ភ្នំពេញ៖ ក្រសួងសេដ្ឋកិច្ច និងហិរញ្ញវត្ថុបានផ្សព្វផ្សាយផ្លូវការកម្រងសម្រង់បទប្បញ្ញត្តិច្បាប់សំខាន់ៗទាក់ទងសមត្ថកិច្ចរបស់ ក្រសួងសេដ្ឋកិច្ច និងហិរញ្ញវត្ថុដល់ថ្នាក់ដឹកនាំ និងមន្ត្រីជាន់ខ្ពស់មកពីក្រសួងស្ថាប័ននានារបស់រាជរដ្ឋាភិបាលនៅសណ្ឋាគារ ភ្នំពេញព្រឹកថ្ងៃទី២៤ ខែតុលា ឆ្នាំ២០១៣នេះ។
លោកបណ្ឌិត ហ៊ែល ចំរើន ប្រធានលេខាធិការដ្ឋាន ក្រុមប្រឹក្សានីតិកម្មនៃក្រសួងសេដ្ឋកិច្ច និងហិរញ្ញវត្ថុបានថ្លែងថា កម្រងសម្រង់បទប្បញ្ញត្តិច្បាប់សំខាន់ៗទាក់ទងសមត្ថកិច្ចរបស់ក្រសួងសេដ្ឋកិច្ច និងហិរញ្ញវត្ថុ ដែលមាន ៧៤៤ទំព័រនេះត្រូវបានអនុម័តដោយក្រុមប្រឹក្សានីតិកម្មនៃក្រសួងសេដ្ឋកិច្ច និងហិរញ្ញវត្ថុកាលពីថ្ងៃទី ២៩ ខែមេសា ឆ្នាំ២០១៣ ក្រោមអធិបតីភាពលោកឧបនាយករដ្ឋមន្រ្តីគាត ឈន់ ដែលកាលនោះលោកជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងបានបោះពុម្ពលើកទី១ចំនួន ២០០ច្បាប់។
លោកបានបន្តថា ការផ្សព្វផ្សាយផ្លូវការកម្រងសម្រង់បទប្បញ្ញត្តិច្បាប់នេះជូនដល់ថ្នាក់ដឹកនាំ និងមន្ត្រីរាជការនៃក្រសួងស្ថាប័នផង និងជាពិសេសដល់ការប្រមូលមតិកែលម្អស្ថាបនា ពីសមាជិក សមាជិកានៃអង្គសិក្ខាសាលាទាំងមូល ដែលសុទ្ធសឹងជាថ្នាក់ដឹកនាំ និងមន្ត្រីជំនាញកម្រិតខ្ពស់នៃក្រសួងស្ថាប័នទូទាំងព្រះរាជាណាចក្រកម្ពុជា។
លោកបណ្ឌិត ហ៊ាន សាហ៊ីប រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងតំណាងរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោកបណ្ឌិត អូន ព័ន្ធមុនីរ័ត្នថ្លែងថា អនុលោមតាមប្បញ្ញត្តិច្បាប់ជាធរមានក្រសួងសេដ្ឋកិច្ច និងហិរញ្ញវត្ថុបាននិងកំពុងអនុវត្តសមត្ថកិច្ចរបស់ខ្លួន ក្នុងការដឹកនាំ និងគ្រប់គ្រងវិស័យសេដ្ឋកិច្ច និងហិរញ្ញវត្ថុ នៃព្រះរាជាណាចក្រកម្ពុជា ដោយបានកសាងក្របខណ្ឌគោលនយោបាយ និងក្របខណ្ឌច្បាប់ជាច្រើននៅលើមូលដ្ឋាននៃសេដ្ឋកិច្ចទីផ្សារ និងសមធម៌សង្គម និងបានចូលរួមចំណែកពង្រឹងអភិបាលកិច្ចល្អដែលត្រូវបានកំណត់ថាជាស្នូលនៃយុទ្ធសាស្ត្រចតុកោណដើម្បីកំណើនការងារសមធម៌ និងប្រសិទ្ធភាពរបស់រាជរដ្ឋាភិបាលក្រោមការដឹកនាំដ៏ឈ្លាសវៃ និងប្រកបដោយគតិបណ្ឌិតដ៏ខ្ពង់ខ្ពស់ សម្តេច អគ្គមហាសេនាបតី តេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។
ជាពិសេសក្នុងក្របខណ្ឌនៃការអនុវត្តកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ ក្រសួងសេដ្ឋកិច្ច និងហិរញ្ញវត្ថុកាន់តែផ្តោតការយកចិត្តទុកដាក់ខ្ពស់ជាបន្ថែមទៀតទៅលើការពង្រឹងអភិបាលកិច្ចនៃហិរញ្ញវត្ថុសាធារណៈក្នុងទិសដៅរួមចំណែក
ពង្រឹងនីតិរដ្ឋ និងពង្រីកវប្បធម៌នៃការគោរពច្បាប់ក្នុងដែនសមត្ថកិច្ចរបស់ខ្លួន។
លោកបន្តថា ការបង្កើតកម្រងសម្រង់នេះឡើង សម្រាប់ជាឧបករណ៍ការងារដ៏គន្លឹះមួយសំដៅរួមចំណែកពង្រឹងនីតិរដ្ឋ និងពង្រីកវប្បធម៌នៃការគោរពច្បាប់ផងនិយាយជារួម ព្រមទាំងរួមចំណែកឆ្លើយតបទៅនឹងសេចក្តីត្រូវការចាំបាច់របស់ថ្នាក់ដឹកនាំ ក៏ដូចជាមន្ត្រីរាជការទាំងឡាយ ក្នុងការពង្រឹងប្រសិទ្ធភាពនៃអភិបាលកិច្ច និងសមត្ថកិច្ចស្ថាប័ន នៅក្នុងការដ្ឋានកែទម្រង់ការគ្រប់គ្រងហិរញ្ញវត្ថុសាធារណៈផង។
ក្នុងនាមក្រុមប្រឹក្សានីតិកម្មនៃក្រសួងសេដ្ឋកិច្ច និងហិរញ្ញវត្ថុ និងគណៈកម្មាធិការដឹកនាំការងារកែទម្រង់ការគ្រប់គ្រងហិរញ្ញវត្ថុសាធារណៈ លោកសូមជំរុញលើកទឹកចិត្តដល់សិក្ខាកាមទាំងអស់ សកម្មផ្តល់មតិកែលម្អ និងស្ថាបនាសមិទ្ធផលនេះឲ្យកាន់តែប្រសើរឡើងថែមទៀតទាំងផ្នែកទម្រង់ និងខ្លឹមសារសំដៅឆ្លើយតបឲ្យចំនឹងសេចក្តីត្រូវការជាក់ស្តែង ក្នុងការពង្រឹងអភិបាលកិច្ចល្អ និងសមត្ថភាពស្ថាប័ន ដែលជាអាទិភាពគោលនយោបាយរបស់រាជរដ្ឋាភិបាលនីតិកាលទី៥នៃរដ្ឋសភា៕
ដោយ៖ សស្អាត