ភ្នំពេញ៖ លោករដ្ឋមន្ត្រីក្រសួងទេសចរណ៍បានស្នើឲ្យក្រុមអ្នកធ្វើអាជីវកម្មគួរតែគិតគូរពីការសន្សំសំចៃថាមពលលើការអនុវត្តវិស័យឧស្សាហកម្ម បៃតងនៅកម្ពុជា។ ព្រោះថា ឧស្សាហកម្មបៃតង គឺជាពាក្យបច្ចេកទេសដែលសំដៅទៅលើការជួយថែរក្សាបរិស្ថានដោយ ការកាត់បន្ថយរាល់អំពើដែលធ្វើឱ្យ ខូចបញ្ហាបរិស្ថាន។
នេះយោងទៅតាមប្រសាសន៍របស់លោកបណ្ឌិត ថោង ខុន រដ្ឋមន្ត្រីក្រសួងទេសចរណ៍កាលពីព្រឹកថ្ងៃ២៦ វិច្ឆិកា ២០១៣នេះ ក្នុងសិក្ខាសាលាស្ដីពីការស្វែងយល់អំពីទស្សនៈវិស័យ សម្រាប់ប្រសិទ្ធិភាពថាមពលក្នុងប្រទេសកម្ពុជា និងឥណ្ឌូចិន ដើម្បីពិភាក្សាអំពីរបៀបដែលក្រុមហ៊ុនអាជីវកម្ម ក្នុងស្រុក អាចប្រើប្រាស់អ្វីដែលគេហៅថា «ក្រុមហ៊ុនផ្តល់សេវាកម្មថាមពល» ក្នុងការបង្កើត និងអនុវត្តន៍វិធានការសន្សំសំចៃថាមពលសម្រាប់ជាប្រយោជន៍រួមរបស់ធនាគារ អភិវឌ្ឍន៍អាស៊ី ADB។
ជាមួយគ្នានោះដែរ សិក្ខាសាលានេះ មានការចូលរួមពីអ្នកជំនាញសេដ្ឋកិច្ចល្បីៗ និងតំណាងក្រុម ឧស្សាហកម្មជាច្រើនរូបទៀតមកពីក្នុងតំបន់ និងសាកលលោក ក្រោមវត្តមានលោកបណ្ឌិត ថោង ខុន និងលោក Eric Sidgwick នាយក ADB ប្រចាំប្រទេសកម្ពុជា។
តាមរបាយការណ៍របស់ធនាគារអភិវឌ្ឍន៍អាស៊ី ADB បានឲ្យដឹងថា តម្លៃអគ្គិសនីក្នុងប្រទេសកម្ពុជាមានតម្លៃថ្លៃជាងគេបំផុតនៅក្នុងតំបន់។ របាយការណ៍ដដែលបានបង្ហាញទៀតថា តម្លៃដែលអគ្គិសនីដែលទាបរបស់កម្ពុជានោះ គឺវាមានតម្លៃខ្ពស់ជាងដល់ទៅ២៥% បើធៀបទៅនឹងតម្លៃអគ្គិសនីនៃប្រទេសជិតខាងរបស់កម្ពុជាដូចជា៖ ថៃ ឡាវ និងវៀតណាម…ជាដើម។
អគ្គិសនីកម្ពុជា តាមការស្រាវជ្រាវបានទិញជាង៦១%ទៅហើយ ពីប្រទេសវៀតណាម ថៃ និងឡាវ ក្រៅពីនោះកម្ពុជានោះពឹងលើម៉ាស៊ីនភ្លើង ដែលធ្វើឲ្យតម្លៃអគ្គិសនីមានតម្លៃខ្ពស់។
មន្ត្រីរបស់ធនាគារអភិវឌ្ឍន៍អាស៊ី បានលើកឡើងថាអាជីវកម្មនៅក្នុងប្រទេសកម្ពុជាអាចសន្សំបានរាប់សិបលានដុល្លាររៀងរាល់ឆ្នាំ ប្រសិនបើពួកគេបានអនុវត្តន៍ការប្រើប្រាស់ថាមពលឲ្យមានប្រសិទ្ធិភាពថែមទៀត។
រដ្ឋមន្ត្រីក្រសួងទេសចរណ៍លោក ថោង ខុន បានថ្លែងបញ្ជាក់ថា ការសន្សំសំចៃថាមពលគឺជាផ្នែកមួយនៃការអភិវឌ្ឍន៍បៃតង ហើយនៅលើវិស័យទេសចរណ៍ បានលើកទឹកចិត្តឲ្យមានការសន្សំសំចៃថាមពលនេះ ជាច្រើនឆ្នាំមកហើយ។ លោកក៏បានអំពាវនាវ ដល់ម្ចាស់អាជីវកម្មនានាឲ្យគិតគូរដល់ការសន្សំសំចៃថាមពល ដើម្បីកាត់បន្ថយចំណាយក្នុងអាជីវកម្មរបស់ខ្លួនផង និងដើម្បីថែរក្សាបរិស្ថានផង។
យ៉ាងណាមិញ ធានាគារ ADB បានលើកឡើងថា ក្នុងការគាំទ្រលើការវិនិយោគថាមពលស្អាតទូទាំង តំបន់អាស៊ី បច្ចុប្បន្ននេះគេវិនិយោគថវិកាជាង ២៣០០លានដុល្លារក្នុងមួយឆ្នាំនៅក្នុងគម្រោងថាមពលស្អាត នេះ។ ADB កំពុងស្វែងរកវិធីសាស្រ្ត ដើម្បីពង្រឹងការគាំទ្ររបស់ខ្លួនចំពោះគំនិតផ្តួចផ្តើមប្រសិទ្ធិភាពថាមពល ដែលនឹងជួយកែលម្អនូវប្រសិទ្ធិភាពឧបករណ៍ និងការកាត់បន្ថយការប្រើប្រាស់ថាមពល និងការចំណាយនៅក្នុងអាគារ និងរោងចក្រ៕ ដោយ ៖ មករា