ភ្នំពេញ៖ សម្តេចព្រះអនុជ នរោត្តម អរុណរស្មី ប្រធានគណបក្សហ៊្វុនស៊ិនប៉ិច ជាឧត្តមទីប្រឹក្សាព្រះមហាក្សត្រ និងជាឯកអគ្គរាជទូតកម្ពុជាប្រចាំប្រទេសម៉ាឡាស៊ី បានយាងទៅបរិច្ចាកឈាម នៅមន្ទីរពេទ្យព្រះអង្គឌួង នាព្រឹកថ្ងៃចន្ទ ទី១៤ តុលា ដើម្បីឧទ្ទិសថ្វាយដល់ដួងព្រះវិញ្ញាណខ័ណ្ឌរបស់ព្រះបរមរតនកោដ ជាព្រះបិតា ដែលព្រះអង្គបានយាងសោយទិវង្គតអស់កាលមួយឆ្នាំគឺពីថ្ងៃទី១៥តុលា២០១២ដល់ ១៥ តុលា ២០១៣ និងជាការតបស្នងសងព្រះគុណដែលទ្រង់មានចំពោះជាតិមាតុភូមិ រួមទាំងញ្ញាតិវង្សានុវង្សផង។
នៅក្នុងបន្ទប់បរិច្ចាកឈាម សម្តេច ព្រះអនុជ នរោត្តម អរុណរស្មី មានសុវនីយ៍ថា ថ្ងៃនេះជាថ្ងៃបុណ្យ ខួបគំរប់មួយឆ្នាំនៃការយាងចូលទិវង្គត់របស់ព្រះបិតា ព្រះបរមរតនកោដ ហើយខ្ញុំពុំមានអ្វីថ្វាយព្រះអង្គទេ មានតែលោហិតនៅក្នុងខ្លួនដែលទ្រង់បានផ្តល់ឲ្យ ហើយពេលនេះខ្ញុំចែករំលែកបរិច្ចាកទៅជនរួមជាតិណាម្នាក់ ដែលលោកត្រូវការឈាមជាចាំបាច់ក្នុងការសង្រ្គោះជិវិត ។ ព្រះអង្គបន្តថា ខណៈនេះមានជនរួមជាតិច្រើនណាស់ដែលត្រូវការឈាមសម្រាប់សង្រ្គោះជីវិត ហើយការចូលរួមផ្តល់ឈាមពីយើងទាំអស់គ្នា គឺជាកាយវិការមនុស្សធម៌មួយដ៏សំខាន់បំផុត នៅពេលដែលយើងមានជីវិត មានសុខភាពល្អ និងអាចជួយដល់ជីវិតមនុស្សដោយមិនចំណាយប្រាក់។
សម្តេចរាជបុត្រី មានបន្ទូលទៀតថា ការបរិច្ចាគលោកហិតនេះ គឺជាមហាកិត្តិយសរបស់ព្រះអង្គ និងសមាជិក សមាជិការ យុវជន នៃគណបក្សហ៊្វុនស៊ិនប៉ិច រួមជាមួយប្រជាពលរដ្ឋទូទាំងប្រទេសដើម្បីជួយសង្រ្គោះជីវិតមនុស្ស។ ហើយព្រះអង្គរំពឹងថា នៅថ្ងៃនេះ តទៅថ្ងៃមុខ នឹងមានបងប្អូនប្រជាពលរដ្ឋ ក្រុមយុវជន ពិសេសសែរាជវង្សានុវង្សច្រើនឡើងថែមទៀតចូលរួមផ្តល់ឈាម ដើម្បីជួយសង្រ្គោះជនរងគ្រោះ ដែលពួកគេកំពុងតែត្រូវការឈាមជាបន្ទាន់លោកវេជ្ជបណ្ឌិត ហុក គឹមចេង ប្រធានមជ្ឈមណ្ឌលជាតិផ្តល់ឈាម បានមានប្រសាសន៍ថា ការយាងមកផ្តល់ឈាមរបស់សម្តេចរាជបុត្រី ព្រះអនុជ នរោត្តម អរុណរស្មី នាឱកាសនេះ គឺជាកាយវិការដ៏សប្បុរសធម៌របស់ព្រះរាជវង្សានុវង្ស និងជាគំរូល្អសម្រាប់ប្រជាពលរដ្ឋយើង ក្នុងការចូលរួមចំណែកបរិច្ចាគឈាមដើម្បីជួយសង្រ្គោះជីវិត។
លោកវេជ្ជបណ្ដិតបន្ថែមថា នាពេលបច្ចុប្បន្ននេះពុំសូវមានប្រជាពលរដ្ឋចូលរួមផ្តល់ឈាមនោះទេ បើទោះជាមានការផ្សព្វផ្សាយនូវព័ត៌មានទូលំទូលាយ និងមានអំពាវនាវពីក្រសួងសុខាភិបាល ក៏ដូចជាប្រមុខរាជរដ្ឋាភិបាលក្តី ក៏អារម្មណ៍ភ័យខ្លាចរបស់បងប្អូននៅតែមាន ដែលទាមទារឲ្យមានការបង្កើនការផ្សព្វផ្សាយបន្ថែមទៀតដើម្បីឲ្យមានទំនុកចិត្ត និង ឲ្យលោកយល់ថា ការផ្តល់ឈាមគឺជាផលប្រយោជន៍ក្នុងការជួយសង្រ្គោះអ្នកដែលត្រូវការឈាមនិងត្រូវ សង្រ្គោះ។លោកបញ្ជាក់ថា ជាទូទៅមន្ទីរនៅរាជធានីភ្នំពេញ ការប្រើប្រាស់ឈាមក្នុងមួយថ្ងៃគឺចាប់ពី៦០រហូតដល់១០០ កំប្លោក និង នៅទូទាំងប្រទេសគឺចាប់ពី១៥០កប្លោកឡើងទៅសម្រាប់ផ្តល់ដល់អ្នកជំងឺ។ ដោយឡែកចំពោះសប្បុរសជនរួមទាំងក្រុមគ្រួសារអ្នកជំងឺដែលបានមកផ្តល់ឈាមក្នុងមួយថ្ងៃៗមានត្រឹមតែ៨០ទៅ១០០នាក់ប៉ុណ្ណោះ។
សូមបញ្ជាក់ថា ចំពោះសប្បុរសជនដែលបានបរិច្ចាកឈាម មជ្ឈមណ្ឌលជាតិផ្តល់ឈាម បានផ្តល់ជូននូវកាតបរិច្ចាកឈាមមួយ ដែលធានាជួយដល់បុគ្គលដែលបានបរិច្ចាកនិងក្រុមគ្រួសារ ក្នុងរយៈពេលកំណត់មួយ។ ហើយការផ្តល់ឈាមត្រឹមត្រូវមិនធ្វើឲ្យប៉ះពាល់ដល់សុខភាពនោះ ទេ៕ដោយ៖ ស.ស្អាត