ភ្នំពេញ៖ ក្រសួងផែនការបានអញ្ជើញគ្រប់តំណាង ក្រសួងស្ថាប័នរដ្ឋ ដើម្បីពិភាក្សាទៅលើស្នាដៃវឌ្ឍនភាពឆ្នាំ២០១៣ ក្នុងផែន ការអនុវត្តការងារចំនួន៩ ដែលជាគោលដៅអភិវឌ្ឍន៍សហស្សវត្សរ៍កម្ពុជាឆ្នាំ២០១៥ ដើម្បីយកទៅរាយការណ៍នៅអង្គការសហប្រជាជាតិនៅចុងឆ្នាំនេះ។កិច្ចប្រជុំធ្វើរបាយការណ៍អំពីស្នាដៃវឌ្ឍនភាពឆ្នាំ២០១៣ ដើម្បីយកទៅរាយការណ៍នៅអង្គការសហប្រជាជាតិនៅថ្ងៃទី ២៨ តុលា ២០១៣ នេះ។
មន្រ្តីរដ្ឋាភិបាលបានបង្ហាញថា កម្ពុជាបានធ្វើឲ្យការងារចំនួន៥ ក្នុងចំណោម៩ បានអនុវត្តន៍សម្រេចបានតាមផែនការ ដែលនៅក្នុងនោះ គឺ ការងារកាត់បន្ថយភាពក្រីក្រ។លោក ប៉ុច សុវណ្ណឌី អគ្គនាយករងផែនការ បានមានប្រសាសន៍ នៅក្នុងការធ្វើសេចក្តីព្រៀងរបាយការណ៍ សម្រាប់ដាក់ជូន អង្គការសហប្រជាជាតិថា ការងារកាត់បន្ថយភាពក្រីក្រ ក្នុងចំណោម ប្រជាពលរដ្ឋ ធ្វើបានលទ្ធផលល្អ។
បើយោងតាមរបាយការណ៍គ្រោងផ្ញើជូនទៅអង្គការសហប្រជាជាតិបានបញ្ជាក់ថា អត្រានៃភាពក្រីក្ររបស់ប្រជាពលរដ្ឋកម្ពុជាត្រូវបានកាត់បន្ថយមកនៅត្រឹមក្រោម១៩,៥ភាគរយ ហើយស្ថានភាពប្រជាពលរដ្ឋ ដែលរស់នៅក្រោមភាពអត់ឃ្លាន បានកាត់បន្ថយ ឲ្យមកនៅត្រឹមកម្រិត ទាបជាង១០ភាគរយ។ ជាមួយគ្នានេះ ការប្រើប្រាស់របស់ប្រជាពលរដ្ឋក្រីក្រជាងគេ ដែលមាន២០ភាគរយ បានចុះមកនៅកម្រិត១១ភាគរយ។ របាយការណ៍នេះ បានបញ្ជាក់ទៀតថា នៅភ្នំពេញមានអត្រាក្រីក្រជាមធ្យមតែ ៣,១ភាគរយ ខេត្តកំពង់ស្ពឺចំនួន១៧,៥ភាគរយ ខេត្តស្វាយរៀង ១៤,៣ភាគរយ និងខេត្តរតនៈគិរី ២៨,៦ភាគរយ។
របាយការណ៍ដដែលបានឲ្យដឹងទៀតថា មានប្រជាពលរដ្ឋប្រមាណ៥០ភាគរយ បានចំណាយលើការប្រើប្រាស់ចន្លោះពី១០០ទៅ៣០០ពាន់រៀលក្នុង១ខែៗ។គួរបញ្ជាក់ថា ការងារចំនួន៥ ក្នុងចំណោម៩ នៃ គោលដៅអភិវឌ្ឍន៍សហស្សវត្សរ៍គឺ កម្ពុជាសម្រេចបានជោគជ័យ ក្នុងការអនុវត្តរហូតដល់ឆ្នាំ២០១៥ ដូចជា ការងារកាត់បន្ថយភាពក្រីក្រ ការងារឲ្យកុមារបានរៀនចប់ថ្នាក់ទី៩ការងារយេនឌ័រ ការងារកាត់បន្ថយអត្រាមរណភាពទារក និង ការងារកាត់បន្ថយអត្រាមរណភាពមាតា៕ ដោយ៖ មករា