ភ្នំពេញ៖ ដោយឈរលើកកត្តានៃការផលិតផ្តោតលើគុណភាពជាចម្បងពីមួយឆ្នាំទៅមួយឆ្នាំ វិស័យភាពយន្តរបស់កម្ពុជា បានងើបឡើងវិញ និងមានការគាំទ្រគួរឲ្យកត់សម្គាល់ ហើយបានឈានជើងដើរចូលយ៉ាងសន្សឹមៗទៅរកការប្រគួតប្រជែងនៅក្នុងទីផ្សារភាពយន្ត ក្នុងតំបន់ និងសកលលោកនាពេលខាងមុខដ៏ខ្លីនេះ។នេះបើតាមការលើកឡើងរបស់ លោក ឃឹម សារិទ្ធ រដ្ឋលេខាធិការក្រសួងវប្បធម៌ និងវិចិត្រសិល្បៈថ្លែងនៅក្រោយពេលអញ្ចើញបើកសម្ពោធការចាក់បញ្ចាំងរឿង ព្រាយក្បាល៨ នៅរោងភាពយន្តចេនឡា កាលពីថ្ងៃសុក្រកន្លងទៅនេះ។ ដោយលោកបានមើលឃើញវិស័យភាពយន្ត ក្នុងស្រុកមានសន្ទុះងើបឡើងគួរឲ្យកត់សម្គាល់ តាមរយៈការផលិតភាពយន្តខ្នាតធំដែលអាច និយាយបានថា មានលក្ខណៈស្តង់ដាអន្តរជាតិជាបណ្តើរៗនឹងមានសង្ឃឹមអាចប្រគួតប្រជែង ជាមួយបណ្តាប្រទេសក្នុងតំបន់បាន។
.jpg)
លោក ឃឹម សារិទ្ធ បានលើកឡើងថា ចាប់ពីអំឡុងឆ្នាំ២០០០មក ការផលិតភាពយន្តរបស់ ផលិតករខ្មែរយើង ឃើញថាមានគុណភាព មានការទាក់ទាញមហាជន ទាំងក្នុងនិងក្រៅប្រទេស ក្នុងនោះមានផលិតកម្មមួយចំនួនបានឈានទៅផលិតខ្សែភាពយន្តខ្នាតធំបានជាច្រើនរឿងដើម្បីបំពេញចិត្តអ្នកទស្សនា ព្រមទាំងបាននាំចេញយកទៅលក់នៅក្រៅប្រទេសបានជាច្រើនទៀតផង។
ទាក់ទិនទៅនឹងការផលិតភាពយន្តមានគុណភាព របស់កម្ពុជា លោករដ្ឋលេខាធិការ បានសង្កត់ធ្ងន់ថា ការផលិតភាពយន្តបានល្អ មិនមែនមកពីកត្តាបុគ្គលនោះទេ គឺមានកត្តារួមផ្សំជាច្រើនដូចជា ធនធាន សម្ភារៈបច្ចេកទេស ការជ្រើសរើសតារាសម្តែងមានទេពកោសល្យ ចាងហ្វាងផលិតកម្មពួកែ ក្រុមបច្ចេកទេសមានជំនាញច្បាស់លាស់ អ្នកដឹកនាំរឿងមានភាពឈ្លាសវៃ ដោយសិក្សារៀនសូត្រ និងស្វែងរកការបណ្តុះបណ្តាលចំណេះដឹងលើផ្នែកនេះបន្ថែម ដើម្បីធានាឲ្យការផលិតរបស់យើងដើរឲ្យទាន់ភាពយន្តសម័យទំនើប ។ ពិសេសរាល់ការផលិតភាពយន្តគឺតម្រូវពីចិត្តមនុស្សទូទៅ កុំតម្រូវចិត្តខ្លួនឯង និងត្រូវគិតគូរពីវប្បធម៌ ប្រពៃណី ជំនឿ សាសនា រួមទាំងមានការសហការពីដៃគូរជាតិ និងអន្តរជាតិ ដើម្បីឲ្យភាពយន្ត របស់យើងមានចីរភាព។
លោក ឃឹម សារិទ្ធ បញ្ជាក់ថា កន្លងមកក្រសួងបានបណ្តុះបណ្តាលជំនាញលើវិស័យភាពយន្តនេះ ព្រមទាំងបានបង្កើតជាស្ទូតយោថតមួយកន្លែងនៅខេត្តកំពង់ស្ពឺ បើទោះជាវាមិនទាន់ ឆ្លើយតប និងមានលក្ខណៈស្តង់ដាអន្តរជាតិក៏ដោយ តែវាអាចជួយជ្រោមជ្រែងសម្រួលដល់ផលិតករទាំងអស់ថត ដោយមិនយកប្រាក់ និងមានឧបករណ៍មួយចំនួនអាចជួលឬ ខ្ចីបាន។
សូមជម្រាបថា រាជរដ្ឋាភិបាលបានជម្រុញដល់ក្រសួងវប្បធម៌ វិចិត្រសិល្បៈ ឲ្យយកចិត្តទុកដាក់លើកស្ទួយដល់ការផលិតភាពយន្តរបស់ផលិតកម្មក្នុងស្រុក ទាំងផ្នែកបច្ចេកទេស និងធនធានមនុស្ស ដើម្បីឲ្យការផលិតមានគុណភាព និងរក្សាបាននូវស្នាដៃភាពយន្តរបស់ខ្មែរ យើង៕ ដោយ ៖ ស.ស្អាត