ភ្នំពេញ៖ ក្រសួងវប្បធម៍និងវិចិត្យសិល្បៈ គ្រោងបង្កើតរោងកុនថ្មីចំនួន៣នៅរាជធានីភ្នំពេញ​ក្នុងពេលខាងមុខ ខណៈវិស័យភាព​កម្ពុជាមានការរីលូតលាស់ប្រសើរជាងមុន និងដោយសារ​រោងកុនមួយចំនួនត្រូវបានគេកែប្រែប្រកបអាជីវកម្មបែបថ្មី ដូចជា ​ក្លិប​ម៉ាស្សា និងហាង​ខារ៉ាអូ​ខេ ជាដើម ។លោក ឃឹម សារិទ្ធ រដ្ឋលេខាធិការ ក្រសួងវប្បធម៌ និងវិចិត្រសិល្បៈ បានថ្លែងឲ្យដឹងថា ក្នុង​ដំណាក់កាលបច្ចុប្បន្ននេះ ភាពយន្តពិតជាមានតួនាទីសំខាន់ណាស់ក្នុងការរួមចំណែក​ដល់​ការ​អភិវឌ្ឍន៍​សេដ្ឋកិច្ចជាតិ និងការ​ពង្រីក​​ស្ថេរភាពនៃមនុស្សជាតិ។ រាជរដ្ឋាភិបាល ពិសេសក្រសួងវប្បធម៌ និងវិចិត្រសិល្បៈបានយកចិត្តទុកដាក់ពង្រីកនិងអភិវឌ្ឍន៍​វិស័យភាព​យន្តជាតិឲ្យមានការងើបឡើងវិញបន្ទាប់ពីធ្លាក់ចុះមួយរយៈកន្លងមកនេះ។ ដូច្នេះដើម្បីឲ្យ​វិស័យ​ភាពយន្តមានចីរភាព ក្រសួងមានផែនការបង្កើតរោងភាពយន្តថ្មីៗចំនួន៣ ក្នុងនោះ​នៅចុងឆ្នាំ២០១៣នេះ នឹងសម្ពោធដាក់ឲ្យប្រើប្រាស់នូវ​រោងភាពយន្ត​ថ្មីទំនើប មួយនៅតំបន់​ទួលគោក ដែលមាន៣បន្ទប់និងមានចំណុះសរុប៦៥០កៅអី ហើយនៅដំណាច់​ឆ្នាំ២០១៤ ក៏នឹងមានរោង​ភាព​យន្តថ្មី២កន្លែងទៀតនៅតំបន់កោះពេជ្រនឹងចាប់ផ្តើមដំណើរការ ដែលអាច​មានចំណុះកៅអីប្រមាណ៣០០០កៅអី។

ទន្ទឹមនឹងនេះលោករដ្ឋលេខាធិការបានអំពាវនាវដល់ផលិតកម្មភាពយន្តទាំងអស់ ឲ្យយកចិត្ត​ទុក​ដាក់​និងពង្រឹង​ការ​ផលិត​ភាព​យន្តឲ្យឈាន​ដល់កម្រឹតអន្តរជាតិ ដើម្បីឆ្លើយតបនិងទីផ្សារ​ភាពយន្តអាស៊ាន​នាឆ្នាំ២០១៥ខាងមុខ។​ លោកក៏បានជម្រុញ​ឲ្យមាន​ការ​ប​ណ្តុះ​បណ្តាល​ជំនាញវិជ្ជាជីវៈបន្ថែមឲ្យឆ្លើយតបទៅនឹងតម្រូវ​ការ​នៃការរីកចម្រើននូវបច្ចេកវិទ្យាថ្មី ពិសេស​ដើម្បីទាក់ទាញ​ក្រុម​​​​​ហ៊ុនបរទេសឲ្យមកថតខ្សែរភាគយន្តនៅ​ក្នុងស្រទេសយើងកាន់តែច្រើន​កន្លងមកក្រសួងក៏បានជម្រុញឲ្យមាន​ការផ្លាស់ប្តូរ​ផលិត​ផល​​​​​​​​ភាពយន្ត​ ក្នុងតំបន់​អាស៊ាន​ពីព្រោះតាមរយៈខ្សែរភាពយន្តនេះ និងផ្តល់នូវការយល់ដឹងអំពីវប្បធម៍ប្រពៃណីទំនៀមទម្លាប់​របស់​​​​​ជា​តិទៅវិញទៅមក​ក្នុងតំបន់ដ៏ធំមួយនេះ ​ដែលមានប្រជាជនប្រមាណ៥០០លាននាក់​និងមាន​សាសនា​ធំៗ​ចំនួនបី​។​​ វានឹងធ្វើឲ្យ​មាន​​​ការយោគយល់អធ្យាស្រ័យនិងការគោរពគ្នាទៅ វិញទៅមកដើម្បីរក្សាបាននូវ​សុខសន្តិភាពជូនប្រជាជាតិទាំងមូល។ជាមួយ​គ្នា​នេះ កម្ពុជារំពឹងថាទីផ្សារភាពយន្តរបស់ខ្លួននឹងធ្វើដំណើរយ៉ាងសន្សឹមៗ ដោយរលូន ​ដើម្បី​ទៅប្រ​​ឡូក​ក្នុងវិស័យភាពយន្តអន្តរជាតិ​ ហើយលោកអំពាវនាវដល់ផលិតករទាំងអស់​ ត្រូវធ្វើយ៉ាងណាផលិតភាពយន្តរប​ស់​​ខ្លួន​ឲ្យ​មា​នគុណភាព ដើម្បីប្រគួតប្រជែង​ក្នុង​ក្នុង​តំបន់ និងនៅលើពិភពលោក។

សូមជម្រាបថា ការលើកឡើងខាងនេះបានធ្វើឡើងនៅរោងមហោស្រពចេនឡា កាលពីថ្ងៃទី​៨ខែវិច្ឆិកា​ ខណៈលោករដ្ឋលេខា​ធិការ​​​​​អញ្ជើញក្នុងពិធីបើកការ​ចាក់បញ្ចាំងខ្សែ​ភាពយន្តរឿង​ថ្មីមួយទៀតរបស់ផលិតកម្មសាន់​ដេរ​​ភាពយន្ត ​គឺរឿង​ព្រាយក្បាល៨ ដែលទើបតែបានថត​បញ្ចប់​និងចាប់​ផ្តើមបញ្ចាំងបម្រើដល់ទស្សនិកជនដែល​និយម​គាំទ្រភាពយន្ត​ខ្មែរ ៕

ដោយ៖​ស.ស្អាត