សៀមរាបៈ នៅព្រឹកថ្ងៃទី១៩ ខែមីនា ឆ្នាំ២០១៤ លោក សាយ សំអាល់ រដ្ឋមន្ត្រីក្រសួងបរិស្ថាន បានអញ្ជើញជាអធិបតី ក្នុងពិធីបើកកិច្ចប្រជុំអន្តររដ្ឋាភិបាល និងក្រុមអ្នកវិទ្យាសាស្ត្រតំបន់អាស៊ី-ប៉ាស៊ីហ្វិក លើកទី១៩ របស់បណ្តាញសិក្សាស្រាវជ្រាវបម្រែបម្រួលសកលអាស៊ី-ប៉ាស៊ីហ្វិក (APN) នៅសណ្ឋាគារបុរីអង្គរ ក្នុងខេត្តសៀមរាប។នេះជាលើកទីមួយហើយ ដែលកម្ពុជាបានទទួលរៀបចំកិច្ចប្រជុំថ្នាក់តំបន់អាស៊ីប៉ាស៊ីហ្វិកក្នុងក្របខ័ណ្ឌការងារស្រាវជ្រាវវិទ្យាសាស្ត្រលើវិស័យបរិស្ថាន ជីវ:ចម្រុះ និងការប្រែប្រួលអាកាសធាតុ។ អញ្ជើញចូលរួមក្នុងឱកាសនោះ មានថ្នាក់ដឹកនាំក្រសួងបរិស្ថាន តំណាងអាជ្ញាធរខេត្ត គណ:ប្រតិភូនៃបណ្តាប្រទេសក្នុងតំបន់អាស៊ីប៉ាស៊ីហ្វិក អ្នកវិទ្យាសាស្ត្រ អ្នកស្រាវជ្រាវ និងអ្នកជំនាញបរិស្ថាន និង តំណាងក្រសួងស្ថាប័នពាក់ព័ន្ធមួយចំនួន។
សូមបញ្ជាក់ថា គោលបំណងសំខាន់នៃកិច្ចប្រជុំនេះ គឺដើម្បីពិនិត្យវាយតម្លៃការអនុវត្តគម្រោងក្នុងរយ:កាលកន្លងមក ក៏ដូចជាពិនិត្យសម្រេចលើសំណើថ្មីៗសម្រាប់ផែនការសកម្មភាពក្នុងឆ្នាំបន្ទាប់ សំដៅលើកកម្ពស់ការយល់ដឹងអំពីបញ្ហានានាពាក់ព័ន្ធវិស័យបរិស្ថាន ការប្រែប្រួលអាកាសធាតុ តាមរយ:ការពង្រឹងកិច្ចសហការរវាងអ្នកធ្វើគោលនយោបាយនិងអ្នកស្រាវជ្រាវវិទ្យាសាស្រ្ត ក៏ដូចជាការជំរុញនិងលើកទឹកចិត្តឱ្យអ្នកវិទ្យាសាស្ត្រជំនាន់ក្រោយ បានចូលរួមកាន់តែសកម្មថែមទៀត នៅក្នុងសកម្មភាពស្រាវជ្រាវអំពីការប្រែប្រួលអាកាសធាតុទាំងក្នុងតំបន់និងពិភពលោក៕ ដោយ៖ ភីនរ៉ា