ភ្នំពេញ៖ រដ្ឋាភិបាលជប៉ុនបានប្រកាសផ្តល់ជំនួយឥតសំណងប្រមាណកជាង៤សែនដុល្លា កាលពីរសៀលថ្ងៃទី២៦ ខែមិនា សម្រាប់គម្រោងសន្តិសុខមនុស្សជាតិ ដើម្បីលើកស្ទួយដល់វិស័យសុខាភិបាល។
នៅស្ថានទូតជប៉ុន កាលពីរសៀលថ្ងៃអង្គារសប្តាហ៍នេះ រដ្ឋាភិបាលជប៉ុនបានប្រកាសផ្តល់ទឹកប្រាក់ឥតសំណង ដល់កម្ពុជាសំរាប់គម្រោងចំនួន៤ ដោយផ្តោតទៅលើផ្នែកសុខាភិបាល ដែលគម្រោងទាំង នោះរួមមាន៖ គម្រោងកែលម្អអាគារវះកាត់ក្នុងមន្ទីរពេទ្យបង្អែកពារាំងខេត្តព្រៃវែង ទី២ គម្រោងបំពាក់ម៉ាស៊ីជំនួយការដកដង្ហើមក្នុងមន្ទីរពេទ្យកុមារអង្គរខេត្តសៀមរាប ទី៣គម្រោងសាងសង់អាគារជំងឺទូទៅ និងកុមារក្នុងមន្ទីរពេទ្យបង្អែកព្រៃកប្បាសខេត្តតាកែវ និងទី៤គម្រោងកែលម្អសុខភាពមាតា និងទារកតាមរយៈការពង្រឹងហេដ្ឋារចនាសម្ពន្ធ័សុខាភិបាលក្នុងខេត្តកំពង់ស្ពឺ។
លោកគូ ម៉ាម៉ារ៉ូយូជិ ឯកអគ្គរាជទូតវិសាមញ្ញ និងពេញសមត្ថភាពរបស់ប្រទេសជប៉ុនប្រចាំកម្ពុជាបានមានប្រសាសន៍ថា គំរោងទាំង៤ខាងលើនេះ មានគោលដៅផ្តល់ជូនប្រជាជនមូលដ្ឋាននៅតាមតំបន់គោលដៅនីមួយៗនូវសេវាសុខាភិបាលដែល មានគុណភាព ព្រោះវិស័យសុខាភិបាល គឺជាវិស័យអាទិភាពមួយសម្រាប់ការអភិវឌ្ឍប្រទេសកម្ពុជា។លោកបញ្ជាក់ថា៖«រដ្ឋាភិបាលជប៉ុនបាននិងកំពុងគាំទ្រដល់កិច្ចខិតខំប្រឹងប្រែងក្នុងការអភិវឌ្ឍប្រទេសកម្ពុជា តាមរយៈការផ្តល់ជំនួយឧបត្ថម្ភសម្រាប់គម្រោងជាច្រើនទៀត»។
លោកងួន ចន្ទ័ភត្រ្តា នាយករងមន្ទីរពេទ្យកុមារអង្គរ បានរំលឹកថា ដោយមានកិច្ចសហប្រតិបត្តិការល្អ និងមានការគាំទ្រពីរដ្ឋាភិបាល ក៏ដូចជាប្រជាជនជប៉ុន ក្នុងរយៈពេលកន្លងមក មន្ទីរពេទ្យកុមារអង្គរ បានទទួលជំនួយឥតសំនាងសម្រាប់គម្រោងមួយចំនួនរួមមានគម្រោងតំឡើងឧបករណ៍មន្ទីរពិសោធន៍ គម្រោងតំឡើងឡដុតកាកសំណល់វេជ្ជសាស្រ្ត គម្រោងតំឡើងម៉ាស៊ីនអគ្គីសនី និងកម្រោងកម្មវិធីការងារក្រៅមន្ទីរពេទ្យ និងគម្រោងផ្សេងៗដទៃទៀត ដែលបម្រើដល់ប្រសិទ្ធភាពនៃការផ្តល់សេវាសុខាភិបាលរបស់មន្ទីរពេទ្យ។
លោកលោកវេជ្ជបណ្ឌិត ហួតកល្យាណ ប្រធានការិយាល័យសុខាភិបាលស្រុកប្រតិបត្តិពារាំងបានមានប្រសាសន៍ថា សម្រាប់ គំរោងដែលបានចុះហត្ថលេខានាឱកាសនេះ គឺពិតជាមានអត្ថន័យសំខាន់ក្នុងការធ្វើឲ្យប្រសើរឡើងនូវគុណភាពនៃការផ្តល់សេវាសុខាភិបាល ជូនដល់ប្រជាពលរដ្ឋសំដៅកាត់បន្ថយអត្រាស្លាប់ឲ្យនៅកម្រិតទាបនៅក្នុងមន្ទីរពេទ្យបង្អែកពារាំង។ ដោយ៖ អភិរក្ស