ភ្នំពេញ៖ ក្រសួងការបរទេសកម្ពុជា បានបដិសេធរបាយការណ៍ របស់ក្រសួងការបរទេស សហរដ្ឋអាមេរិក ស្តីពីបញ្ហាសិទ្ធិមនុស្សនៅកម្ពុជា ឆ្នាំ២០១៣ ជុំវិញដំណើរការបោះឆ្នោតជ្រើសតាំងតំណាងរាស្ត្រ ការធ្វើបាតុកម្ម និងព្រឹត្តិការណ៍ប៉ះទង្គិចគ្នា នៅស្ពានអាកាសក្បាលថ្នល់ និងនៅផ្លូវវ៉េងស្រេង ដែលបានបណ្តាលឲ្យមានអ្នកស្លាប់ និងរបួស រួមទាំងការចាប់ខ្លួនបាតុករនិងបញ្ហាផ្សេងទៀត គឺជាការមិនពិត។ អ្វីដែលរដ្ឋាភិបាលធ្វើ គឺជាការអនុវត្តទៅ តាម ផ្លូវច្បាប់។ ការច្រានចោលរបាយការណ៍នេះ បានធ្វើឡើង នៅថ្ងៃទី២៨ ខែកុម្ភៈ ឆ្នាំ២០១៤ បន្ទាប់ពីស្ថានទូតអាមេរិក ប្រចាំកម្ពុជា បានផ្សព្វផ្សាយនូវរបាយការណ៍ របស់ក្រសួងការបរទេសអាមេរិក ស្តីពីបញ្ហាសិទ្ធិមនុស្ស នៅកម្ពុជាឆ្នាំ២០១៣។ លោក កុយ គួង អ្នកនាំពាក្យក្រសួងការបរទេសកម្ពុជា បានមានប្រសាសន៍ថា ទាក់ទងការបោះឆ្នោត គឺបានដោះស្រាយរួចរាល់អស់ហើយ ហើយការចោទប្រកាន់ របស់គណបក្សប្រឆាំង កន្លងមក ក៏បានដោះស្រាយរួចរាល់ហើយដែរ។ ដោយបានធ្វើការដោះស្រាយ តាមរយៈគណៈកម្មាធិការជាតិរៀបចំការបោះឆ្នោត និងតាមរយៈក្រុមប្រឹក្សាធម្មនុញ្ញ គេបានពិនិត្យចប់សព្វគ្រប់អស់ហើយ ដូចជាអត់មានអ្វី ដែលនៅសេសសល់ទៀតទេ។
.jpg)
ចំពោះការចោទប្រកាន់ មកលើរដ្ឋាភិបាលកម្ពុជា រឿងបង្ក្រាបនៅស្ពានអាកាសក្បាលថ្នល់ និងនៅផ្លូវវ៉េងស្រេង ត្រូវបានអ្នកនាំពាក្យរូបនេះបញ្ជាក់ថា រឿងហ្នឹង គ្រាន់តែជាការអនុវត្តច្បាប់ របស់រាជរដ្ឋាភិបាល តែប៉ុណ្ណោះឯង ពីព្រោះយើងអនុវត្តទៅតាមច្បាប់ បាតុកម្ម ដោយសន្តិវិធី ។ ដូច្នេះយើងមិនអនុញ្ញាត ឲ្យមានបាតុកម្មណា ដែលបង្កទៅជាអំពើហិង្សាទេ។ លោកលើកឡើងទៀតថា រដ្ឋាភិបាលកន្លងមក ដូចលោកឧបនាយករដ្ឋមន្ត្រី ហោ ណាំហុង រដ្ឋមន្ត្រីក្រសួងការបរទេសកម្ពុជាបានមានប្រសាសន៍ កាលពីជួបជាមួយរដ្ឋមន្ត្រីការបរទេសអូស្ត្រាលី នាពេលកន្លងមកថា ពីមុននិងមកដល់ឥឡូវ និងទៅមុខទៀត រដ្ឋាភិបាលកម្ពុជា បាននឹងកំពុងធ្វើ នឹងធ្វើ អនុលោមទៅតាមច្បាប់រដ្ឋធម្មនុញ្ញ និងច្បាប់នៃប្រទេសកម្ពុជាទាំងអស់ អត់មានអ្វីដែលថា ខុសច្បាប់ទេ គឺយើងធ្វើដោយអនុវត្តទៅតាមច្បាប់ប្រទេសតែប៉ុណ្ណោះ៕
ដោយ៖ ស.ស្អាត