ភ្នំពេញ៖​គិតត្រឹមឆ្នាំ២០១១មក រដ្ឋាភិបាលបានបង្កើតការងារក្រៅពីវិស័យកសិកម្មបានចំនួ​​ន១.៦​លានកន្លែង ក្នុង​​នោះ កម្មករ និយោជិត ផ្នែកវាយនភ័ណ្ឌ កាត់ដេរ និងស្បែកជើងមានចំនួនជាង៥សែននាក់។ថ្លែងក្នុងពិ​ព័រណ៍​ការងារ​ថ្នាក់​ជាតិដែលប្រារព្ធធ្វើរយៈពេល២ថ្ងៃ គឺចាប់ពីថ្ងៃទី០២ដល់ថ្ងៃទី០៣ខែវិច្ឆិកាឆ្នាំ២០១៣នេះ លោក ពេជ សោភ័ន រដ្ឋ​លេខា​ធិការក្រសួងការងារនិងបណ្តុះបណ្តាលវិជ្ជាជីវៈ បានមានប្រសាសន៍ថា ការហូរ​ចូលនូវ​ការវិនិយោគ​ផ្ទាល់​ពី​បរទេស ជាមធ្យម៧០០លានដុល្លារ ក្នុងមួយឆ្នាំ និងបានបង្កើតការងារថ្មីក្នុងមួ​យ​ឆ្នាំប្រមាណ២សែនកន្លែង។

ក្រៅពីការងារក្នុងស្រុក រាជរដ្ឋាភិបាលបានខិតខំផងដែរ ក្នុងការស្វែងរកឱកាសការងារនៅ​បរទេសដែលមានប្រាក់​កម្រៃ​​​ខ្ពស់​ជូន​​​ប្រជាពលរដ្ឋបា​ន​​ចំនួនជាង១សែននាក់ ដោ​យ​​បាននាំចូលប្រាក់ចំណូលចូលមកក្នុងប្រទេស ជាង២០​០​លានដុល្លារ​ជាមធ្យមក្នុងមួ​យឆ្នាំ។ជាមួយគ្នានេះ រាជរដ្ឋាភិបាលក៏បានបង្កើតយន្តការផ្តល់សេវារក​កា​រ​​ងារជូន​ប្រជា​ពលរដ្ឋ ព្រមទាំងវេទិកាការងារ សំដៅបង្កភាពងាយស្រួលក្នុងការផ្លាស់ប្តូរ​ និងទទួលបានព័ត៌​មានទីផ្សារការងារ និង​ទទួលបានការងារធ្វើឆាប់រហ័ស និងចំណាយទាប។លើសពីនេះ រាជរដ្ឋាភិបាល បានខិតខំយ៉ាងសកម្មក្នុង​ការលើក​កម្ពស់​ការគោរពសិទ្ធិ លក្ខខន្ធការងារ និងភាពសុខដុមរមនាក្នុងទំនាក់ទំនងវិជ្ជាជីវៈ​តាមរយៈការជំរុញ​ដំឡើង​ប្រាក់​ឈ្នួល​អប្បបរមាពី៥០ទៅ៨០ដុល្លារ និងប្រាក់បំណាច់ផ្សេងៗប្រមាណ២០ដុល្លារក្នុងមួយខែ ការបង្កើនការធ្វើ​អធិការ​កិច្ច​ការ​ងារ ការផ្សះផ្សារវិវាទកាន់តែមានប្រសិទ្ធិភាព ព្រមទាំងការអនុវត្តកម្មវិធី រោងចក្រល្អប្រសើរ។

លោក ហុង ជឿន ប្រធានទីភ្នាក់ងារជាតិមុខរបរ និងការងារបានមានប្រសាសន៍ថា ពិព័រណ៍កាងារនេះ នឹងបើក​អោយ​មានការចូលរួមទស្សនាជាសាធារណៈរយៈពេល០២ថ្ងៃ គឺចាប់ពីថ្ងៃទី០២ដល់ថ្ងៃទី០៣ខែវិច្ឆិកាឆ្នាំ២០១៣ ចាប់​​​​ពី​ម៉ោង៨៖០០យប់ ហើយសង្ឃឹមថា នឹងមានអ្នកចូលរួមទស្សនាមកពីគ្រប់ទិសទីចំនួនប្រមាណ២០,០០០នាក់៕

ដោយ៖ រតនា