កំពង់ឆ្នាំង ៖ សកម្មភាពនៃការដាក់ឧបករណ៍នេសាទជាច្រើនកន្លែងរួមមាន របាំងលូស្បៃមុងរាប់រយកន្លែង ដាក់ចាប់ត្រីក្នុងរដូវបិទការនេសាទ ធ្វើសកម្មភាពយ៉ាងរលូនក្នុងបឹងតាមភូមិមួយចំនួន នៅក្នុងឃុំអំពិលទឹកស្រុកកំពង់ត្រឡាចត្រូវបានប្រជាពលរដ្ឋរិះគន់ថា សមត្ថកិច្ចជលផលបិទភ្នែកបើកដៃឲ្យពួកជនល្មើសមិនធ្វើការបង្ក្រាប។
ដោយមានការមិនសប្បាយចិត្តពីសំណាក់ប្រជាពលរដ្ឋដែលបានបើកកាណូតឆ្លងកាត់របាំងនោះ ហើយត្រូវបានពួកជនល្មើសជេប្រមាថរកកាប់សំលាប់ពួកគាត់ដោយសារតែខ្លាចដាច់ដោចរបាំងលូស្បៃមុងពួកគេនិងដោយមើលឃើញភាពអសកម្មនិងការឃុបឃិតរបស់មន្ត្រីក្នុងសង្កាត់នេសាទកំពង់ត្រឡាចជាង២ខែមិនព្រមបង្ក្រាបនោះ។
ប្រជាពលរដ្ឋម្នាក់បានស្មគ្រ័ចិត្តចំណាយប្រាក់ផ្ទាល់ខ្លួន ទិញប្រេងសាំងចាក់កាណូតដឹកអ្នកកាសែតមួយក្រុមទៅធ្វើការត្រួតពិនិត្យនិងថតយករូបភាពបទល្មើសទាំងនោះមកធ្វើការចុះផ្សាយអោយថ្នាក់លើបានជ្រាបបកមុខមាត់ជនល្មើសនិងស្បែកមុខមន្ក្រីជលផលអសកម្មស៊ីសំណូកមិនអនុវត្តការងារតាមតួនាទីភារកិច្ចដែលរាជរដ្ឋាភិបាលប្រគល់ឲ្យ។
ជាក់ស្តែងនៅថ្ងៃម្សិលមិញនេះនៅភូមិខ្លាគ្រហឹម.ភូមិបាក់ភ្នំ. វាលស្បូវ.និងភូមិគៀនឃ្លាំង ក្នុងចំណោមភូមិទាំង១១របស់ឃុំអំពិលទឹក ស្រុកកំពង់ត្រឡាច គេពិនិត្យឃើញមានរបាំងលូស្បៃមុងដែលមួយកន្លែងៗមានប្រវែងពី២០០ទៅ៥០០ម៉ែត្រស្កេកស្កះរាប់រយរបាំងដាក់រាយពេញបឹងដែលមានមាត់លូមួយៗមានទំហំពី២ទៅ៣ម៉ែត្រក្រពើរ៤ឬ៥ក៏អាចចូលបានដែរ។
ប្រជាពលរដ្ឋបានក្រុមអ្នកកាសែតថានៅក្នុងភូមិផ្សេងៗទៀតក្នុងឃុំអំពិលទឹកក៏មានរបាំងលូស្បៃមុងដូចគ្នានេះដែរ ប៉ុន្តែមិនសូវមានច្រើនដូចក្នុងភូមិទាំង៤ខាងលើនេះទេ។ របាំងលូស្បៃមុង១ៗពួកជនល្មើសបានជួលជាងមានជំនាញកាត់ដេរធ្វើជាមាត់លូ ឬ ខ្លះហៅសៃយឺននៅឯខេត្តកណ្តាលដោយចំណាយប្រាក់ធ្វើក្នុង១លូៗចំនួនពី៨០ម៉ឺនទៅ១លានរៀល បូកជាមួយនិងរបាំងរាប់រយម៉ែត្រទៀតនោះក្នុង១របាំងៗគេត្រូវចំណាយប្រាក់ពី២ទៅ៣លានរៀល។ ការធ្វើរបាំងគឺគេបានរាយស្បៃមុងរាប់រយម៉ែត្របង្កប់ជើងក្នុងបាតដីទើបគេដាក់លូស្បៃមុងធំៗដើម្បីចាប់យកត្រីគ្រប់ប្រភេទបានក្នុង១ថ្ងៃៗរាប់រយគីឡូនៅពេលត្រីត្រូវពេលខ្លះបានរាប់តោន។
ជាមួយគ្នានោះគាត់លួចបង្ហើបពីលាភសក្ការៈ ដែលមន្ត្រីជលផលទទួលបានពីពួកល្មើស ក្នុង១រដូវបិតនេសាទគឺមួយរបាំងៗពី៥០ម៉ឺនទៅ១លានរៀលតាមរបាំងតូចធំតែមន្ត្រីជលផលមិនធានាឡើយ ពេលមេបញ្ជារអោយចាប់គឺត្រូវតែចាប់ហើយ។ពេលខ្លះកម្លាំងចំរុះចុះចាប់ត្រូវបានគេលួចប្រាប់ជនល្មើសអោយស្រាយរបាំង និងលូស្បៃមុងទំលាក់បង្កប់ក្នុងទឹកមិនអោយគេមើលឃើញទៀតផង។ពេលខ្លះទៀតពេលគេបង្ក្រាបច្រឡំអ្នកបង់លុយអោយមន្ត្រីជលផលកំហូចក៏បានលួចយកលូស្បៃមុងនោះអោយជនល្មើសនោះវិញ។
រីឯត្រីដែលរកបានគឺជាប្រភេទកូនត្រីតូចៗគេបានដឹកយកទៅលក់នៅស្ពានថ្មព្រំប្រទល់ស្រុកបាធាយខេត្តកំពង់ចាមនិង ខេត្តកណ្តាល មួយចំនួនទៀតលក់មកក្នុងខេត្តកំពង់ឆ្នាំងដើម្បីយកធ្វើជាចំណីត្រីឆ្តោរដែលជាប្រភេទត្រីហាមឃាត់មិនឲ្យចិញ្ចឹម។ដោយឡែកនៅ បណ្តាស្រុកមួយចំនួនតាមដងទន្លេក្នុងខេត្តកំពង់ឆ្នាំងក៏មានអ្នកចិញ្ចឹមត្រីឆ្តោរតាមបែរ និងតាមស្រះជាច្រើនកន្លែងផងដែរដោយគ្មានការទប់ណាមួយពីសមត្ថកិច្ចជលផលនោះឡើយ។
នាយសង្កាត់រដ្ឋបាលជលផលកំពង់ត្រឡាចលោក គឹម ហេង ដែលទទួលខុសត្រូវបង្ក្រាបបទល្មើស ក្នុងដែនសមត្ថកិច្ចរបស់ខ្លួខបានអោយដឹងនៅល្ងាចថ្ងៃដដែលនោះថា លោកបានទទួលស្គាល់ថាពិតជាមានបទល្មើសនៅចំណុចខាងលើនេះមែនប៉ុន្តែបទល្មើសទាំងនេះពួកលោកធ្លាប់បានបង្ក្រាបជាច្រើនលើករួចមកហើយគឺបង្ក្រាបខាងមុខកើតខាងក្រោយមិនចេះនោះទេ ពួកគាត់ហាកដូចជាដឹងមុន។
ចំណែកនាយខ័ណ្ឌរដ្ឋបាលជលផលកំពង់ឆ្នាំង លោក សេង ប៊ុនឈឿននិយាយថាលោកទទួលស្គាល់បទល្មើសទាំងអស់ខាងលើពិតជាមានមែនប៉ុន្តែកំលាំងរបស់លោកបានចុះបង្ក្រាបជាញឹកញាប់មកហើយគឺបង្ក្រាបបានថ្ងៃនេះកើតវិញនៅថ្ងៃស្អែកដូចវែកចកកណ្តាលទន្លេអញ្ចឹង។ តែទោះជាយ៉ាងណាសមត្ថកិច្ចលោកនិងខិតខំចុះបង្ក្រាបដូចភ្លៀងរលឹមជាបន្ត ទៀតមិនអោយជនល្មើសធ្វើអ្វីស្រេចតែចិត្តនោះឡើយ។
ចំពោះការចិញ្ចឹមត្រីឆ្តោរតាមបែរនិងតាមស្រះវិញ គឺមានពិតមែនតែមិនច្រើនទេ ហើយលោកបានឆ្លងយោបល់ថ្នាក់លើនិងព្រះរាជអាជ្ញាខេត្តរួចហើយបន្ទាប់នេះសមត្ថកិច្ចរបស់លោកនឹងធ្វើការបោសសំអាតចាក់លែងនិងដួសពីស្រះលែងទៅបឹងធម្មជាតិវិញ។
យ៉ាងក៏ដោយលោកបានបដិសេធន៍ នឹងពាក្សចោទប្រកាន់របស់ប្រជាជនដែលថាមន្រ្តីលោកស៊ីលុយពីជនល្មើសមិនព្រមបង្ក្រាបនោះ លោកសុំអោយប្រជាពលរដ្ឋផ្តល់ភស្តុតាងអោយបានច្បាស់លាស់លោកនឹងចាត់វិធានការចំពោះមន្ត្រីទាំងឡាយណា ដែលមិនគោរពច្បាប់ ប្រព្រឹត្តអំពើផ្តេសផ្តាសខូចឈ្មោះមន្ត្រីជលផលខេត្តនោះឡើយ ៕
ដោយ ៖ សស្អាត