នែកយេនឌ័រ និងបទដ្ឋានអប្បរមា សម្រាប់ការការពារ​កុមារ​​នៅគ្រប់ផ្នែក។

តាមរយៈគម្រោងនេះលោកស្រីមានទុទិដ្ឋិនិយមថា មន្ត្រី (ក.ជ.ក) នៅថ្នាក់ជាតិ និងថ្នាក់ក្រោម​ជាតិ កាន់តែមាន​សមត្ថ​ភាព​ខ្ពស់ក្នុងការអនុវត្តការងារពាក់ព័ន្ធនឹងកិច្ចការពារកុមារ ហើយកិច្ច​សហប្រតិបត្តិការរវាង (ក.ជ.ក) ជាមួយ​ក្រសួងស្ថាប័ន និងអង្គការពាក់ព័ន្ធកាន់តែមានភាព​រឹង​មាំ។ ម្យ៉ាងទៀតគម្រោងនេះ នឹងធ្វើឲ្យការអនុវត្តសិទ្ធិកុមារ​នៅ​កម្ពុជា​កាន់តែល្អប្រសើរឡើង តាម​រយៈការបង្កើតឲ្យមានប្រព័ន្ធការពារកុមារថ្នាក់ជាតិ ដែលជាយន្តការមួយធានាថា កុមារ​ត្រូវ​បានការពារពីគ្រប់ទម្រង់នៃអំពើហិង្សា និងអំពើរំលោភបំពាន កេងប្រវ័ញ្ចផ្សេងៗ។ អង្គការភ្លែនអន្តរជាតិ (plan International) នៅកម្ពុជាឆ្នាំ២០១១ បង្ហាញថា​ពីការរំលោភបំពាន​លើ​កុមារ​​​​​​ដែលបានរកឃើញគឺករណី​ភាគ​ច្រើន​ការរំលោភផ្លូវភេទលើកុមារមាន ៧២% និងក្នុង​ចំណោមករណីជួញដូរផ្លូវភេទមាន៧៥% កើតឡើងចំពោះ​កុមារពី​អាយុ​ ១៣-១៧ឆ្នាំ។

របាយការណ៍ដដែលបានឲ្យដឹងទៀតថា តាមរយៈការស្វែងរកព័ត៌មានបឋមនៅខេត្តកំពង់ចាម និងខេត្តសៀមរាប ដោយ(plan International) ឆ្នាំ២០១២បង្ហាញថា ៤១% នៃកុមារនិយាយថា ទទួលការរងវាយដំពីឪពុកម្តាយ៥២.៨% នៃកុមារានិង៤៧.៦% នៃកុមារីនៅថ្នាក់ទី៤ ដល់ថ្នាក់ទី៦ និង៨៣% នៃកុមារថ្នាក់ទី១ដល់ថ្នាក់ទី៣ និយាយថាធ្លាប់​ទទួល​ការដាក់ទណ្ឌកម្ម​លើរាងកាយពីគ្រូរបស់ពួកគេនៅពេលថ្មីៗនេះ។  របាយការណ៍នេះបន្តថា តាមរយៈរបាយ​ការណ៍​ពីទូរស័ព្ទជំនួយបង្ហាញថា បញ្ហាភាគច្រើនដែលទទួលបានពាក់ព័ន្ធនឹងកុមារ គឺអំពើ​ហិង្សា​ក្នុងគ្រួសារ ការ​មិន​យកចិត្តទុកដាក់ពីគ្រួសារ ការបង្ខំឲ្យរៀបការ ព្រមទាំងចំណេះដឹង ការចូលរួមរបស់កុមារ និងសហគមន៍ក្នុងការការ​ពារ​នៅមានកម្រិតនៅឡើយ៕   

ដោយ៖ ស.ស្អាត