ភ្នំពេញ៖ សាលារាជធានីភ្នំពេញ បានដាក់បទបញ្ជាដល់សមត្ថកិច្ចពាក់ព័ន្ធនៅតាមខណ្ឌនីមួយៗ ក្នុងភូមិសាស្ត្រារាជធានីឲ្យត្រៀមផាកពិន័យទៅលើរថយន្តដឹកទំនិញធំៗ ដែលបន្តបើកបរចេញចូលក្នុងភូមិសាស្ត្ររាជធានីនៅពេលថ្ងៃ។ក្រោយពីប្រជាពលរដ្ឋមួយចំនួនបានអះអាងថា ឃើញមានរថយន្តដឹកទំនិញធំៗខ្លះ បានបន្តបើកចេញចូលក្រុងនៅពេលថ្ងៃ ប៉ុន្តែគ្មានសមត្ថកិច្ចណាម្នាក់ហ៊ានមកទប់ស្កាត់ ឬផាកពិន័យឡើយ។
លោក ឡុង ឌីម៉ង់ មន្ត្រីនាំពាក្យសាលារាជធានីភ្នំពេញ បានទទួលស្គាល់ថា នៅមានរថយន្តដឹកទំនិញធំៗមួយចំនួន មិនទាន់គោរពតាមសេចក្ដីណែនាំរបស់សាលារាជធានីដែលហាមមិនឲ្យធ្វើ ចរាចរណ៍ចេញចូលក្នុងភូមិសាស្ត្ររាជធានីភ្នំពេញ ពេលថ្ងៃ និងបានព្រមានថា អាចត្រូវផាកពិន័យធ្ងន់ធ្ងរក្នុងពេលឆាប់ៗ។
.jpg)
គួររំលឹកថា កាលពីថ្ងៃទី១ ខែវិច្ឆិកា ឆ្នាំ២០១៣ លោក ប៉ា សុជាតិវង្ស អភិបាលសាលារាជធានីភ្នំពេញ បានចេញសេចក្ដីណែនាំដល់បណ្ដាក្រុមហ៊ុនដឹកជញ្ជូនទំនិញធំៗ គឺមិនអនុញ្ញាតឲ្យធ្វើចរាចរណ៍ចេញចូល ក្នុងភូមិសាស្ត្ររាជធានី ចាប់ពីម៉ោង ៥ព្រឹក ដល់ម៉ោង ៩យប់។ បម្រាមនេះ ជាការឆ្លើយតបកង្វល់ពលរដ្ឋ និងដើម្បីកាត់បន្ថយការកកស្ទះ និងគ្រោះថ្នាក់ចរាចរណ៍ក្នុងក្រុង។ទោះបីជាបែបនេះក្តី ប្រជាពលរដ្ឋមានលំនៅឋានក្នុងរាជធានីភ្នំពេញ បានឱ្យដឹងទៀតថា ក្រុមហ៊ុនដឹកជញ្ជូនរថយន្តដឹកទំនិញធំៗខ្លះ មិនទាន់គោរពតាមសេចក្ដីណែនាំរបស់សាលាក្រុងទេ។
ពលរដ្ឋបានបន្ថែមថា សមត្ថកិច្ចតាមដងផ្លូវ គួរទប់ស្កាត់សកម្មភាពរថយន្តដឹកទំនិញធំៗ កុំឲ្យបើកបរចូលក្រុងពេលថ្ងៃឲ្យមានប្រសិទ្ធភាព និងកុំឲ្យប្រព្រឹត្តអំពើពុករលួយលើបញ្ហានេះ។ ហើយពួកគាត់នៅតែការព្រួយបារម្ភអំពីសុវត្ថិភាពបើកបរម៉ូតូរបស់កូនៗទៅសាលារៀន ដោយសាររថយន្តដឹកទំនិញធំៗបន្តបើកបរចូលក្រុងក្នុងល្បឿនលឿន។ជាមួយគ្នានេះដែរ ពលរដ្ឋក៏បានសំណូមពរបន្ថែមទៅដល់ថ្នាក់ដឹកនាំសាលារាជធានីភ្នំពេញ ឲ្យទប់ស្កាត់រថយន្តក្រុងដឹកអ្នកដំណើរបញ្ឈប់កុំឲ្យមានចំណតនៅ ក្នុងក្រុងទៀតនៅថ្ងៃអនាគត ដើម្បីរួមចំណែកកាត់បន្ថយការកកស្ទះ និងគ្រោះថ្នាក់ចរាចរណ៍ផ្សេងៗ។
សូមបញ្ជាក់ថា លោក ប៉ា សុវជាតិវង្ស បានធ្លាប់ព្រមានថា នឹងផាកពិន័យចំពោះរថយន្តដឹកទំនិញធំៗ ដែលបន្តបើកចូលក្រុងពេលថ្ងៃ ចាប់ពី ១០ម៉ឺនរៀល ទៅ ២០ម៉ឺនរៀលក្នុង១គ្រឿង ហើយថា ការផាកពិន័យនេះ អាចត្រូវគុណ ១ ជា ២ នៅថ្ងៃអនាគត បើសិនជាមានរថយន្តដឹកទំនិញធុនធ្ងន់បន្តធ្វើសកម្មភាពល្មើសពីសេចក្ដីណែនាំរបស់សាលារាជធានីភ្នំពេញបន្តទៅទៀត៕ ដោយ៖ ភីន រ៉ា