ភ្នំពេញ៖ ក្នុងជំនួបទ្វេភាគីជាមួយលោកឧបនាយករដ្ឋមន្រ្តី ហោ ណាំហុង រដ្ឋមន្រ្តីក្រសួងបរទេសកម្ពុជា នៅព្រឹកថ្ងៃទី៣០ ខែ តុលានេះ ឯកអគ្គរដ្ឋទូតថ្មីអាល្លឺម៉ង់ប្រចាំកម្ពុជា សង្ឃឹមថា គណបក្សប្រជាជនកម្ពុជា និងគណបក្សសង្រ្គោះជាតិ បន្តការចរចាគ្នា ឲ្យបានឆាប់ដើម្បីដោះស្រាយការខ្វែងគំនិតគ្នាក្រោយការបោះឆ្នោតជាតិឆ្នាំ២០១៣។
មន្រ្តីអ្នកនាំពាក្យក្រសួងការបរទេសកម្ពុជា លោក កុយ គួង បានប្រាប់ក្រុមអ្នកសារព័ត៌មាននៅក្រោយជំនួបនោះថា លោក Joachim Baron von Marschall ដែលជាឯកអគ្គរដ្ឋទូតថ្មីអាល្លឺម៉ង់ប្រចាំកម្ពុជា បានបញ្ជាក់ថា បេសកកម្មការងាររបស់លោក គឺធ្វើយ៉ាងណាដើម្បីបន្តអភិវឌ្ឍនូវកិច្ចសហប្រតិបត្តិការរវាងប្រទេសទាំងពីរ ហើយដែលកន្លងមកនេះ អាល្លឺម៉ង់ បានផ្តោត សំខាន់ ជួយដល់កម្ពុជាលើវិស័យគ្រប់គ្រងដីធ្លី សុខាភិបាល និងវិស័យដោះមីនជាដើម។
លោក កុយ គួង បានបន្តថា ក្នុងបេសកកម្មការទូតរបស់លោកនៅកម្ពុជា លោក នឹងខិតខំពិនិត្យមើលពី សក្តានុពលផ្នែក សេដ្ឋកិច្ច ជាពិសេសការផ្លាស់ប្តូរពាណិជ្ជកម្មនៃប្រទេសទាំងពីរ ហើយលោកនឹងជំរុញឲ្យមានការផ្លាស់ប្តូរគណៈ ប្រតិភូធុរកិច្ចរ វាងប្រទេស ទាំងពីរដើម្បីពិនិត្យមើលពីសក្តានុពលវិនិយោគនៅក្នុងប្រទេសកម្ពុជា។
លោកឧបនាយករដ្ឋមន្រ្តី ហោ ណាំហុង រដ្ឋមន្រ្តីក្រសួងការបរទេសកម្ពុជា បានឲ្យដឹងដែរថា ការបោះឆ្នោត ជ្រើសតាំងតំណាង រាស្រ្ត នីតិកាលឆ្នាំ៥ ឆ្នាំ២០១៣ កន្លងទៅនេះ បានប្រកបដោយរលូន និងដោយសន្តិវិធី ដែលប្រជាពលរដ្ឋ ជាង៦០ ភាគរយបាន ចេញទៅបោះឆ្នោត ហើយបញ្ហាមួយចំនួនដែលបានកើតឡើង ក្រោយការបោះឆ្នោតត្រូវបានដោះស្រាយ រួចរាល់អស់ហើយ ដោយ គណៈកម្មាធិការជាតិរៀបចំការបោះ ឆ្នោតដែលស្ថាប័ននេះបង្កើត ឡើងច្បាប់នឹងមានការត្រួតពិនិត្យបន្ថែម ទៀតដោយ ក្រុមប្រឹក្សាធម្មនុញ្ញ ដែលជាស្ថាប័នកំពូលបង្កើតឡើងដោយច្បាប់ផងដែរ។
បើតាមលោកឧបនាយករដ្ឋមន្រ្តី ហោ ណាំហុង បានឲ្យដឹងថា គណបក្សប្រជាជនកម្ពុជាបើកទ្វាចំហរជានិច្ចត្រៀម ជួបចរចាគ្នាជា មួយគណបក្សសង្រ្គោះជាតិដើម្បីដោះស្រាយភាពខ្វែងគំនិតផ្សេងៗ ប៉ុន្តែការទាមទាររបស់គណបក្សប្រឆាំង ត្រូវតែធ្វើយ៉ាងណា ឲ្យសមហេតុផល និងគោរពច្បាប់ជាធរមាន៕ ដោយ៖ រតនា