មន្ត្រីជាន់ខ្ពស់រាជរដ្ឋាភិបាលកម្ពុជា បានអំពាវនាវឲ្យអង្គភាពពាក់ពន្ធ័ ត្រូវធ្វើសកម្មភាពគ្រប់យ៉ាង ដើម្បីឆ្លើយតបទៅនិងបញ្ហាកង្វះអាហារូបត្ថម្ភនៅកម្ពុជា ខណៈដែលកុមាររងគ្រោះប្រមាណ៤០% កំពុងផ្លាស់ប្តូររបបអាហាររបស់ខ្លួន នៅកំឡុងពេលមួយទសវត្សចុងក្រោយនេះ ។
.JPG)
នៅក្នុងពិធីបើកសម្ពោធ«យុទ្ធនាការលើកកម្ពស់សុខភាពកុមារឥឡូវនេះ» ដែលបានចាប់ផ្តើមធ្វើជាលើកដំបូងនៅកម្ពុជា ឯ/ឧ ឧបនាយករដ្ឋមន្ត្រី យឹម ឆៃលី ប្រធានក្រុមប្រឹក្សាស្តារ អភិវឌ្ឍន៍វិស័យកសិកម្មនិងជនបទបានមានប្រសាសន៏ថា ការបើកយុទ្ធនាការសុខភាពកុមារនាពេលឥឡូវនេះ គឺជាឱកាសមួយ សម្រាប់ធ្វើការអំពាវនាវឲ្យក្រសួង ស្ថាបន័ អាជ្ញាធរគ្រប់ជាន់ថ្នាក់ ដៃគូរអភិវឌ្ឍន៍និងអង្គការសង្គមស៊ីវិល ត្រូវខិតខំធ្វើសកម្មភាពគ្រប់បែបយ៉ាង ដើម្បីឆ្លើយតបទៅនិងបញ្ហាកង្វះអាហារូបត្ថម្ភនៅប្រទេសកម្ពុជា។ ឯ/ឧ បន្តថា កង្វះអាហារូបត្ថម្ភមិនត្រឹមតែពាក់ពន្ធ័ជាមួយនិងកំណើនអត្រាស្លាប់ កុមារប៉ុណ្ណោះទេ ប៉ុន្តែវាជះឥទ្ធិពលលើកការអភិវឌ្ឍផ្នែកបញ្ហា-ស្មារតី និងខួរក្បាលកុមារ និងកម្រិតអប់រំ ការអភិវឌ្ឍផ្នែករូបរាងកាយនិងផលិតភាពរបស់កុមារផងដែរ។ឯ/ឧបញ្ជាក់ថា កុមារជាច្រើននៅមិនទាន់បានទទួលការថែទាំសុខភាពប្រកបដោយគុណភាព ឱកាសនៃការសិក្សា និងបញ្ហាកសាងគ្រឹះនានា សម្រាប់អនាគតរបស់កុមារនៅឡើយទេ ដូច្នេះនេះជាបញ្ហាដែលទាំងអស់គ្នាត្រូវចូលរួមដោះស្រាយ ។
អ្នកស្រីដួង ចន្ទ័ធីតា ប្រធានគម្រោងយុទ្ធនាការលើកកម្ពស់សុខភាព នាយកដ្ឋានតស៊ូមតិ បានមានប្រសាសន៍ថា កុមារដែលកង្វះអាហារូបត្ថម្ភអាចបណ្តាលឲ្យកើតមានជំងឺស្គម ស្លេកស្លាំង ងាយនិងមានជំងឺកើតមានច្រើនក្នុងរយៈពេលខ្លី មិនត្រឹមតែប៉ុណ្ណោះ ពួកគេអាចនិងប្រឈមទៅហ្នឹង ការចុះខ្សោយនៃកម្លាំងខួរក្បាល អាប់ប្រាជ្ញា ជាមនុស្សមិនសូវឆ្លាតវៃផងដែរ ក្នុងរយៈពេលវែង។ អ្នកស្រីបន្តថា កន្លងមក អង្គការ World Vision បានចាប់ផ្តើមគម្រោងរបស់ខ្លួននៅក្នុងខេត្ត-ក្រុងទាំង៩ ដោយផ្តោតទៅលើការផ្សព្វផ្សាយទៅកាន់ប្រជាពលរដ្ឋជាច្រើនគ្រួសារ ឲ្យពួកគេបាន យល់ដឹងអំពីប្រភេទអាហាររូបត្ថម្ភនិងអត្ថប្រយោជន៍នៃការរស់នៅស្អាត និងការថែទាំការពារកុមារឲ្យមានសុខភាពល្អប្រសើរឡើង ដើម្បីជៀសវាងនូវជំងឺផ្សេងៗជាច្រើនទៀត។
ចាប់តាំងពីឆ្នាំ១៩៩០ អត្រាមរណភាពរបស់កុមារអាយុក្រោម៥ឆ្នាំ បានធ្លាក់ចុះគួរឲ្យកត់សម្គាល់ រហូតដល់៦០% ប៉ុន្តែបញ្ហាអាហារូបត្ថម្ភកុមារហាក់ដូចជាមិនបានធ្លាក់ចុះច្រើនទៅតាមការចង់បាន របស់រដ្ឋាភិបាល និងបណ្តាអង្គការដៃគូរនោះឡើយ ។ដូច្នេះរដ្ឋាភិបាលនិងអង្គការដៃគូរបានប្តេជ្ញាចិត្តទាំង អស់គ្នា ដោយខិតខំប្រឹងប្រែងប្រើប្រាស់កម្លាំង មធ្យោបាយ និងវិធានការរួមគ្នាក្នុងការលើក កម្ពស់បញ្ហាអាហារូបត្ថម្ភសម្រាប់កុមារ ស្រ្តីមានផ្ទៃពោះ និងស្រ្តីស្ថិតក្នុងវ័យបន្តពូជ ដោយសម្រេចឲ្យបានគោលដៅអភិវឌ្ឍសហស្សវត្យរ៍កម្ពុជាឆ្នាំ២០១៥៕ ដោយ៖ អភិរក្ស