ភ្នំពេញ៖ លោកឧបនាយករដ្ឋមន្ត្រី យឹម ឆៃលី ប្រធានក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ ជម្រុញឲ្យក្រសួងសុខាភិបាល លើកស្ទួយនិងគាំទ្រឱសថផលិតនៅក្នុងស្រុក ហើយមានវិធានការលុបបំបាត់ឱសថក្លែងក្លាយនិងឱសថហួសសុពលភាពប្រើប្រាស់ឲ្យមានប្រសិទ្ធភាព។ក្នុងពិធីបិទសន្និសីទអន្តរជាតិ មេគង្គ ជីវសាស្ត្រ ឱសថសាស្ត្រ នារសៀលថ្ងៃទី២២ ខែតុលា ឆ្នាំ២០១៣នេះនៅសណ្ឋាគារភ្នំពេញ លោកឧបនាយករដ្ឋមន្ត្រី បានលើកឡើងថា ពាក់ព័ន្ធនឹងការផលិត និងការប្រើប្រាស់ឱសថនៅប្រទេសកម្ពុជា គឺយើងមានសហគ្រាសឯកជនចំនួន០៨ ដែលកំពុងដំណើរការផលិតប្រកបដោយគុណភាព និងចែកចាយឱសថរាប់ពាន់មុខនៅក្នុងទីផ្សាររបស់យើង។ ទោះបីយើងមានឱសថទាំងនេះក៏ដោយ ក៏ឱសថផលិតក្នុងស្រុកទាំងនោះនៅមិនទាន់មានការគាំពារខ្លាំងក្លាពីប្រជាជនយើង និងប្រើប្រាស់ក្នុងមន្ទីរពេទ្យ និងមណ្ឌលសុខភាពរបស់រដ្ឋបានទូលំទូលាយនៅឡើយទេ។ ប្រការនេះទាមទារឲ្យក្រសួងសុខាភិបាលត្រូវផ្តល់ការលើកកំពស់ និងគាំទ្រឱសថផលិតក្នុងស្រុក តាមរយៈពង្រឹងគុណភាព ប្រសិទ្ធភាព លប់បំបាត់ឱសថក្លែងក្លាយ ឱសថហួសសុពលភាព និងពង្រឹងការផ្គត់ផ្គង់ឱសថនេះឲ្យបានច្រើនថែមទៀត ដល់មន្ទីរពេទ្យនិងមណ្ឌលសុខភាពរដ្ឋជំនួសការទិញឱសថពីបរទេស ដែលមានតម្លៃថ្លៃតែមានគុណភាពប្រហាក់ប្រហែលនឹងឱសថផលិតក្នុងស្រុកយើងក្នុងការព្យាបាលជំងឺជូនប្រជាពលរដ្ឋ។
លោកឧបនាយករដ្ឋមន្ត្រីយឹម ឆៃលីបានចាត់ទុកសន្និសីទអន្តរជាតិនេះ ជាព្រឹត្តិការណ៍វិជ្ជាជីវៈជាតិ អន្តរជាតិមួយ មិនគ្រាន់តែពង្រឹងសមត្ថភាពឱសថការីកម្ពុជាប៉ុណ្ណោះទេ គឺថែមទាំងបានកសាងបណ្តាញទំនាក់ទំនងគ្នាក្នុងប្រទេស និងក្រៅប្រទេសទៀតផង។ មួយវិញទៀតព្រឹត្តិការណ៍នេះ ក៏បានបង្ហាញឲ្យសាធារណៈជនជាតិ អន្តរជាតិ បានយល់ដឹងច្បាស់ថែមទៀតអំពីស្ថានភាពជាក់ស្តែងនៅកម្ពុជា និងការខិតខំរបស់រាជរដ្ឋាភិបាលកម្ពុជា ក្នុងការពង្រឹងសេវាសុខាភិបាលជាតិឲ្យកាន់តែមានទំនុកចិត្តដល់ប្រជាជនរបស់យើងទោះបីជាលទ្ធផលនេះនៅមិនទាន់ឈានដល់កម្រិត ដែលយើងម្នាក់ៗចង់បានក្តី ក៏ប៉ុន្តែយើងមានមោទនភាពរីករាយនិងទទួលយកចំពោះការរីកចំរើននៃរចនាសម្ព័ន្ធសុខាភិបាលដ៏រឹងមាំ ដែលមានពីថ្នាក់កណ្តាលរហូតដល់ថ្នាក់ឃុំ-សង្កាត់ទូទាំងប្រទេសនិងចំពោះកម្មវិធីជាតិធំៗ ដែលបាននិងកំពុងដំណើរការជាជំហានៗដ៏ជោគជ័យ។ជាមួយគ្នានេះរាជរដ្ឋាភិបាលកម្ពុជានីតិកាលទី៥នៃរដ្ឋសភា នូវតែបន្តពង្រឹងសន្តិភាព ស្ថិរភាពនយោបាយ សន្តិសុខសណ្តាប់ធ្នាប់សង្គម ដំណើរការលទ្ធិប្រជាធិបតេយ្យ សេរីពហុបក្ស និងគោលការណ៍និតិរដ្ឋ ជាពិសេសការកសាងក្របខ័ណ្ឌច្បាប់ និងការគោរពច្បាប់នៅក្នុងប្រទេស ក្នុងនោះក៏រួមទាំងការគោរពច្បាប់ផ្នែកវេជ្ជសាស្ត្រនានាផងដែរ ដែលសារៈសំខាន់ដល់ការការពារសុខភាពប្រជាជនយើង និងការគោរពក្រមសីលធម៌សុខាភិបាល និងវិជ្ជាជីវៈ។ លោកឧបនាយករដ្ឋមន្ត្រីបញ្ជាក់ថា ការបង្ហាញនិងប្រធានបទនានា ដូចជាការប្រើប្រាស់ឱសថដោយសមហេតុសមផល ឱសថនិងសុខភាពសាធារណៈ ភាពស៊ាំរបស់ភ្នាក់ងារបង្កជម្ងឺទៅនឹងឱសថ (ការព្យាបាលដោយប្រើថ្នាំផ្សះ និងឱសថគ្រុនចាញ់នៅក្នុងប្រទេសកម្ពុជា និងនៅតំបន់អាស៊ីអាគ្នេយ៍)ការបណ្តុះបណ្តាលផ្នែកឱសថ និងប្រធានបទផ្សេងៗទៀត ដែលមានការទាក់ទិននឹងការលើកកម្ពស់សុខមាលភាពសង្គម និងគោលនយោបាយសុខាភិបាលជាតិ ពិតជាឆ្លើយតបទៅនឹងការវិវឌ្ឍនៃវិស័យសុខាភិបាល និងការលើកកម្ពស់ដល់ក្រមសីលធម៌វិជ្ជាជីវៈ ដែលជាសរសរគ្រឹះនៃស្មារតីមន្ត្រីសុខាភិបាលរបស់យើង ខិតខំធ្វើការបំរើប្រទេសជាតិនិងប្រជាជន។ ដូចប្រសាសន៍របស់សម្តេចតេជោ នាយករដ្ឋមន្ត្រីតែងលើកឡើងថា គ្មានភារកិច្ចអ្វីដែលប្រសើរថ្លៃថ្លាជាងភារកិច្ចបំរើប្រជាពលរដ្ឋនោះទេ។
លទ្ធផលខាងបច្ចេកទេសវិទ្យាសាស្ត្រដែលបានពិភាក្សាគ្នា នៅក្នុងសន្និសីទអន្តរជាតិមេគង្គជីវសាស្ត្រ ឱសថសាស្ត្រ២០១៣នេះ បាននាំមកនូវកាលានុប្បវត្តភាពថ្មីសម្រាប់ឱសថការីកម្ពុជាទាំងអស់ ក្នុងការលើកស្ទួយចំណេះដឹងរបស់ខ្លួន លើកកំពស់ក្រមសីលធម៌វិជ្ជាជីវៈ និងចូលរួមគោរពជីវិតសេចក្តីថ្លៃថ្នូរ និងសុខមាលភាពរបស់មនុស្ស។ និងជាចំណែកមួយនៃការតាំងចិត្តអនុវត្តយុទ្ធសាស្ត្រចតុកោណដំណាក់កាលទី៣របស់រាជរដ្ឋាភិបាលនីតិកាលទី៥នៃរដ្ឋសភា ក្នុងចតុកោណទី៤ មុំទី២ ដែលបានចែងការលើកកម្ពស់សុខភាព និងអាហារូបត្ថម្ភ ដោយគោលដៅយុទ្ធសាស្ត្ររបស់រាជរដ្ឋាភិបាលនិងបន្តអនុវត្តផែនការយុទ្ធសាស្ត្រវិស័យសុខាភិបាល សំដៅលើកម្ពស់សុខមាលភាពនិងអាហារូបត្ថម្ភរបស់ប្រជាជនទូទៅ កាត់បន្ថយអត្រាស្លាប់មាតា និងទារក តាមរយៈការពង្រឹងសមត្ថភាពមន្រ្តី ពង្រីកសេវាសុខាភិបាលប្រកបដោយគុណភាព ប្រសិទ្ធភាព ។សូមបញ្ចាក់ថា សន្និសីទអន្តរជាតិផ្លាស់ប្តូរយោបល់២ថ្ងៃរបស់មហាវិទ្យាល័យឱសថសាស្ត្រ និងគណៈឱសថការីកម្ពុជា ដែលសហការជាមួយសមាគមឱសថការីកម្ពុជា សមាគមមិត្តឱសថនិស្សិត និងឱសថការីនៅប្រទេសបារាំង សមាគមសហគ្រាសផលិតឱសថកម្ពុជា ក្រោមការឧបត្ថម្ភពីស្ថានទូតបារាំងប្រចាំនៅកម្ពុជា La FondationMerieux ,La Fondation Pierre Fabre អង្គការមេគង្គ Mekong Anti Trafics នេះក្នុងបំណង ដើម្បីជាគុណប្រយោជន៍សម្រាប់វិស័យសុខាភិបាល ក៏ដូចជាការយល់ដឹងអំពីការវិវឌ្ឍន៍ផ្នែកវិទ្យាសាស្ត្រសុខាភិបាល ដែលកំពុងមានការជឿនលឿនក្នុងផ្នែកវេជ្ជសាស្ត្រ និងផ្នែកឱសថសាស្ត្រនៅលើសាកលលោក៕ ដោយ៖ ស.ស្អាត