ភ្នំពេញ៖ បើនិយាយទៅពីថ្ងៃមួយទៅមួយថ្ងៃ ពីមួយយប់ទៅមួយយប់ គេតែងតែសង្កេតឃើញនូវ សេវាកោសជប់មានទល់ៗភ្លឺក្នុងរាជធានីភ្នំពេញ និងតាមទីរួមខេត្តសំខាន់ៗមួយចំនួនទៀត។ មិនថាផ្លូវក្នុង ឬផ្លូវក្រៅអីទេ សូម្បីតែតាមផ្លូវធំៗមួយចំនួនក៏មានសេវាកោសជប់បើកយ៉ាងព្រោងព្រាតពីព្រឹកទល់យប់ ពីយប់ទល់ព្រឹកដោយស្ថិតនៅក្រោមដំបូលសេវាកម្មរកស៊ីផ្លូវភេទ។
បើនិយាយពីសេវាកម្មកោសជប់ដែលបម្រើទាំងថ្ងៃទាំងយប់នោះ ជាពិសេសក្នុងមួយយប់ៗ បើករហូតទល់ភ្លឺក៏មាន ហើយប្រ ហែលពេលយប់មានអ្នកឈឺច្រើនហើយមើលទៅ។ តែអាចដែរ ព្រោះពេលយប់មានហាងផឹកស៊ីបើកគ្រប់កន្លែង អ្នកស្រវឹងអាចមានច្រើន គឺថាចេញពីផឹកចូលកោសជប់ឲ្យស្វាងស្រាក៏ថាបាន។និយាយចឹងក៏ និយាយទៅចុះ។ តែតាមការសម្គាល់ និងមើលឃើញពីក្រៅទៅកន្លែងកោសជប់ដែលបើកមួយយប់ៗពេញៗនោះភាគច្រើនអ្នកផ្ដល់សេវាជានារីក្មេងៗធ្វើខ្លួនស្អាតៗ ស្លៀកខ្លីៗ ស៊ិចស៊ី បញ្ចេញលើ បញ្ចេញក្រោម គឺថាបើមិនឈឺក៏ចង់ឈឺដែរ។
ក្រៅពីបង្ហាញភាពដ៏ស៊ិចស៊ីរបស់ពួកនាងៗ ចេញមកអង្គុយខាងក្រៅផ្ទះកោសជប់របស់ខ្លួនឲ្យបណ្ដាបុរសៗឆាប់មើលឃើញទៀតផង ក្រៅពីខាងមុខផ្ទះដាក់ស្លាកយីហោថាកោសជប់ និងម៉ាស្សាក្ដី។ ហេតុអីក៏ចាំបាច់ចេញមកបង្ហាញខ្លួនឲ្យគេឃើញ? កន្លែងខ្លះទៀត នាងៗចេញមកឈរទាំងហ្វូងៗតាមចិញ្ចើមផ្លូវ និងកណ្ដាលផ្លូវក៏មានដែរ។ នេះពិតជាពូកែធ្វើទីផ្សារមែន មិនចាញ់អ្នករៀនជំនាញទីផ្សារនោះទេ។ ថែមពីលើនេះទៀត ពួកនាងធ្វើឫកធ្វើពារកាច់ ឫកកាច់រាង ពេលឃើញបុរសៗឆ្លងកាត់ទីតាំងរបស់ខ្លួន។ កន្លែងភាគច្រើនពួកនាងៗ លេងបៀរទាំងវង់ៗ បង្អួតសម្រស់ទាក់បងប្រុសៗ។ យ៉ាងនេះហើយ ទើបមហាជនលោកអាចធ្វើការសនិ្នដ្ឋានបានថា សេវាកម្មកោសជប់នៅរាជធានីភ្នំពេញទល់ភ្លឺ នៅតែស្ថិតក្រោមដំបូលសេវាកម្មផ្លូវភេទ។
មហាជនទូទៅសូមជួយគិតគ្នាមើលថា តើពិតជាកន្លែងកោសជប់ និងម៉ាសាពិតប្រាកដមែនទេ? ឫគេគ្រាន់តែដាក់ស្លាកបាំងមុខ ឯសេវាពិតប្រាកដគេផ្ដល់អ្វីផ្សេង? ការលើកយករឿងនេះមកនិយាយពុំមែនបំបែកឆ្នាំងបាយអ្នកប្រកបរបរពិតប្រាកដនោះទេ។ ប៉ុន្តែបើមិនពិតប្រាកដវិញ អាចមានរឿងច្រើនណាស់កើតចេញពីការបិទបាំងនេះ ពោលគឺអាចមានការប្រព្រឹត្តរកស៊ីផ្លូវភេទ, ការជួញដូរភេទ, ការជួញដូរមនុស្ស និងអាចជាជង្រុករបស់អ្នកប្រព្រឹត្តបទល្មើសក៏ថាបានដែរ។
ទាក់ទងនឹងបញ្ហាសេវាកម្មមួយនេះ គឺវាផ្ទុយទៅនឹងនយោបាយភូមិ/ឃុំសុវត្ថិភាពរបស់រាជរដ្ឋាភិបាល ដែលប៉ុន្មានជា៩ចំនុចសំខាន់ៗ ដើម្បីឱ្យមន្ត្រីថ្នាក់ក្រោមអនុវត្តន៍នៅតាមមូលដ្ឋានរបស់ខ្លួន មិនថាមន្ត្រី នគរបាល ឬមេឃុំលើការធានាធ្វើយ៉ាងណារក្សាសនិ្តសុខ សណ្តាប់ធ្នាប់ សុវត្ថិភាពដល់ប្រជាពលរដ្ឋដែល រស់នៅតំបន់នោះ ដោយមិនមានភាពភ័យខ្លាចរាល់ប្រការណាមួយ។ទោះបីយ៉ាងនេះក្តី ក្រុមប្រជាពលរដ្ឋក្នុងរាជធានីទាំងមូលស្នើសុំ និងអំពាវនាវដល់មន្ត្រីសាលារាជធានី-ខេត្ត, ស្នងការនគរបាល, អធិការខណ្ឌ-ស្រុក, ពិសេសនោះ ក្រសួងមន្ទីរពាក់ព័ន្ធគួរតែមានចាត់់វិធានការរឹតរ៉ឹង និងពិនិត្យពិច្ច័យពីរឿងនេះផងថា រាល់ការគ្រប់គ្រងទីតាំងកោសជប់ និងម៉ាស្សានេះដោយរបៀបណា ដើម្បីធានាថា ការរកស៊ីកោសជប់ ម៉ាស្សានេះ ស្របច្បាប់ត្រឹមត្រូវតាមលក្ខណៈពាណិជ្ជកម្ម ដោយមិនមានលាក់លាមផ្ដល់សេវាផ្លូវភេទនោះ៕ ដោយ៖ សេរីមករា