ភ្នំពេញ៖ ប្រទេសជប៉ុនតាមរយៈស្ថានទូតរបស់ខ្លួនប្រចាំកម្ពុជា បានផ្តល់ជំនួយ២០​៤,៨​៩៩ដុល្លារអាមេរិក​សម្រាប់គម្រោង​ស្តារ​ប្រព័ន្ធធារាសាស្ត្រក្នុងខេត្តកំពង់ចាម និងខេត្តពោធិ៍សាត់។ ជំនួយឧបត្ថម្ភឥតសំណងសម្រាប់គម្រោងទ្រង់ទ្រាយ​តូចសន្តិសុខ​មនុស្ស​​ជាតិត្រូវបានរដ្ឋាភិបាលជប៉ុនផ្តល់អោយដល់មន្ទីរធនធានទឹក និងឧត្តុនិយមចំនួន២។

កិច្ចសន្យាផ្តល់ជំនួយនេះត្រូវបានចុះហត្ថលេខានៅរសៀលថ្ងៃទី០៦ខែតុលា ដោយលោក គូម៉ាម៉ារូ យូជិ ឯកអគ្គរាជទូត​ជប៉ុនប្រចាំ​កម្ពុជា និងតំណាងស្ថាប័នទទួលជំនួយទាំងពីរ។ឯកអគ្គរាជទូតជប៉ុន បានមានប្រសាសន៍ថា គម្រោងដែលចុះហត្ថលេខានេះ​មាន​គោល​ដៅអភិវឌ្ឍន៍វិស័យកសិកម្ម ត្បិតថា ការអភិវឌ្ឍន៍វិស័យនេះ គឺជាគន្លឹះដ៏សំ​ខាន់ក្នុងការកាត់បន្ថយភាពក្រីក្រ ក៏ដូចជាការ​បង្កើន​​ប្រាក់ចំណូលនៅតាមតំបន់ជន​បទ​ផងដែរ។ជាក់ស្តែង ការបង្កបង្កើនស្រូវគឺជាគោលដៅអាទិភាពខ្ពស់បំផុតមួយ ហើយ រាជរដ្ឋា​ភិបាលបានខិតខំយ៉ាងសកម្មក្នុងការពង្រីកនិងស្តារប្រព័ន្ធធារាសាស្ត្រនៅទូទាំងប្រទេស។ឯកអគ្គរាជទូតរូបនេះដដែល បាន​បង្ហាញក្តីសង្ឃឹមថា គម្រោងទាំងពីរនេះនឹងត្រូវអនុវត្តយ៉ាងរលូន និងប្រកបដោយប្រសិទ្ធភាព ព្រម​ទាំងថែទាំយ៉ាងត្រឹមត្រូវ​ដើម្បីប្រជាជនកាន់តែច្រើនអាចទទួលបានអត្ថប្រយោជន៍ពីគម្រោងទាំងនេះ។

លោក អ៊ុម វិបុល និង កែវ វ័យ ប្រធានមន្ទីរធនធានទឹក និងឧតុនិយមខេត្តកមពង់ចាម និងខេត្តពោធិ៍សាត់បានអះអាងដូចគ្នាថា ជំនួយ​ខាងលើនេះ មានសារៈសំខាន់ណាស់ក្នុងការកែលំអប្រសិទ្ធភាព នៃការបែងចែកទឹកស្រោចស្រពនិងការធានាទឹក​គ្រប់គ្រាន់​សម្រាប់ដំណាំស្រូវ បង្កើនទិន្នផលស្រូវ លើកស្ទួយជីវភាពរបស់ប្រជាជន និងចូលរួមចំណែកដល់ការកាត់បន្ថយ​ភាពក្រីក្ររបស់​ប្រជាជន​នៅក្នុងតំបន់គម្រោង។គួរបញ្ជាក់ថា ចាប់តាំងពីឆ្នាំ១៩៩១មក រដ្ឋាភិបាលជប៉ុន បានផ្តល់ថវិកាជាង៥០.១លានដុល្លារ​អាមេរិកដល់អាជ្ញាធរមូលដ្ឋាន និង​អង្គការក្រៅ​រដ្ឋាភិបាលដើម្បីអនុវត្តគម្រោងចំនួន៥០១គម្រោងនៅទូទាំងប្រទេស៕
ដោយ៖ រតនា