ភ្នំពេញ៖ អង្គភាពប្រឆាំងអំពើពុករលួយ បានរៀបចំពិធីលើកទី៣ និងទិវាអន្តរជាតិប្រឆាំងអំពើ ពុករលួយលើកទី១១ នឹងរៀបចំការប្រគំតន្ត្រី នៅមជ្ឈមណ្ឌលសហប្រតិបត្តិការកម្ពុជា-កូរ៉េ នៅក្នុងសកលវិទ្យាល័យភូមិន្ទភ្នំពេញ ចាប់ពីម៉ោង២រសៀល ដល់ម៉ោង ៦ ល្ងាច ថ្ងៃចន្ទ ទី៩ ខែធ្នូ ឆ្នាំ២០១៣ នេះ ។យោងតាមសេចក្តីជូនដំណឹងរបស់អង្គភាពប្រឆាំងអំពើពុករលួយបានលើកឡើងថា ការរៀបចំប្រគំតន្ត្រីអបអរទិវាជាតិ និងអន្តរជាតិ ប្រឆាំងអំពើពុករលួយ ថ្ងៃ៩ធ្នូ ឆ្នាំ២០១៣ដោយមានអ្នកដឹកនាំកម្មវិធី និងអ្នកដឹកនាំសិល្បៈល្បីៗមួយចំនួន រួមទាំងអ្នកចម្រៀងល្បីៗជាច្រើន ក្រុមរាំ និងក្រុមកំប្លែង នាយ បែកមី ក៏បានត្រៀមខ្លួនជាស្រេច ដើម្បីសំដែងជូនក្នុងកម្មវិធីប្រគំតន្ត្រីប្រឆាំងអំពើពុករលួយ ។
សេចក្តីដដែលបានបញ្ជាក់ថា ដើម្បីសារទរទិវាប្រឆាំងអំពើពុករលួយ ថ្ងៃ៩ធ្នូនេះ សម្តេចនាយករដ្ឋមន្ត្រី ហ៊ុន សែន ក៏បានថ្លែងសារ ដោយប្តេជ្ញាជាថ្មីម្តង ទៀតថា នឹងគាស់រំលើងអំពើពុករលួយនៅកម្ពុជា ឱ្យខានតែបាន ហើយបានរំលឹកឱ្យមន្ត្រីរដ្ឋាភិបាលឆ្លុះកញ្ចក់ ដុះក្អែលខ្លួនឯងឱ្យបានស្អាត ។ចំពោះមុខការសន្យាដដែលៗរបស់រដ្ឋាភិបាលត្រូវបានលោក សុក សំអឿន ប្រធានសម្របសម្រួលសម្ព័ន្ធអង្គការ ដើម្បីសុចរិតភាព និងគណនេយ្យភាពសង្គម បានបញ្ជាក់ថា ថ្នាំដ៏ស័ក្តសិទ្ធិសម្រាប់ព្យាបាលជំងឺពុករលួយនៅកម្ពុជា គឺឆន្ទៈពិតប្រាកដ និងបច្ចេកទេសគ្រប់គ្រាន់របស់រដ្ឋាភិបាល ។កាលពីថ្ងៃទី៣ធ្នូ អង្គការតម្លាភាពអន្តរជាតិ បានប្រកាសនូវលទ្ធផលស្រាវជ្រាវ របស់ខ្លួន ដែលបង្ហាញថា កម្ពុជា ស្ថិតនៅលំដាប់ថ្នាក់ទី១៦០ក្នុងចំណោមប្រទេស១៧៧លើពិភពលោក ផ្នែកកើតមានអំពើពុករលួយ ៕ ដោយ៖ ភីនរ៉ា