ភ្នំពេញ៖ ថ្មីត្បិតតែសង្គម មិនសូវផ្តល់តម្លៃអោយ ស្ត្រីផ្សព្វផ្សាយ ស្រាបៀរក៏ដោយ ប៉ុន្តែ មន្ត្រីជាន់ខ្ពស់ ក្រសួងកិច្ចការនារី អង្គការសង្គមស៊ីវិល និងផ្លូវច្បាប់បានផ្តល់តម្លៃ និង ការពារពួកគេ យ៉ាងពេញលេញ ព្រោះអ្នកទាំងនោះយល់ឃើញថា ការងារសុទ្ធតែថ្លៃថ្នូរទាំងអស់ ប៉ុន្តែទង្វើ របស់មនុស្សប៉ុណ្ណោះ ដែលនាំអោយយើងថ្លៃថ្នូរ ឬមិនថ្លៃថ្នូរ។
បន្ទាប់ពីចូលរួម បើកពិធីសម្ពោធ និងផ្សព្វផ្សាយ ជាផ្លូវការ អំពីគម្រោង «កន្លែងធ្វើការមានសុវត្ថិភាព និងសហគមន៍មានសុវត្ថិភាព»របស់ អង្គការឃែរ នៅ ថ្ងៃទី១៩ ខែធ្នូនេះ លោកស្រី ស៊ី ដេហ្វីន រដ្ឋលេខាធិការ ក្រសួងកិច្ចនារី បានប្រាប់អ្នកសារព័ត៌មានថា មិនមានកិច្ច ណាមួយ ដែលធ្វើអោយ មនុស្ស ថោកទាប ព្រោះការងារ នោះឡើយ ទោះបីស្ត្រីផ្សព្វផ្សាយ ស្រាបៀរក៏ដោយ។ដូច្នេះ ដើម្បីលុបបំបាត់ ការរើសអើងដល់ពួកគេ ដូចដែលធ្លាប់កើត មានក្នុងសង្គមជាយូរហើយនោះ យើងត្រូវស្វែងយល់ ទាំងអស់គ្នាថា ស្រ្តីនឹងបុរសមិន អាចកាត់ផ្តាច់គ្នាបានឡើយ គឺត្រូវការ ការផ្តល់តម្លៃឱ្យ គ្នាទៅវិញទៅមក។
លោក ឧត្តមសេនីយ៍ទោ ប៉ុល ភិធេយ្យ ប្រធាននាយកដ្ឋាន ប្រឆាំងការជួញដូរ មនុស្ស និងការពារអនីតិជន នៃក្រសួងមហាផ្ទៃ បានបង្ហាញការប្តេជ្ញាចិត្ត ក្នុងការការពារស្រ្តីផ្សព្វផ្សាយ ស្រាបៀរ តាមរយៈវិធានការផ្សេងៗក្នុងនោះ ក្រសួងបានបង្កើតលេខទូរស័ព្ទពិសេស ងាយស្រួល ចាំគឺ ១២៨៨ ដើម្បីឆ្លើយតប លើករណី អំពើជួញដូរមនុស្ស ការធ្វើអាជីវកម្ម ផ្លូវភេទ ការកេងប្រវ័ញ្ច កម្លាំងពលកម្ម និងអំពើហិង្សាលើស្ត្រីគ្រប់រូបភាព។
ក្នុងរបាយការណ៍សង្ខេប ស្តីពី កិច្ចសហការរវាងនាយកដ្ឋាន ប្រឆាំងការជួញដូរមនុស្ស និងការពារអនីតិជន របស់ក្រសួងមហាផ្ទៃបានបញ្ជាក់ថា ក្រសួងមហាផ្ទៃបានផ្សព្វផ្សាយអំពី ច្បាប់ក្រមព្រហ្មទណ្ឌដល់ ម្ចាស់ភោជនីយដ្ឋាន និងគ្រឹះស្ថានកំសាន្ត នៅក្នុងរាជធានីភ្នំពេញ និងតំបន់ព្រែកលាប ទាក់ទងមាត្រានានា ក្នុងក្រមព្រហ្មទណ្ឌ ក្នុងគោលបំណង ផ្តល់ចំណេះដឹងបន្ថែម និងលើកកម្ពស់ ការគាំទ្រដល់ស្ត្រីដែលធ្វើការក្នុងសេវាកំសាន្ត ក្នុងករណីជួបអំពើហិង្សា និងការរំលោភបំពាននានា។ ការផ្សព្វផ្សាយនេះ មានការចូលរួម ពីម្ចាស់ភោជនីយដ្ឋាន ចំនួន៥៧នាក់៕ដោយ ៖ រតនា