ភ្នំពេញ ៖ សពអាសកាសយានិកខ្មែរម្នាក់ ដែលបានស្លាប់ដោយឧបទ្ទវហេតុធ្លាក់យន្តហោះរបស់ក្រុមហ៊ុនឡាវ កាលពីថ្ងៃទី១៦ តុលា នៅខេត្តចំប៉ាសាក់ ក្បែរព្រំប្រទល់រវាងប្រទេសកម្ពុជា និងថៃនោះ នៅមិនទាន់រកឃើញនៅឡើយរហូតមកដល់ពេលនេះ ។
លោកម៉ៅ ហាវណ្ណាល់ រដ្ឋលេខាធិការ នៃរដ្ឋលេខាធិការដ្ឋានអាកាសចរស៊ីវិលបានមានប្រសាសន៍នៅវេលាម៉ោង១០ និង៤០នាទីព្រឹកនេះថា តាមរយៈកំណត់ទូតពីស្ថានទូតកម្ពុជាប្រចាំប្រទេសឡាវបានបញ្ជាក់ច្បាស់ហើយថា ក្នុងចំណោមអាសកាសយានិក៥នាក់ ដែលបានបើកយន្តហោះប្រភេទAiR 72 ឲ្យក្រុមហ៊ុនអាកាសចរណ៍ Lao Airlines ហើយបានធ្លាក់ចូលទៅក្នុងទន្លេមេគង្គនៅក្នុងខេត្តចំប៉ាសាក់ប្រទេសឡាវនោះ គឺពិតជាមានម្នាក់ជាអាកាសយានិកខ្មែរ។ ប៉ុន្តែសាកសពអាកាសយានិកខាងលើនេះនៅមិនទាន់ត្រូវបានរកឃើញនៅឡើយទេរហូតមកដល់ពេលនេះ ។
អាកាសយានិកខ្មែរដែលបានស្លាប់នៅក្នុងហេតុការណ៍ធ្លាក់យន្តហោះនៅប្រទេសឡាវត្រូវគេឲ្យដឹងថា មានឈ្មោះ យ៉ុង សាន អាយុ៥៦ឆ្នាំ ជាអ្នកទទួលខុសត្រូវលើយន្តហោះរបស់ក្រុមហ៊ុនអាកាសចរណ៍ឡាវដែលបានធ្លាក់នោះ ។
បើតាមការអះអាង របស់ លោក ម៉ៅ ហាវណ្ណាល់ ថាពេលនេះ ក្រុមគ្រួសាររបស់លោក យ៉ុង សាន បានទៅកាន់ប្រទេសឡាវហើយ។ លោកបន្តថា ប្រសិនបើភរិយារបស់គាត់មានសំណូមពរដល់ខាងកម្ពុជា ឲ្យជួយអន្តរាគមន៍យកសាកសពត្រឡប់មកធ្វើបុណ្យនៅប្រទេសកម្ពុជាវិញ នោះរដ្ឋលេខាធិការដ្ឋានអាកាសចរស៊ីវិលនឹងត្រៀមលក្ខណៈជួយអន្តរាគមន៍ចំពោះបញ្ហានេះ ។
សូមបញ្ជាក់ថា កាលពីថ្ងៃទី១៦ ខែតុលា នេះ យន្តហោះរបស់ក្រុមហ៊ុនអាកាសចរណ៍ Lao Airlines មួយគ្រឿងប្រភេទ ATR72-600 ត្រូវគេរាយការណ៍ថា បានធ្លាក់ចូលទៅក្នុងទន្លេមេគង្គក្នុងខេត្តចំប៉ាសាក់ ក្បែរព្រំដែលប្រទេសកម្ពុជា បន្ទាប់ពីជួបនឹងព្យុះខ្លាំង ដោយបានបណ្តាលឲ្យមនុស្សចំនួន៤៩នាក់ស្លាប់ ៕ ដោយ៖ សស្អាត