ភ្នំពេញ៖ ដូចការគ្រោងទុកនៅព្រឹកថ្ងៃអង្គារ ទី១២ ខែវិច្ឆិកា ឆ្នាំ២០១៣នេះ រដ្ឋសភាបាន បើកសម័យប្រជុំរដ្ឋសភា លើកទី១ នីតិកាលទី៥ ដើម្បីប្រជុំពិភាក្សា និងអនុម័តច្បាប់ថវិកាជាតិឆ្នាំ២០១៤។អ្វីជាការកត់សម្គាល់ នៅក្នុងការបើកសម័យប្រជុំនៅព្រឹកនេះ មានតែអ្នកតំណាងរាស្ត្រគណបក្សប្រជាជនកម្ពុជា៦៨រូប ក្នុងចំណោម១២៣រូប ដោយអវត្ដមានតំណាងរាស្ត្របក្សប្រឆាំង៥៥រូប។
កិច្ចប្រជុំរដ្ឋសភា នៅព្រឹកនេះ នឹងពិភាក្សា និងអនុម័ត លើសេចក្តីព្រាងច្បាប់ថវិកាជាតិ ឆ្នាំ២០១៤ ដែលមានទឹកប្រាក់ចំណាយក្នុងក្រសួងស្ថាប័នរដ្ឋជាង១៣លានលានរៀល ស្មើជិត៣៤០០លានដុល្លារ។ ថវិកាជាតិ ឆ្នាំ២០១៤ កើនឡើង១៣,១% ធៀបនឹងច្បាប់ថវិកាជាតិឆ្នាំ២០១៣ ដែលមានចំនួនប្រមាណ ៣.០០០ លានដុល្លារ។
ថវិកាជាតិ នៅឆ្នាំ២០១៤ ត្រូវបានកំណត់ បែងចែកការចំណាយ តាមស្ថាប័នជាតិ និងក្រសួងនិមួយៗមួយចំនួនដូចជាៈចំណាយវិស័យរដ្ឋបាលទូទៅវិស័យការពារជាតិនិងសន្តិសុខវិស័យសង្គមកិច្ចនិងវិស័យសេដ្ឋកិច្ច ជាដើម។បើតាមមន្រ្ដីជាន់ខ្ពស់គណបក្សសង្រ្គោះជាតិ បានឲ្យដឹង ថា ការធ្វើពហិកាមិនចូលរួមប្រជុំសភាគឺចង់អោយគណបក្សប្រជាជនព្រមទទួលយកសំណើរក្នុងការបង្កើតគណៈកម្មាធិការស្វែងរកយុត្តិធម៌ក្នុងភាពមិនប្រក្រតីនៃការបោះឆ្នោតជូនប្រជាពលរដ្ឋដែលជាម្ចាស់ឆ្នោតសិន មុននឹងឈានទៅដល់ការអនុម័ត្តថវិកាជាតិឆ្នាំ២០១៤៕
ដោយ៖ រតនា