ភ្នំពេញ៖ ក្រសួងយុត្តិធម៌ និងគណ:មេធាវី នៃព្រះរាជាណាចក្រកម្ពុជា រួមទាំងស្ថាប័ន​ពាក់ព័ន្ធួយចំនួនទៀត ក្រោមកិច្ចឧបត្ថម្ភពី UNICEF និង ការិយាល័យ OHCHR នៅកម្ពុជា នៅព្រឹកថ្ងៃទី២៩ ខែវិច្ឆិកា ឆ្នាំ២០១៣ នេះ បានបើកកិច្ចពិភាក្សា ពីយុទ្ធសាស្រ្ត ដែល អាចមាន​ដើម្បីឲ្យកាន់តែប្រសើរ ដល់សេវាកម្មជំនួយផ្នែក ច្បាប់ដល់ជនក្រីក្រ និងជនដែលងាយរង​គ្រោះ​មានកុមារ និងស្ត្រីនៅកម្ពុជា ។

អ្នកតំណាងការិយាល័យឧត្តមស្នងការអង្គការសហប្រជាជាតិ ទទួលបន្ទុកសិទ្ធិមនុស្សនៅ​កម្ពុជា (OHCHR)  លោកស្រី វ៉ាន់ហ៊ី លី បានលើកឡើងថា តាម ទស្សនៈ វិស័យសិទ្ធិមនុស្ស ជំនួយផ្នែកច្បាប់ដល់ជនក្រីក្រ គឺសិទ្ធិជាមូលដ្ឋានមួយ វាគឺជាធាតុ​ផ្សំ​ដ៏​យ៉ាងសំខាន់បំផុត នៃប្រព័ន្ធយុត្តិធម៌ព្រហ្មទណ្ឌ ត្រឹមត្រូវនិងមានប្រសិទ្ធភាព ដោយឈរ​លើមូលដ្ឋាននីតិរដ្ឋ ។

លោកស្រី Wan Hea Lee បន្តថា វាក៏មានសារ:សំខាន់ដល់ការទទួលបានសិទ្ធិមនុស្ស ដទៃទៀតរួមទាំងសិទ្ធិ​ទទួលបាន​សវនា​ការ ដោយយុត្តិធមផងដែរ ជាពិសេសចំពោះអ្នកក្រីក្រ ដែលមិនមានលទ្ធភាពបង់ថ្លៃ​សេវាកម្មជំនួយផ្នែកច្បាប់​ក្នុងការស្វែងរក​យុត្តិធម៌។

អ្នកស្រីតំណាង OHCHCបញ្ជាក់ថា លើសពីនេះការទទួលបានសេវាកម្ម យុត្តិធម៌ កាន់តែកើន​ឡើង អាចបង្ការពីការប្រព្រឹត្តមិន​គប្បីនៅប៉ុស្តិ៍នគរបាល ជួយសម្រាលដល់ភាព ចង្អៀតណែន​នៅពន្ធនាគារ និងជួយកាត់បន្ថយដល់ការផ្តន្ទា​ទោសដោយ​ភាព​មិន​ត្រឹមត្រូវ។

លោក ប៊ុន ហុន ប្រធានគណ:មេធាវី អាណត្តិទី៩ បានឲ្យដឹងថា បច្ចុប្បន្ននេះគណៈមេធាវី មានមេធាវីស្ម័គ្រចិត្តចំនួន៤៨រូប សម្រាប់ផ្តល់សេវាការពារក្តី ជូនជនក្រីក្រដោយ ឥតកម្រៃ​សេវានៅទូទាំងប្រទេស ដោយបានផ្តល់ជូន មេធាវីទាំងអស់នោះ ត្រឹមតែសោហ៊ុយ ធ្វើដំណើរ ហូបចុក ស្នាក់នៅ និងសោហ៊ុយ ថតចម្លងសំណុំរឿង ដ៏តិចតួចបំផុត ។

លោក ប៊ុន ហុន បន្តថា សម្រាប់ឆ្នាំ២០១៣គិតមកត្រឹមដំណាច់ខែតុលានេះ គណៈមេធាវី​ទទួលបានសំណុំរឿងចំនួន​៧៩៨​សំណុំរឿង ដែលមានកូនក្តីសរុបចំនួន១១៦២នាក់ ហើយ​ក្នុង​នោះ៨៨នាក់ ជាអនីតិជនគណៈមេធាវីក៏បានផ្តល់​ការពិគ្រោះ​យោបល់​ផ្នែកច្បាប់ ដោយ​ឥតគិតកម្រៃបានចំនួន១៩៥ ករណីផងដែរ ។

តំណាងរដ្ឋមន្រ្តីក្រសួងយុត្តិធម៌ លោក គឹម សន្តិភាព អនុរដ្ឋលេខាធិការ បានថ្លែងឲ្យដឹងថា យុទ្ធសាស្រ្តកំណែទម្រង់ច្បាប់ និង ប្រព័ន្ធយុត្តិធម៌ របស់រាជរដ្ឋាភិបាល ក្នុងអាណត្តិទី៥ នេះ បានកំណត់គោលដៅចំនួន៧សំខាន់ៗ ដែលក្នុងនោះការការពារ​សិទ្ធិ​បុគ្គល ក៏មានវត្តមាន នៅក្នុងយុទ្ធសាស្រ្តនេះផងដែរ។

លោកអនុរដ្ឋលេខាធិការបានថ្លែងទៀតថា ការផ្តល់ជំនួយផ្នែកច្បាប់ ដែលអនុវត្តដោយគណៈ​មេ​ធាវីក្តី ដែលអនុវត្តដោយ​អង្គ​ការ​ក្រៅ​​រដ្ឋាភិបាលក្តី ដោយស្ថាប័នរាជរដ្ឋាភិបាលក្តី​ ការងារ​ទាំងនេះ គឺជាចលករយ៉ាងសំខាន់ដែលជួយជំរុញ​ឲ្យការការពារ​សិទ្ធិ និងសេរីភាពរបស់ ប្រជាពលរដ្ឋគ្រប់ស្រទាប់ ។ លោកបានឲ្យដឹងផងដែរថា រាជរដ្ឋាភិបាល អាណត្តិទី៥នេះ​បាន​ផ្ទេរ​កញ្ចប់​ថវិការបស់គណៈមេធាវីដែលជួយដល់ជនក្រីក្រមកស្ថិតនៅក្រោមការគ្រប់គ្រងដោយផ្ទាល់របស់ក្រសួង។

សូមបញ្ជាក់ថា នេះជាលើកទី១ ហើយដែលមន្រ្តីរាជរដ្ឋាភិបាល ជាពិសេសក្រសួងយុត្តិធម៌ គណៈមេធាវីនៃព្រះរាជាណាច​ក្រ​កម្ពុជា ប្រធានតុលាការ ព្រះរាជអាជ្ញា មេធាវីការពារក្តី ជនក្រីក្រ អង្គការផ្តល់ជំនួយផ្នែកច្បាប់ និងម្ចាស់ជំនួយ (ក្នុងអាណត្តិ​ថ្មីរបស់ខ្លួន) មកជួបជុំគ្នា ពិភាក្សាពីយុទ្ធសាស្រ្ត ដែលអាចមានដើម្បី ធ្វើឲ្យកាន់តែប្រសើរ ដល់សេវាកម្មជំនួយផ្នែក​ច្បាប់ ដល់​ជនក្រីក្រ និងជនដែលងាយរងគ្រោះនៅកម្ពុជា ៕ ដោយ ៖សស្អាត