ភ្នំពេញ៖អាជ្ញាធររាជធានីភ្នំពេញមានវិធានការតឹងរ៉ឹងទៅលើរថយន្តដឹកដីនិងខ្សាច់ទាំងអស់ដែលបានធ្វើ
ចរាចរណ៍ឆ្លងកាត់ស្ពានព្រះមុនីវង្ស(ស្ពានក្បាលថ្នល់)និងក្នុងរាជធានីភ្នំពេញដែលអត់មានច្បាប់អនុញ្ញាត
និងរថយន្តដែលបានអនុវត្តខុសគោលការណ៍ដែលច្បាប់បានអនុញ្ញាត ដូចជាការដឹកដីឬខ្សាច់មិនបាន
គ្របឲ្យបានត្រឹមត្រូវ បណ្តាលឲ្យដីជ្រុះធ្លាក់រាយប៉ាយនិងហូរទឹកនៅលើផ្លូវ។
កាលពីចុងសប្តាហ៍កន្លងទៅនេះលោកឃួងស្រេងអភិបាលរងរាជធានីភ្នំពេញបានដឹកនាំកម្លាំងចុះឃាត់
រថយន្តដឹកដី ឬ ខ្សាច់ ដែលធ្វើឲ្យប៉ះពាល់ដល់សោភ័ណ្ឌភាព និងសណ្តាប់ធ្នាប់សាធារណៈក្នុងរាជធានី
ភ្នំពេញ ពិសេសនៅលើស្ពានព្រះមុនីវង្ស នៅចំណុចច្រមុះជ្រូកខាងលិចស្ពានកែងផ្លូវលេខ២៧១និង
មហាវិថីព្រះមុនីវង្សយកទៅរក្សាទុកនៅស្នងការដ្ឋាននគរបាលរាជធានីភ្នំពេញដើម្បីអប់រំ និងធ្វើកិច្ច
សន្យាព្រមានឲ្យរាងចាល បញ្ឈប់សកម្មភាពអនាធិបតេយ្យតទៅទៀត ។
យុទ្ធនាការដ៏ក្តៅគគុកនេះ លោកឃួងស្រេងមិនបានបន្ធូដៃឲ្យក្រុមរថយន្តដឹកដី ឬដឹកខ្សាច់ណាដែល
មានខ្នងបង្អែក ឬ បក្សពួកនោះទេ គឺធ្វើការព្រមានទាំងអស់ឲ្យតែមិនគោរពតាមការណែនាំរបស់សាលា
រាជធានីភ្នំពេញ ឬ មន្ទីរសាធារណៈការដឹកជញ្ជូនរាជធានីភ្នំពេញ ដែលបានដាក់ចេញនូវគោលការណ៍
និងការណែនាំយ៉ាងច្បាស់លាស់អំពីការធ្វើអាជីវកម្មដឹកដី ឬខ្សាច់ទាំងនោះ ។
នៅក្នុងសកម្មភាពចុះចាប់ឃាត់រថយន្តនោះមានរថយន្តខ្លះអត់មានលិខិតអនុញ្ញាតឲ្យធ្វើអាជីវកម្ម និង
ខ្លះទៀតមានលិខិតអនុញ្ញាតពីសាលារាជធានីភ្នំពេញតែអ្នកបើកបរប្រព្រឹត្តខុសទៅនឹងគោលការណ៍
អនុញ្ញាតរបស់សាលារាជធានីភ្នំពេញដូចជាដឹកដីមិនគ្របធ្វើឲ្យហុយឬ ជ្រុះ និងហៀរទឹកកំពប់ពេញផ្លូវ
ពិសេសគឺបើកបរចូលក្នុងក្រុងខុសម៉ោងពេលដែលបានកំណត់ដោយសាលារាជធានីភ្នំពេញជាដើម។
សូមបញ្ជាក់ថាកន្លងមកសាលារាជធានីភ្នំពេញបានចេញសារាចរណ៍ណែនាំហាមមិនឲ្យរថយន្តដឹកដី
ដឹកខ្សាច់បើកបរឆ្លងកាត់ទីក្រុងភ្នំពេញទេបើសិនជាបើកឆ្លងកាត់ត្រូវសុំការអនុញ្ញាតពីសាលារាជធានី
ភ្នំពេញហើយរថយន្តដឹកដីដឹកខ្សាច់ទាំងអស់ត្រូវគ្របពីលើឲ្យជិតចំពោះរថយន្តដឹកខ្សាច់វិញត្រូវទុកឲ្យហូរទឹកអស់សិនកុំឲ្យហុយនិងជ្រុះធ្លាក់រាយតាមថ្នល់ធ្វើឲ្យប៉ះពាល់ដល់បរិស្ថានសោភណ្ឌភាពនិង
បង្កឲ្យមានគ្រោះថ្នាក់ចរាចរណ៍កើតឡើង។
ដោយឡែកនៅតាមផ្លូវភ្នំពេញហាណូយក្នុងខណ្ឌសែនសុខជាពិសេសសង្កាត់ភ្នំពេញថ្មីនិងសង្កាត់
ជាយក្រុងមានរថយន្តដឹកដីមិនតិចគ្រឿងទេក្នុងមួយថ្ងៃៗបានដឹកដីបន្តកន្ទុយគ្នាគ្រាន់តែជ្រុះដីធ្លាក់តាមផ្លូវនោះចង់ក្លាយទៅជាភ្លឺស្រែទៅហើយ ម៉្យាងហុយមើលផ្លូវសឹងតែមិនឃើញ និងបង្ករការខូច
ខាតផ្លូវជាបន្តបន្ទាប់តែហាក់ដូចជាគ្មានអាជ្ញាធរមូលដ្ឋានណាអើពើទប់ស្គាត់ឬបង្រ្កាបនោះឡើយ៕
ដោយ៖ ស.ស្អាត