ភ្នំពេញ៖ រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុបានអះអាងថា ប្រព័ន្ធគណនេយ្យមួយអាចរឹងមាំបាន ទាល់តែក្នុងស្ថាប័ននីមួយៗ​មានគណនេយ្យករដែលមានគុណវុឌ្ឍ ចូលរួមចំណែកធ្វើអោយមានតម្លាភាព គណនេយ្យភាព និងការទទួលខុស​ត្រូវនៅក្នុង​កា​រ​គ្រប់គ្រងហិរញ្ញវត្ថុ ទាំងវិស័យឯកជន និងសាធារណៈ។ដើម្បីបង្កើនទំនុកចិត្តពីវិនិយោគិនទាំងក្នុងនិងក្រៅប្រទេស ចំពោះ​បរិយា​កាស​អាជីវកម្មនៅកម្ពុជា។រដ្ឋាភិបាលយល់ឃើញថា វិស័យគណនេយ្យនិងសវនកម្មផ្តល់ក្រ​ប​​ខណ្ឌនៃការបង្កើត ព័ត៌មាន​ហិរញ្ញ​វត្ថុ​ដ៏សំខាន់ចាំបាច់នៅក្នុងវិស័យនានានៃសេដ្ឋកិច្ច។

ថ្លែងក្នុងសិក្ខាសាលារបស់សហព័ន្ធគណនេយ្យករអាស៊ានលើកទី១៨កាលពីព្រឹកមិញ លោកស្រី ងួន សុខា រដ្ឋលេខាធិការ​ក្រសួង​​សេដ្ឋកិច្ច និងហិរញ្ញវត្ថុ បានមានប្រសាស​ន៍ថា រដ្ឋាភិបាលនឹងតម្រូវអោយគ្រប់អង្គភាពអាជីវកម្មពាក់ព័ន្ធ រៀបចំរបាយ​ការណ៍​ហិរ​ញ្ញ​វត្ថុរបស់ខ្លួន ស្របតាមក្របខណ្ឌនៃការ រាយការណ៍ហិរញ្ញវត្ថុតែមួយដែល​នឹងបង្កលក្ខណៈងាយស្រួល​ក្នុងការ​ប្រៀបធៀបព័ត៌មានហិរញ្ញវត្ថុចំពោះគ្រប់វិស័យទាំងក្នុងនិងក្រៅប្រទេស។

លោកស្រីបានបញ្ជាក់ថា ក្របខណ្ឌគណនេយ្យបែបនេះបានកើតមាន តាំងពីដើមឆ្នាំ២០០០ ហើយច្បាប់ស្តីពីគណនេយ្យ​សហគ្រាស សវនកម្មគណនេយ្យសហគ្រាស និងវិជ្ជាជីវៈគណនេយ្យ ត្រូវបានអនុម័ត និងដាក់អោយអនុវត្តតាំងពីឆ្នាំ២០០២។ដោយឡែកច្បាប់និងវិធាន នានារបស់ក្រសួងសេដ្ឋកិច្ច និងហិរញ្ញវត្ថុបានតម្រូវអោយសហ​គ្រាសទាំងអស់រៀប​ចំរបាយការណ៍​ហិរញ្ញវត្ថុប្រចាំឆ្នាំរបស់ខ្លួន ស្របតាមស្តង់ដារគ​ណនេយ្យកម្ពុជាដោយផ្អែកលើស្តង់ដារគណនេយ្យអន្តរជាតិ។

មិនតែប៉ុណ្ណោះ ច្បាប់នេះក៏បានបង្កើត និងកំណត់ក្របខណ្ឌសម្រាប់ធ្វើសវនកម្មសហគ្រាសអាជីវកម្មនៅកម្ពុជាផងដែរ។គួរបញ្ជាក់ថា សិក្ខាសាលានេះ មានការចូលរួមពីតំណាងប្រទេសអាស៊ានទាំង១០ បូកនិងអូ​ស្រ្តាលី អាមេរិក និងតំណាង​ស្ថាប័នឯកជននានានៅក្នុងប្រទេសកម្ពុជា៕ ដោយ ៖ រតនា