ភ្នំពេញ៖ ក្រុមមន្ត្រីត្រួតពិនិត្យថ្នាំជក់របស់ប្រទេសអាស៊ាន បានបើកកិច្ចពិភាក្សាជាមួយនិងកម្ពុជា កាលពីព្រឹកថ្ងៃពុធនេះ ដើម្បីស្វែងរកបទពិសោធន៍ ឆ្ពោះទៅលុបបំបាត់ការជ្រៀតជ្រែតពីឧស្សាហកម្មថ្នាំជក់ ដែលកំពុងបន្តធ្វើអាជីវកម្មនាពេលបច្ចុប្បន្ននេះ។
លោកវេជ្ជ មុំ គង់ នាយកប្រតិបត្តិអង្គការចលនា ដើម្បីសុខភាពកម្ពុជាមានប្រសាសន៏ថា ការចូលរួមប្រឆាំង និងទប់ស្កាត់ការជ្រៀតជ្រែកពីឧស្សាហកម្មថ្នាំជក់ ពីបណ្តាប្រទេសអាស៊ាននៅពេលនេះ គឺដើម្បីចូលរួមផ្តល់អនុសាសន៏ទប់ស្កាត់ការបាត់បង់អាយុជីវិត ដោយសាការជក់បារី។ លោកបន្តថា ជារៀងរាល់ឆ្នាំ នៅទូទាំងពិភពលោកមានមនុស្សប្រមាណ៦លាននាក់ ស្លាប់ដោយប្រើប្រាស់ថ្នាំជក់ ក្នុងនោះអ្នកមិនជក់បារី៦០០.០០០នាក់ស្លាប់ ដោយសារស្រូបផ្សែងបារីពីគេ។ តួលេខនៃការស្លាប់នេះ នឹងបន្តកើនឡើងរហូតដល់៨លាននាក់គិតត្រឹមឆ្នាំ២០១៣នេះ ប្រសិនបើគ្មានវិធានការមានប្រសិទ្ធិភាពទប់ស្កាត់ទាន់ពេលវេលានូវការរីករាលដាលនៃគ្រោះថ្នាក់មហន្តរាយនេះទេ។ លោកវេជ្ជមុំ គង់ បានបញ្ជាក់ថា នៅកម្ពុជាជារៀងរាល់ឆ្នាំមានប្រជាពលរដ្ឋប្រមាណជា១០.០០០ នាក់ស្លាប់ដោយសារជម្ងឺទាក់ទងនឹងថ្នាំជក់។
.jpg)
ឯកឧត្តម ម៉ម ប៊ុនហេង រដ្ឋមន្ត្រីក្រសួងសុខាភិបាលមានប្រសាសន៏ថា អង្គការសុខភាពពិភពលោកតែងរំលឹកដល់ប្រទេសជាសមាជិក នៃអនុសញ្ញាស្តីពីការត្រួតពិនិត្យថ្នាំជក់ដែលរាប់បញ្ចូលទាំងប្រទេសកម្ពុជាផងដែរឲ្យតាក់តែង និងអនុវត្តគោលនយោបាយ និងផែនការសកម្មភាពថ្នាក់ជាតិដោយអនុលោមតាមមាត្រា ៥.៣នៃអនុសញ្ញាស្តីពីការត្រួតពិនិត្យថ្នាំជក់និងគោលនយោបាយរបស់វា។ ឯឧ.បានបន្តថា ដោយសារថ្នាំជក់ជាផលិតផលបណ្តាលឲ្យអ្នកប្រើប្រាស់ស្លាប់ ទើបកើតមាននូវទំនាស់ ដែលមិនអាចផ្សះផ្សាបាន រវាងសុខភាពសារធារណៈ និងឧស្សាហកម្មថ្នាំជក់។ ហេតុដូច្នេះទើបគោលនយោបាយណែនាំរបស់មាត្រា៥.៣នៃអនុសញ្ញានេះ បានផ្តល់អនុសាសន៏ឲ្យប្រទេសសមាជិករបស់ខ្លួនបង្កើតវិធានការ ដើម្បីកាត់បន្ថយទំនាក់ទំនងជាមួយឧស្សាហកម្មថ្នាំជក់ និងធានានូវតម្លាភាពនៃទំនាក់ ទំនងដែលកើតឡើង៕ ដោយ៖ អភិរក្ស