ភ្នំពេញ : មន្ត្រីរដ្ឋាភិបាល ភ្នាក់ងារអង្គការសហប្រជាជាតិ អង្គការក្រោរដ្ឋាភិបាល ភ្នាក់ងារអ្នកផ្តល់ជំនួយនិង
វិស័យឯកជនពាក់ព័ន្ធ បានធ្វើការរួមគ្នាកសាងផែនការសកម្មភាពយុទ្ធសាស្ត្រសម្រាប់កាត់បន្ថយហានិភ័យគ្រោះមហន្តរាយ ឆ្នាំ២០១៤-២០១៨។សិក្ខាសាលានេះត្រូវបានអ្នកគ្រប់គ្រងកម្មវិធីសង្ឃឹមថា នឹងផ្តល់ជាវេទិកាដល់អ្នកពាក់ព័ន្ធទាំងរដ្ឋ និងវិស័យឯកជនពិភាក្សាកំណត់អាទិភាព បញ្ចេញគំនិតនិងប្រមូលព័ត៌មានសម្រាប់កសាងផែនការសកម្មភាពយុទ្ធសាស្ត្រសម្រាប់កាត់បន្ថហានិភ័យគ្រោះមហន្តរាយ។
ឯកឧត្តម ប៉ុន ណារិទ្ធិ អគ្គលេខាធិការនៃគណៈកម្មាធិការជាតិគ្រប់គ្រងគ្រោះមហន្តរាយ បានមានប្រសាសន៍
ថា ការបាត់បង់ដោយគ្រោះមហន្តរាយកើតមានកាន់តែញឹកញាប់ និងធ្ងន់ធ្ងរឡើងនៅក្នុងការរស់នៅ និងប៉ះពាល់ដល់ជីវភាពរស់នៅរបស់បុគ្គលនានា ជាពិសេសអ្នកក្រីក្រដែលពិបាកទទួលបានពីការអភិវឌ្ឍ។ កត្តា
ទាំងអស់នេះហើយ បានជាហានិភ័យនៃគ្រោះមហន្តរាយគឺជាកង្វល់ដ៏ធំរបស់រដ្ឋាភិបាល ព្រោះផលប៉ះពាល
នៃគ្រោះមហន្តរាយមានការផ្លាស់ប្តូរពីតំបន់មួយទៅតំបន់តាមលក្ខណៈប្រទាក់ក្រឡាគ្នា ហើយវាអាចនឹងផ្តល់
ផលប៉ះពាល់ទូទាំងប្រទេសនៅពេលខាងមុខផងដែរ ។
ដូច្នេះ ជាការជៀសមិនរួច ការគ្រប់គ្រងគ្រោះហានិភ័យត្រូវតែមានការចូលរួមពីគ្រប់ក្រសួងមន្ទីរទាំងអស់មិនអាចទំលាក់ការទទួលខុសត្រូវទៅលើអ្នកណាម្នាក់បានឡើយ។យ៉ាងណាក៏ដោយ បើតាមឯកឧត្តម ប៉ុន ណារិទ្ធិ ការបញ្ជៀបការយល់ដឹងពី គ្រោះមហន្តរាយទើបតែធ្វើបានលើក្រសួងមួយចំនួនប៉ុណ្ណោះដូចជា ក្រសួងការពារជាតិ ក្រសួងកសិកម្ម និងក្រសួងធនធានទឹក និងឧតុនិយមជាដើម ។ សម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា កាលពីថ្ងៃទី២៥ ខែកញ្ញា ឆ្នាំ២០១៣នេះ បាន អំពាវនាវដល់ ប្រជាពលរដ្ឋ អោយមានការប្រុងប្រយ័ត្ន ចំពោះសុវត្ថិភាពក្រុមគ្រួសារ ហើយអាជ្ញាធរគ្រប់ជាន់ ថ្នាក់ ទាំងអស់ ត្រូវប្រុងប្រយ័ត្នក្នុងការយកចិត្តទុកដាក់ខ្ពស់ ជួយសង្គ្រោះប្រជាពលរដ្ឋ អោយបានទាន់ពេលវេលា។ តាមតួលេខពី លោក កែវ វី
នាយកខុទ្ទកាល័យ គណៈកម្មាធិការជាតិគ្រប់គ្រង គ្រោះមហន្តរាយបានអោយដឹងថា ចាប់តាំងពីមាន គ្រោះទឹកជំនន់ បានកើតមានឡើងដោយ រាប់ចាប់ពីខែសីហា រហូតដល់ខែកញ្ញា ឆ្នាំ២០១៣នេះមានមនុស្ស ស្លាប់ចំនួន២០នាក់ហើយ ៕ ដោយៈ រតនា