ភ្នំពេញ៖ ក្រសួងធម្មការ និងព្រះសង្ឃបានជួយបំផុសសារគាំទ្រមតិដើម្បីបន្ថយភាពងាយរងគ្រោះដល់កុមារកម្ពុជា​​ ដោយបង្កើនចំណេះដឹង និងការយល់ដឹងអំពីសិទ្ធិកុមារក្នុងការការពារបញ្ចៀសកុំឱ្យមានអំពើហិង្សា ការធ្វើ ទុក្ខ ​ទោស និងការមិនអើពើក្នុងចំណោមកុមារ ឪពុកមា្តយ និងអាណាព្យាបាលនៅសង្គម​។ ហើយព្រះសង្ឃ ក៏បានជួយ​​ជំរុញសារស្តីពីការមិនរើសអើងការគោរព និងការថែទាំជនដែលរស់នៅ ជាមួយមេរោគអេដស៏ និងតម្លៃភាព​សំខាន់​​នៃ​ការសិក្សាអប់រំ។​

នេះបើយោងទៅតាមការអះអាងរបស់លោក មិន ឃិន រដ្ឋមន្រ្តីក្រសួងធម្មការ និងសាសនា​ថ្លែងក្នុងសិក្ខាសា​លា​ពិគ្រោះ​យោបល់ស្តីពី «ការវាយតម្លៃចំពោះកម្មវិធីគំនិតផ្តួចផ្តើម ថ្នាក់ដឹកនាំព្រះពុទ្ធសាសនា» ថ្ងៃទី ៧ វិច្ឆិកា ​ឆ្នាំ​​២០១៣ នេះ នៅសណ្ឋាគារ កាំបូឌីយ៉ាណា​ រាជធានីភ្នំពេញ។លោក មិន ឃិន រដ្ឋមន្រ្តីក្រសួងធម្មការ និងសាសនា​ បានបន្តថា តាមរយៈចំណងភ្ជាប់បណ្តាញការ ងាររបស់ក្រសួងធម្មការ និងឋានានុក្រមនៃសាសនាព្រះពុទ្ធ ដែល​​គ្របដណ្តប់រាល់បណ្តាខេត្ត​ ស្រុក និងវត្តអារាមទាំងអស់ ហើយតាមរយៈការ​ប្រជុំដើម្បីពិនិត្យមើលកម្មវិធី​គំនិតផ្តួច​​ផ្តើម​ថ្នាក់ដឹកនាំព្រះពុទ្ធ សាសនា យើងមានឱកាសនេះដើម្បីពិចារណាថា តើយើងអាចធ្វើយ៉ាង​ណាអោយទទួល​​បានប្រសិទ្ធភាព បំផុតក្នុងសង្គមជាតិ ដោយបង្កើនចំណេះដឹងលើកកិច្ចការពារកុមារ និងកាត់បន្ថយអំពើហិង្សា​​ចំពោះ កុមារនៅក្នុងប្រទេសកម្ពុជាយើង។​

លោករដ្ឋមន្រ្តីធម្មការបានបញ្ជាក់ថា ក្នុងឆ្នាំ២០១៣នេះ ក្រសួងធម្មការ ជាសេនាធិការយ៉ាងសំខាន់បំផុតរបស់​រាជ​​រដ្ឋាភិបាលដែលបានចូលរួមជាមួយនឹងក្រសួងចំនួន៦ទៀត លើកកិច្ចការសហប្រតិបត្តិការជាមួយ អង្គការ​យូនី​​សែហ្វ (UNICEF)លើការអប់រំដល់កុមារនៅកម្ពុជា ពិសេសកុមារដែលមិនបានចូលសាលារៀន ព្រោះតែឪពុកម្តាយ​​គ្មានលទ្ធភាពបញ្ជូនទៅសាលារៀន ឬកុមារកំព្រា កុមារមានជំងឺអេដស៏ជាដើម។ ហើយ​ជាក់​ស្តែងក្រសួងបានអប់រំ​​សីលធម៌​តាមរយៈនាទីព្រះពុទ្ធសាសនាផ្សារភ្ជាប់នឹងសង្គម ជាបណ្តើរៗ ដើម្បីជំរុញការបង្កើតការ​អប់រំផ្សព្វផ្សាយ​​ទៅតាមវិហារសាសនា និងសាលារៀនធ្វើយ៉ាងណាឱ្យយល់ដឹងពី ក្រមសីលធម៌ និងជំរុញកម្មវិធី​អប់រំក្នុង​ពុទ្ធិក​​សិក្សា។

លោកស្រី ស៊ូណា គឹមស៊ូ អនុប្រធានអង្គការយូនីសែហ្វមានប្រសាសន៍ថា អង្គការយូនីសែហ្វមាន​ប្រវត្តិជាដៃគូនៃ​​​​កិច្ច​​សហប្រតិបត្តិការយូរអង្វែងមកហើយជាមួយ​ក្រសួង តាមរយៈកម្មវិធីគំនិតផ្តួចផ្តើមនៃ​ថ្នាក់ដឹកនាំព្រះពុទ្ធ​​សាសនា ដែលបានផ្តល់ប្រយោជន៍ដល់កុមារ និងក្រុមគ្រួសាររបស់ពួកគេរាប់ពាន់នាក់ រួមទាំងអ្នករងផលប៉ះ​ពាល់​​ដោយមេរោគ​អេដស៏ជាដើម។លោកស្រី គឹមស៊ូ ក៏បានទទួលស្គាល់ថា សហគមន៍សាសនា គឺជាកន្លែង​តែមួយ​គត់​​ក្នុងការលើកកម្ពស់នូវលទ្ធផលប្រកបដោយសមធម៌សម្រាប់កុមារ និងគ្រួសារងាយរងគ្រោះបំផុត។​​

អនុភាពខាងផ្លូវ សីលធម៌​និងបណ្តាញ​យ៉ាងទូលំទូលាយធ្វើឱ្យពួកគេអាចជ្រៀតចូល​ទៅដល់ក្រុមងាយរងគ្រោះ​​​​ដែល ទទួលបានសេរីភាពមិនពេញលេញ ហើយដែលអ្នកផ្សេងទៀតជានិច្ចកាល គឺមិនអាចចូលដល់ប្រកបដោយ​​​​ប្រ​សិទ្ធភាព​នេះទេ។ ហើយប្រទេសកម្ពុជា ត្រូវបានជ្រើសរើសដោយអង្គការយូនីសែហ្វក្នុងចំណោម ប្រទេស​ចំនួន​​​​៦៣ ទូទាំងពិភពលោកដើម្បីចូលរួមក្នុងព្រឹត្តិការណ៍សកម្មភាពសម្រាប់កុមារជុំវិញទិវាបួង សួងនៅថ្ងៃទី ២០ ខែវិច្ឆិកា ​​​​​ខាងមុខនេះ។​​

សូមបញ្ជាក់ផងដែរថា សិក្ខាសាលាពិគ្រោះយោបល់ស្តីពី «ការវាយតម្លៃចំពោះកម្មវិធីគំនិតផ្តួចផ្តើម ថ្នាក់ដឹកនាំ​​​​ព្រះពុទ្ធ​​សាសនា» គឺមានគោលបំណង និងទិសដៅប្រកបដោយសុឆន្ទៈចំនួន៣ យ៉ាងរួមមាន៖ ទី១- យកប្រព័ន្ធ​​​​សាសនាជាយន្តការសម្រាប់អប់រំគុណធម៌ សីលធម៌ដល់កុលបុត្រ កុលធីតាខ្មែរឱ្យបាន ជ្រួតជ្រាប ទី២- រួមចំណែ​ក​​​កាត់​​បន្ថយភាពក្រីក្រ លុបបំបាត់ការប្រើអំពើហិង្សាលើស្រ្តី និងកុមារក្នុងសង្គម គ្រួសារ ហើយទី៣នោះ គឺជួយ​​​​អភិវឌ្ឍន៍​​ជាតិតាមរយៈការអប់រំ និងបណ្តុះបណ្តាលធនធានមនុស្សក្នុង ប្រព័ន្ធសាសនានៅកម្ពុជា។​

យោង​តាម​​​មាត្រា​ទី៤៣ នៃច្បាប់កំពូលរដ្ឋធម្មនុញ្ញបានចែងថា ព្រះពុទ្ធសាសនា ជាសាសនារបស់រដ្ឋ ហើយព្រះពុទ្ធ​​សាសនា​​បាន​ដើរតួនាទីយ៉ាងសំខាន់ក្នុងការអភិវឌ្ឍន៍ជាតិ ទាំងសេដ្ឋកិច្ចបរិស្ថាន​ និងការអប់រំសីលធម៌ ចរិយា​ធម៌​​
ក្ន​ង​​សង្គម​​ថែមទៀត៕ ដោយ៖​ មករា​​