ភ្នំពេញ៖គ្រប់មន្ទីរពេទ្យរដ្ឋកំពុងជួបប្រទះនូវភាពខ្វះឈាម ក្នុងគ្រាដែលកំណើនគ្រោះថ្នាក់ ចរាចរណ៍ នៅតាមផ្លូវ សាធារណៈមានស្ទុះកើនឡើងអត់ឈប់ឈរស្ទើរតែរាល់ថ្ងៃ។ នេះជាលើកឡើងរបស់លោក ម៉ម ប៊ុនហេង រដ្ឋមន្រ្តី ក្រសួងសុខាភិបាល ដែលថ្លែងនៅសាកលវិទ្យាល័យវិទ្យាសាស្រ្តសុខាភិបាល កាលពីថ្ងៃទី២៣ ធ្នូ ២០១៣ ក្នុងកម្ម វិធីប្រមូលឈាមចល័ត ដើម្បីជួយជនរងគ្រោះ និងអ្នកត្រូវការឈាមជាបន្ទាន់ ដោយមាននិស្សិតពេទ្យ ចូលរួមបរិច្ចាគឈាមប្រមាណជា ៣០០នាក់ក្រោមប្រធានបទ«ផ្តល់ឈាមគឺផ្តល់ក្តីសង្ឃឹម»។
លោករដ្ឋមន្រ្តីក្រសួងសុខាភិបាលដែលបានចូលរួមនៅក្នុងពិធីនោះហើយបានបរិច្ចាគឈាមដែរនោះបានមាន
ប្រសាសន៍ទៀតថា គ្រោះថ្នាក់ចរាចរណ៍ជាមធ្យមបណ្តាលឱ្យមានមនុស្សស្លាប់ប្រមាណ៥នាក់ រៀងរាល់ថ្ងៃនិងប្រមាណយ៉ាងហោចជាង១០នាក់ រងគ្រោះធ្ងន់និងស្រាលដែលខ្លះត្រូវការឈាមជួយសង្គ្រោះជីវិតថែមទៀត។ ហើយនៅក្នុងកម្មវិធីប្រមូលឈាមចល័តនេះដែរ ពិតជាល្អណាស់ដែលចូលរួមបរិច្ចាគឈាមដោយស្ម័គ្រចិត្តពីសំណាក់យុវជនដែលជានិស្សិតនេះ គឺពិតជាបានចូលរួមចំណែកយ៉ាងធំធេងក្នុងការជួយជីវិតជនរងគ្រោះផ្សេងៗ
។ទន្ទឹមនឹងនោះ លោក ម៉ម ប៊ុនហេង រដ្ឋមន្ត្រីក្រសួងសុខាភិបាល បានអំពាវនាវដល់ប្រជាពលរដ្ឋ និងយុវជនទាំងអស់ដែលមានសុខភាពល្អមាំមួន នាំគ្នាចូលរួមបរិច្ចាគឈាមដើម្បីប្រើប្រាស់ជាប្រយោជន៍ជួយសង្គ្រោះអ្នកជំងឺដែលត្រូវការឈាម។
ប្រធានមជ្ឈមណ្ឌលជាតិផ្តល់ឈាមលោកវេជ្ជបណ្ឌិត ហុក គីមចេងបានកោតសរសើរដល់សមាគមនិស្សិតនិងនិស្សិតដែលបានបរិច្ចាគឈាមដោយលោកបញ្ជាក់ថា «ថ្ងៃនេះគឺជាព្រឹត្តិការណ៍ដ៏ធំនិងថ្មីម្តងទៀតដែលសាកលវិទ្យាល័យវិទ្យាសាស្រ្តសុខាភិបាលបានសហការណ៍ជាមួយខាងមជ្ឈមណ្ឌលជាតិផ្តល់ឈាមអង្គការសុភាពពិភពលោក និងសាកលវិទ្យាល័យណាហ្គាសាគីរបស់ប្រទេសជប៉ុន ក្នុងការរៀបចំទិវាបរិច្ចាគឈាមនេះឡើង»។
ដោយឡែក លោកសាស្រ្តាចារ្យ សាផុន វឌ្ឍនៈសាកលវិទ្យាធិការសាកលវិទ្យាល័យវិទ្យាសាស្រ្តសុខាភិបាលបានថ្លែងឲ្យដឹងដែរថានេះជាលើកទី២ហើយក្នុងព្រឹត្តិការណ៍បរិច្ចាគឈាមដោយស្ម័គ្រចិត្តនិងមិនគិតកម្រៃនៅសាកលវិទ្យាល័យរបស់លោកហើយតែងតែមានការរៀបចំទិវាបរិច្ចាគឈាមពីរដងក្នុងឆ្នាំគឺនៅខែមិថុនានិងខែធ្នូជាពិសេសនៅក្នុងឆ្នាំ២០១៣ នេះតែម្តង។
លោកបានបន្ថែមទៀតថា «ដំបូងឡើងនៅឆ្នាំ២០០៩យើងមាននិស្សិតបរិច្ចាគឈាមបានតែ១៣៧នាក់តែតួរលេខនេះមានការកើនឡើងជាលំដាប់រហូតមកឆ្នាំ២០១៣ ខែមិថុនាគឺមានចំនួនរហូតដល់៣២៩នាក់។ សរុបទៅខាងសាកលវិទ្យាល័យយើងព្យាយាមជំរុញឲ្យមានការបរិច្ចាគឈាមស្ម័គ្រចិត្តពីក្រុមនិស្សិតយ៉ាងហោចណាស់៦០០នាក់ ក្នុង១ឆ្នាំៗ។
បើយោងតាមរបាយការណ៍របស់មជ្ឈមណ្ឌលជាតិផ្ដល់ឈាមបង្ហាញថាបច្ចុប្បន្នមជ្ឈមណ្ឌលជាតិ ត្រូវការឈាមប្រហែល ២៥០០ផ្លោកដើម្បីបំពេញតម្រូវការឈាមប្រចាំខែ។រីឯចំនួននៃអ្នកបរិច្ចាគឈាមនៅប្រទេសកម្ពុជានោះ មានចំនួនតិចតួចនៅឡើយដោយសារតែក្នុងចំនួនមនុស្ស១ពាន់នាក់ ត្រូវបានគេឃើញថា មានតែ៣នាក់ប៉ុណ្ណោះបានស្មគ្រ័ចិត្តផ្ដល់ឈាម៕ ដោយ ៖ ភីនរ៉ា