ភ្នំពេញ៖ អនុរដ្ឋមន្ត្រី ការបរទេសជប៉ុន ឯកឧត្តម Shinsuke J.SUGIYAMA បានជួប ឯកឧត្តមឧបនាយករដ្ឋមន្ត្រី ហោ ណាំហុង រដ្ឋមន្ត្រីការបរទេសកម្ពុជា ដើម្បីនិយាយពី ការរៀបចំកិច្ចប្រជុំកំពូល រំលឹកខួបអនុស្សាវរីយ៍ លើកទី៤០ អាស៊ាន - ជប៉ុន នៅក្រុងតូក្យូ ប្រទេសជប៉ុន ចាប់ពីថ្ងៃទី១៣ដល់ ថ្ងៃទី១៦ខែធ្នូ និងកិច្ចប្រជុំកំពូលមេគង្គ អាស៊ាន លើទី៥។
លោកស្រី សឿង រដ្ឋចាវី រដ្ឋលេខាធិការក្រសួងការបរទេសបានប្រាប់អ្នកសារព័ត៌មានបន្ទាប់ពីជំនួបនោះថា ក្រៅពីកិច្ចប្រជុំអាស៊ាន-ជប៉ុន និងមេគង្គ-ជប៉ុន សមភាគីទាំងពីរក៏បាន ពិភាក្សាពី ដំណើរទស្សនកិច្ចផ្លូវការរបស់ សម្តេចអគ្គ មហាសេនាបតីតេជោ ហ៊ុន សែន នាយករដ្ឋមន្ត្រីកម្ពុជា ទៅកាន់ប្រទេសជប៉ុនផងដែរ ដើម្បីធ្វើអោយ ទស្សនៈកិច្ចនេះ សម្រេចជោគជ័យ បានធំធេង។
លោក ឧបនាយករដ្ឋមន្ត្រី ហោ ណាំហុង បានប្រាប់ភាគីជប៉ុនថា ជប៉ុនជាប្រទេសផ្តល់ជំនួយធំមួយ ដល់កម្ពុជា ក្នុងការជួយ កសាង ហេដ្ឋារចនាសម្ព័ន្ធ មាន ស្ពាន ផ្លូវ ជាដើម។ ដូច្នេះកម្ពុជាខិតខំពង្រឹងកិច្ចសហប្រតិបត្តិការថែមទៀត ដើម្បីទំនាក់ទំនងល្អរវាងប្រទេសទាំងពីរ។បើតាមស្ថានទូតជប៉ុនប្រចាំកម្ពុជា ជប៉ុនក៏បានធ្វើកិច្ច សហប្រតិបត្តិការជាមួយអង្គក្រៅរដ្ឋាភិបាល ដែលធ្វើក្នុងប្រទេសកម្ពុជាផងដែរ ដែលផ្តោតសំខាន់លើ វិស័យអប់រំកម្រិតមូលដ្ឋាន វិស័យសុខាភិបាល វិស័យកសិកម្ម និងសកម្មភាព បោសសំអាតមីន ៕ ដោយ ៖ រតនា