ភ្នំពេញ៖ រដ្ឋាលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាជាតិគណនេយ្យ ចង់​ឱ្យមាន​ការ​ផ្លាស់ប្តូរកន្លែងការងាររវាងស្ថាប័នក្រុមប្រឹក្សាគណនេយ្យនិងអគ្គនាយកដ្ឋានពន្ធដារ នៅ​ពេ​ល​អនាគត ព្រោះថា ប្រព័ន្ធ​​នៃស្ថាប័នទាំងពីរនេះមិនខុសគ្នាឆ្ងាយទេ។ថ្លែងបើកសិក្ខាសាលាបណ្តុះបណ្តាល​​​​​​ស្តីពី«ស្តង់ដារគណនេយ្យ​​​​សម្រាប់វិស័យសាធារណៈ កា​លពី​ព្រឹក​មិ​ញ លោក ងី តាយី រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ បានមាន​​​​​ប្រ​សា​សន៍​​ថា យើងចាប់យកដៃគូជាមួយស្ថាប័នគណនេយ្យ ICAEW នៃចក្រភពអង់គ្លេស នៅ​ពេល​នេះ ក្នុងគោល​​​បំណង​ដើម្បីឱ្យយើង​មា​​ន​ជំ​នាញគ្រប់គ្រា​ន់ស្របតាមប្រព័ន្ធស្តង់ដារដែលពិភពលោ​កកំពុងប្រើជាសាកល ទាំងក្នុង​ក្រប​ខណ្ឌរដ្ឋ និងវិស័យឯកជន។

ហើយអ្វី​ដែល​យើ​ង​កាន់​តែ​ចង់បានទៀតនោះ គឺមន្ត្រីនៃស្ថាប័នក្រុមប្រឹក្សាគណនេយ្យនិងអគ្គនាយកដ្ឋានពន្ធដារអា​ច​ផ្លាស់ប្តូរតំណាងគ្នា ដើម្បីជួយគ្នាទៅវិញទៅមកក្នុងការបម្រើជាតិ ខាងវិស័យគណ​នេ​យ្យ​និង​ពន្ធ​ដារ។លោក បញ្ជាក់​​ថា ក្នុងឆាកជីវិតយើងមិនមែននៅក្នុងនាយកដ្ឋានព​ន្ធដារ ឬនាយ​កដ្ឋា​នក្រុ​ម​ប្រឹក្សា​រហូត​នោះទេ។លោក គ្រោងនឹង​ធ្វើ​​​​សំណើរនេះដាក់ទៅថ្នាក់ដឹកនាំ ដើម្បី​ធ្វើ​កា​រពិ​ចរណាផងដែរ។ លោកបានធ្វើការកត់សម្គាល់ថា កិច្ចសហប្រតិបត្តិ​កា​រជាមួយស្ថា​ប័ន​គណនេយ្យ​អង់​គ្លេស នឹងកាន់តែមានការរីកចម្រើនវិជ្ជាជីវៈគណនេយ្យ សវនកម្ម និងហិរញ្ញ​វត្ថុ​ក្នុង​កា​រលើ​ក​​ស្ទួ​យ និងអភិវឌ្ឍន៍សេដ្ឋកិច្ចជាតិ។ លោក ខូយ គឹមឡេង ប្រធានវិទ្យាស្ថានគ​ណ​នេ​យ្យ​ករជំនាញ និង​​​សវនករ​​​​​​​​កម្ពុជា បានមានប្រសាសន៍ថា ស្ថាប័នគណនេយ្យកម្ពុជា នឹងធ្វើ​ការ​ជាមួយគ្នា ដោយឈរលើផល​​​​​​​​​​​ប្រយោជន៍​​​​​​​​​​​ទៅវិញទៅមក លើគំនិតផ្តួចផ្តើមនានា ដែលពា​ក់ព័ន្ធ​ជាមួយនឹង​ការអប់រំ ការប​ណ្តុះបណ្តាលវិជ្ជាជីវៈ និង​ការសិក្សាស្រាវជ្រាវ។ គួរបញ្ជាក់ថា ក្នុងសិក្ខាសាលាស្តង់ដារគណនេយ្យសម្រាប់វិស័យសាធារណៈនោះ មាន​អ្ន​ក​ចូ​ល​​​រួ​មប្រមា​ណ១៥០នាក់ ភាគច្រើនមកក្រសួងសេដ្ឋកិច្ច និងហិរញ្ញវត្ថុ៕

ដោយ៖ រតនា