ភ្នំពេញៈ កាលពីព្រឹកថ្ងៃទី២០ ខែមករានេះ លោក សុខ ឈុនអឿន ប្រធានស្ដីទីសមាគមប្រជាធិបតេយ្យនៃសេដ្ឋកិច្ចក្រៅប្រព័ន្ធ ត្រូវបានស្នងការរាជធានីភ្នំពេញដោះលែងវិញហើយ បន្ទាប់ពីបានឃាត់ខ្លួនសាកសួរនៅស្នងការក្រុងភ្នំពេញ។ នេះបើតាមការឲ្យដឹងរបស់មន្ដ្រីស៊ើបអង្កេតអង្គការលីកាដូ។លោក សុខ ឈុនអឿន ទីប្រធានស្ដីទីសមាគមប្រជាធិបតេយ្យនៃសេដ្ឋកិច្ចក្រៅប្រព័ន្ធ ត្រូវបានចាប់ខ្លួននៅល្ងាចថ្ងៃអាទិត្យម្សិលមិញ ខណៈដែលលោកនិងសកម្មជនជាច្រើននាក់ផ្សេងទៀត កំពុងជួបជុំនៅមុខព្រះអង្គដងកើ ដើម្បីអុជធូប បួងសួងសុំឲ្យមានការដោះលែងសកម្មជនទាំង២៣នាក់។
លោកត្រូវបានក្រុមសមត្ថកិច្ចចម្រុះ ឃាត់ខ្លួន និងបញ្ជូនទៅសាកសួរនៅស្នងការនគរបាលរាជធានីភ្នំពេញអស់មួយយប់។គ្មានការបញ្ជាក់ណាមួយពីអាជ្ញាធរមានសមត្ថកិច្ចថា ការឃាត់ខ្លួនលោកសុខ ឈុនអឿន ធ្វើឡើងដោយសារមូលហេតុអ្វីឡើយ។គួរបញ្ជាក់ផងដែរថាក្រុមប្រឹក្សាឃ្លាំមើលកម្ពុជា(CWC) បានចេញសេចក្តីថ្លែងការណ៍ថ្កោលទោសយ៉ាងដាច់អហង្ការចំពោះការចាប់ខ្លួនលោក សុខ ឈុនអឿង នៅថ្ងៃទី ចន្ទ ទី ២០ មករានេះ។
ក្រុមប្រឹក្សាឃ្លាំមើលកម្ពុជា ក៏បានសង្កត់ធ្ងន់ថា សមត្ថកិច្ចពុំបានបង្ហាញដីកាដល់សាមីខ្លួន តាមនីតិវិធីច្បាប់ទេហើយបានចាត់ទុកថា ទង្វើរបស់សមត្ថកិច្ចរាជធានីភ្នំពេញ ជាការរំលោភច្បាប់ និងសិទ្ធិមនុស្សយ៉ាងធ្ងន់ធ្ងរជាទីបំផុតក្នុងអំទ្បុងប៉ុន្មានខែចុងក្រោយនេះ៕ ដោយ៖ ភីនរ៉ា