ភ្នំពេញ៖ ដើម្បីធានាបានប្រសិទ្ធិភាពឆ្លើយតបនឹងតម្រូវការកំណែទម្រង់ស៊ីជម្រៅក្នុងអាណ​ត្តិទី៥នេះ រាជរដ្ឋាភិបាល កម្ពុជា កំពុង ត្រូវកា​​រអ​នុសាសន៍ពីអង្គការមូលនិធិរូបិយវត្ថុអន្តរជាតិ ជាពិសេសចំពោះគោលនយោបាយសេ​ដ្ឋកិច្ច និងហិរញ្ញវត្ថុ ដើម្បីធានាសិ្ថរ​ភាព​ម៉ាក្រូសេដ្ឋកិច្ច យុទ្ធសាស្ត្រគៀងគរចំណូល កំ​ណែ​​ទម្រង់សេដ្ឋកិច្ច និងហិរញ្ញវត្ថុសាធារណៈ​និង​កំណែទម្រង់​ផ្នែកធនា​គារ​ជា​ដើម។​

ថ្លែងក្នុងជំនួបជាមួយលោកស្រី  Meral Karasula ប្រធានគណៈប្រតិភូអង្គការរូបិយវត្ថុអន្តរជាតិមកកម្ពុជា លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ បានមានប្រសាសន៍ថា រាជរដ្ឋាភិបាលកម្ពុជាកំពុងត្រូវកា​​រអ​នុសាសន៍ពីអង្គការមូល​និធិរូបិយ​វត្ថុ​អន្តរជាតិ ដើម្បីធានាបា​ន​នូវប្រសិទ្ធភាពក្នុងការអនុវត្តន៍កំណែទម្រង់មុខងារសាធារណៈ ដែលរដ្ឋាភិបាល​ត្រូវការបង្កើន​ខ្ទង់​ចំណាយ ជាពិសេសការតម្លើងប្រាក់បៀរ៍វត្សជូនមន្ត្រីរាជការ។រដ្ឋាភិបាលត្រូវគៀងគរចំណូលដែលអាចឆ្លើយតបនិងការចំណាយ ក្នុងនោះក្រសួងសេដ្ឋកិច្ចសេដ្ឋកិច្ច និងហិរញ្ញវត្ថុ​ក៏បានដាក់​ចេញ​​​នូវផែនការប្រមូលចំណូលប្រកបដោ​យ​មហិច្ឆតាដែល ក្នុងឆ្នាំ ២០១៤  ខាងមុខ ចំណូលត្រូវគ្រោ​ង​នឹងបង្កើនអោយ​បាន១.១​ភាគរយនៃផលិតផលសរុបក្នុងស្រុកបន្ថែមទៀត។

ឆ្លើយតបនិងតម្រូវការនេះ គណៈប្រតិភូរបស់អង្គការមូលនិធិរូបិយវត្ថុអន្តរជាតិសន្យានឹងសហការយ៉ាង ជិតស្និទ្ធជាមួយ​មន្ត្រី​បច្ចេក​ទេសកម្ពុជាក្នុងការវាយតម្លៃនូវតម្រូវការជាក់ស្តែងរបស់កម្ពុជា និងដើម្បីអោយការផ្តល់អនុសាសន៍​របស់គណៈប្រតិភូរបស់​អង្គការ​មូល​និធិរូបិយវត្ថុអន្តរជាតិមានលក្ខណៈជាក់ស្តែង និងល្អប្រសើរ។គួរបញ្ជាក់ថា រាជរដ្ឋាភិបាលអាណត្តិទី៥នេះ បានដាក់ចេញ នូវ យុទ្ធសាស្ត្រចតុកោ​ណ ដំណាក់កាលទី៣ ក្នុងគោលដៅដើម្បី កំណើនការងារ សមធម៌ ដល់ប្រជាព​លរដ្ឋ​​នៅទូទាំងប្រទេស៕ ដោយ៖ រតនា