ភ្នំពេញ ៖ យុវជនក្រុមខ្មែរម៉ូតូស្ពត( KSB) នៅរសៀលថ្ងៃទី២៧ខែមេសានេះបាននាំយកនូវសម្ភារៈ​សិក្សានិងថវិកាទៅផ្តល់ជូនមជ្ឈមណ្ឌលមែកឈើស្ថិតនៅភូមិខាងលិចវត្តសង្កាត់កំបូលខណ្ឌ​ពោធិ៍សែនជ័យដើម្បីជួយរំលែកការខ្វះខាតមួយចំនួននៅក្នុងមណ្ឌល។

លើកឡើងនៅក្នុងឱកាសនោះប្រធានមជ្ឈមណ្ឌលមែកឈើលោកប៊ុតតុកសិលាបានឲ្យដឹងថាមជ្ឈមណ្ឌល មែកឈើបានបង្កើតឡើងតាំងពីឆ្នាំ១៩៩៤មកម៉្លេះហើយបានទទួលក្មេងកំព្រាមកចិញ្ចឹម​បីបាច់ថែរក្សាពីគ្រប់ខេត្តក្រុងមកដល់ពេលនេះមានក្មេងនៅក្នុងមណ្ឌលនេះខ្លះបានចេញទៅបន្តការ​សិក្សានៅសកលវិទ្យាមានបរិញ្ញាប័ត្របរិញ្ញាប័ត្ររងជាច្រើននាក់និងមានកុមារកំព្រានៅក្នុងមណ្ឌលចំនួន ៩៤នាក់ កំពុងស្ថិតក្រោមការគ្រប់គ្រងព្រមទាំងអ្នកមើលថែនិងបង្ហាត់បង្រៀនជំនាញចំនួន១៩​នាក់ទៀត។ ដូចនេះមជ្ឈមណ្ឌលមានការជួបប្រទះនូវការខ្វះខាតដែលទាមទាឲ្យមានការជួយឧបត្ថម្ភគាំទ្រពី​សប្បុរសជនទាំងក្នុងនិងក្រៅប្រទេសដើម្បីបានជួយដល់កុមារកំព្រានិងជនគ្មានទីពឹងទទួល​បានជំនាញនិងចំណេះដឹងសំរាប់ជីវិតរបស់គេនៅពេលអនាគត។

លោកប៉ាងយោងថាមពលអនុប្រធានក្រុមខ្មែរម៉ូតូស្ពតបានឲ្យដឹងថាអំណោយសំរាប់ចែកជូន​ប្អូនៗកុមារកំព្រារួមមាន​ប៊ិចសៀវភៅខ្មៅដៃជ័រលុបគូល័រថវិកាម្នាក់មួយម៉ឺនរៀលបុគ្គលិក១៩នាក់​ម្នាក់ៗទទួលបាន៣ម៉ឺនរៀលនិង​បានប្រគល់ថវិកាចំនួន១លានរៀលដល់មជ្ឈមណ្ឌល​សំរាប់ទិញ​ម្ហូបអាហារប្រចាំថ្ងៃសរុបជាទឹកប្រាក់មានចំនួន៤លានរៀល។ថវិកាទាំងនេះបានមកពីទឹកចិត្តសប្បុរសរបស់​សមាជិកក្នុង​ក្រុមនិងមួយផ្នែក​ទៀតបានមកពីការជួយឧបត្ថម្ភរបស់ក្រុមហ៊ុនថប់វ័ន(Top One)។

ប្រធានក្រុមខ្មែរម៉ូតូស្ពតលោកធីខេមរិនបានលើកឡើងថា ក្នុងនាមលោកផ្ទាល់និងសមាជិក​ក្នុងក្រុម​មានចិត្តរីករាយខណៈបាននាំគ្នាធ្វើមូលនិធិមនុស្សធម៌ដោយបានបរិច្ចាកនូវថវិកាបន្តិចបន្តួចតាមលទ្ធភាព​ដែលខ្លួនមានចំពោះអ្នកក្រខ្សត់គ្មានទីពុំនាក់អាស្រ័យពិសេសប្អូនៗជាកុមារកំព្រានៅទីនេះ។ថ្វីត្បិតតែថវិកា​នេះតិចតួចក៏ដោយតែវាជាទឹកចិត្តក្នុងការចូលរួមចែករំលែកការខ្វះខាតការលំបាករបស់ប្អូនៗនិងមណ្ឌល​ដែលកំពុងតែមើលថែទាំកុមារកំព្រាជាច្រើននាក់។

លោកធីខេមរិនបានផ្តាំផ្ញើដល់ប្អូនៗកុមារកំព្រាទាំងអស់កុំឲ្យអស់សង្ឃឹមត្រូវតែមាន​ភាពជឿជាក់​លើខ្លួនឯងដោយខិតខំរៀនសូត្រស្តាប់បង្គាប់អ្នកមើលការខុសត្រូវនិងប្រតិបត្តិខ្លួនឲ្យបានល្អជាពលរដ្ឋល្អ​ក្នុងសង្គមចៀសឲ្យឆ្ងាយពីគ្រឿងញៀនរួមគ្នាគោរពច្បាប់ដើម្បីឲ្យប្រទេសយើងមានភាពល្បីល្បាញកាន់តែ​ខ្លាំងនៅក្នុងតំបន់និងលើពិភពលោក។

គួរបញ្ជាក់ផងដែរថានេះជាលើកទី៥ហើយដែលក្រុមខ្មែរម៉ូតូស្ពតបានរួមគ្នាធ្វើមូលនិធិសំរាប់ជួយដល់កុមារ​កំព្រាបន្ទាប់ពីបានជួយដល់មន្ទីរពេទ្យគន្ធបុប្ផាកាលពីប៉ុន្មានខែមុននេះ។ក្រុមខ្មែរម៉ូតូស្ពតមានគម្រោង​នឹងរួមគ្នាបន្តធ្វើមូលនិធិមនុស្សធម៌នេះឲ្យបានច្រើនថែមទៀតដើម្បីចូលរួមចំណែកកាត់បន្ថយការលំបាក​របស់ជនទីទ័លក្រនិងកុមារកំព្រាពិសេសកាត់បន្ថយភាពក្រីក្រនៅក្នុងសង្គម៕

ដោយ​ ស.ស្អាត