ភ្នំពេញ ៖ សម្ព័ន្ធគណនេយ្យភាព សង្គមអាស៊ីបូព៌ា និងបាស៊ីហ្វិក (ANSA-EAP) សម្ព័ន្ធដើម្បីសុចរិតភាព និងគណនេយ្យសង្គម (CISA) និងវិទ្យាស្ថានខ្មែរសម្រាប់អភិវឌ្ឍន៍ជាតិ (KIND) បានសម្ដែងនូវការសាទរចំពោះប្រសាសន៍របស់លោក ឱម យ៉ិនទៀង ប្រធានអង្គភាពប្រឆាំងអំពើពុករលួយដែលស្វាគមន៍និងផ្តល់ឱកាសដល់ អង្គការសង្គមស៊ីវិល និងវិស័យឯកជនឱ្យចូលរួមសង្កេតមើលភាពមិនប្រក្រតី(អំពើពុករលួយ) ក្នុងពេលប្រឡងសញ្ញាបត្រមធ្យមសិក្សាទុតិយភូមិ ក្នុងឆ្នាំ២០១៤នេះ ។
.jpg)
យោងតាមសេចក្ដីថ្លែងការណ៍របស់អង្គការសង្គមស៊ីវិល ខាងលើ ចុះថ្ងៃទី២៤ មីនា ឆ្នាំ២០១៤ បានលើកឡើងទៀតថា ក្នុងនាមអង្គការសង្គមស៊ីវិល ដែលបំពេញការងារលើកកម្ពស់អភិបាលកិច្ចល្អ និងប្រឆាំងអំពើពុករលួយ សូមសម្ដែងនូវជំហរគាំទ្រ និងចូលរួមជាមួយអង្គភាពប្រឆាំងអំពើពុករលួយ និងក្រសួងអប់រំយុវជន និងកីឡា ដើម្បីបង្កើននូវតម្លាភាពនិងគុណភាពនៅក្នុងវិស័យនេះឲ្យកាន់តែមានភាពសុក្រិត និងទូលំទូលាយថែមទៀត ។ អង្គការសង្គមស៊ីវិលដែលធ្វើការពាក់ព័ន្ធវិស័យខាងលើ បានសម្ដែងនូវការកោតសរសើរដល់ការខិតខំប្រឹងប្រែងរបស់អង្គភាពនេះ ក្នុងការប្រយុទ្ធប្រឆាំងអំពើពុករលួយនាពេលកន្លងមក ។ ទោះជាយ៉ាណាក៏ដោយ តាមការសង្កេតរបស់យើងឃើញថា ការចាត់វិធានការទៅលើអំពើពុករលួយដែលពាក់ព័ន្ធអ្នកមានអំណាច ថ្នាក់ខ្ពស់ និងក្រុមគ្រួសារហាក់មិនទាន់មានផ្លែផ្កា ហើយក៏មិនទាន់ទទួលបានការទាក់ទាញចំណាប់អារម្មណ៍ ពីសាធារណជននៅឡើយដែរ ។
យ៉ាងណាក៏ដោយក្រុមអង្គការសង្គមស៊ីវិលទាំងនេះ បានស្នើដោយទទូចដល់អង្គភាពប្រឆាំងអំពើពុករលួយមិនត្រឹម តែផ្តោតការយកចិត្តទុកដាក់ទៅលើវិស័យអប់រំតែមួយមុខប៉ុណ្ណោះទេ គឺគួរតែដាក់ចេញនូវគោលការណ៍បន្ថែមដោយអនុញ្ញាតឲ្យអង្គការសង្គម ស៊ីវិលអាចចូលរួមតាមដានការអនុវត្តគម្រោងនានារបស់រដ្ឋ រួមមាន៖ គម្រោងកសាងហេដ្ឋារចនាសម្ព័ន្ធធំៗ គម្រោងផ្តល់សេវាសុខភាព ការផ្តល់សម្បទានធនធានធម្មជាតិ និង ការផ្តល់សេវារដ្ឋបាលសាធារណៈជាដើម ព្រោះថា វត្តមាននៃការតាមដានរបស់អង្គការសង្គមស៊ីវិលអាចរួមចំណែកជា ប្រយោជន៍ ដើម្បីជំរុញឲ្យសេវាទាំងនោះមានតម្លាភាព គណនេយ្យភាព ប្រសិទ្ធភាព និងលើកកម្ពស់ផលប្រយោជន៍សាធារណៈ និងយុត្តិធម៌សង្គម ពិសេសបន្ថែមការចាប់អារម្មណ៍ និងការគាំទ្រកាន់តែខ្លាំងថែមទៀត ពីស្រទាប់ប្រជាជន៕
ដោយ៖ សស្អាត