ភ្នំពេញ៖ សេចក្តីរាយការណ៍ពីមន្ត្រីប្រចាំច្រកព្រំដែនមួយចំនួនបានឲ្យដឹងថា ជាធម្មតាឧកញ៉ា ស៊ិន ឃីម បាននាំចូលប្រេង សាំងមកពីស្រុកសៀមទៅតាមសំណើពិសេសមួយដែលមានការឯកភាពពីអភិបាលខេត្តប៉ៃលិនឲ្យយកមកប្រើប្រាស់នៅតាមតំបន់ព្រំដែនប៉ុន្តែស្ថានភាពនៃការនាំចូលប្រេងសាំងជាក់ស្តែងឧកញ៉ា ស៊ិន ឃីមនាំចូលលើសចំនួនកំណត់ ម្តងៗរាប់រយតោនឯណោះគេមិនដែលឃើញជំនាញធ្វើការត្រួតពិនិត្យឬទប់ស្កាត់ពីបញ្ហានេះម្តងណាឡើយមិនដឹងជាមានអាថ៌កំបាំងអ្វីទេ។
ជាគោលការណ៍ឧកញ៉ា ស៊ិន ឃីមទទួលបានការអនុញ្ញាតឲ្យនាំចូលប្រេងសាំងមកប្រើប្រាស់ឬចែកចាយតែក្នុងបរិវេណទឹកដីខេត្តប៉ៃលិន ប៉ុណ្ណោះ ក្នុងចំនួនកំណត់មួយ ប៉ុន្តែឧកញ៉ាស៊ិន ឃីមក៏បានឃុបឃិតផ្តល់ផលប្រយោជន៍ឲ្យជំនាញគយនិងសមត្ថកិច្ចពាក់ព័ន្ធទើបអាចនាំចូលប្រេងសាំងតាមខេត្តប៉ៃលិនលើសចំនួនដែលបានកំណត់ម្តងៗរាប់រយតោនហើយបន្តយកទៅលក់ចែកចាយដល់បណ្តាស្រុកមួយចំនួនលើទឹកដីខេត្តបាត់ដំបងដូចជាស្រុកកំរៀង និងស្រុកភ្នំព្រឹកជាដើមមិនដែលមាននរណាហ៊ានបង្រ្កាបនោះទេ ព្រោះក្រុមសមត្ថកិច្ចគ្រាន់តែឮថា ប្រេងរបស់លោកឧកញ៉ា ស៊ិន ឃីម ម្នាក់ៗទើបចូលទៅវិញអស់ ហើយ។
ប្រភពដដែលបានឱ្យដឹងទៀតថាក្នុងមួយខែៗចំណូលថវិកាជាតិត្រូវបានបាត់បង់ច្រើនសន្ធឹកសន្ធាប់ដោយសារតែអំពើរត់ពន្ធប្រេងសាំងរបស់ឧកញ៉ាស៊ិន ឃីមតាមច្រកព្រំដែនខេត្តប៉ៃលិនយកទៅចែកចាយដល់បណ្តាស្រុកជាច្រើនក្នុងខេត្តបាត់ដំបងមិនដែលមានសមត្ថកិច្ចឬមន្ត្រីជំនាញចាត់វិធានការបង្ការបង្ក្រាបឲ្យមានប្រសិទ្ធភាពម្តងណាឡើយ ទុកឲ្យឧកញ៉ា ស៊ិន ឃីមធ្វើអ្វីៗតាមតែអំពើចិត្ត។ គេមិនដឹងថាជំនាញគយប្រចាំច្រកព្រំដែនរបស់លោក លឹម សម្បត្តិ និងប្រធានសាខាគយ ខេត្តប៉ៃលិន លោក អ៊ុក វណ្ណច័ន្ទទទួលបានផលប្រយោជន៍ពីជំនួញប្រេងសាំងគេចពន្ធរបស់ឧកញ៉ា ស៊ិន ឃីម ប៉ុន្មាននោះទេ ក្នុងមួយខែៗ ប៉ុន្តែគេដឹងថាមេគយចល័តម្នាក់ដែលគ្រាន់តែបិទភ្នែកមើលមិនឃើញការរត់ពន្ធប្រេងសាំងរបស់ឧកញ៉ា ស៊ិនឃីម ទទួលបានរបបប្រចាំខែមិនតិចជាង៤ម៉ឺនដុល្លារនោះទេ។
ឧកញ៉ា ស៊ិន ឃីម ត្រូវបានគេរាយការណ៍ឱ្យដឹងថា គាត់បានប្រកបអាជីពនាំចូលប្រេងសាំងគេចពន្ធហើយបើបង់ពន្ធវិញយ៉ាងច្រើនបំផុតត្រឹម៦០ភាគរយប៉ុណ្ណោះ ហើយជំនាញគយគ្រប់ជាន់ថ្នាក់សុទ្ធតែទទួលបានរបបប្រចាំខែពីឧកញ៉ា ស៊ិន ឃីម ជាទៀងទាត់ទើបអ្វីៗអាចដំណើរការដោយរលូនល្អហើយគេមិនដឹងថាឧកញ៉ា ស៊ិន ឃីម មានខ្នងបង្អែកធំប៉ុនណាទេទើបគាត់អាចបង្កព្យុះភ្លៀងតាមតែអំពើចិត្តក្នុងការនាំចូលប្រេងសាំងបង់ពន្ធមិនគ្រប់មកលក់ចែកចាយតាមតំបន់ព្រំដែនយ៉ាងអនាធិបតេយ្យ។
ក្រៅពីជំនួញនាំចូលប្រេងសាំងបង់ពន្ធមិនគ្រប់ឧកញ៉ា ស៊ិន ឃីមបានធ្វើជាមេការគ្រប់គ្រងកាស៊ីណូដល់ទៅពីរបីកន្លែងតាមតំបន់ព្រំដែន ហើយពេលខ្លះទៀត ឧកញ៉ា ស៊ិន ឃីមបានយកឈ្មោះអ្នកតំណាងរាស្ត្រនិងជាភរិយាអភិបាលខេត្តប៉ៃលិនទៅប្រើប្រាស់ក្នុងការបំភិតបំភ័យគំរាមកំហែងមន្ត្រីនិងសមត្ថកិច្ចមួយចំនួនមិនឲ្យកោសរូសឬរំខានជំនួញរកស៊ីមិនស្របច្បាប់របស់ខ្លួនផងដែរ។ គេមិនច្បាស់ទេថាតើឧកញ៉ា ស៊ិន ឃីម មានទំនាក់ទំនងអ្វីជាមួយថ្នាក់ណាខ្លះទេ។
ប្រភពព័ត៌មានបានឱ្យដឹងថា នៅប៉ៃលិន និងបាត់ដំបងឈ្មួញដែលរកស៊ីនាំប្រេងគេចពន្ធធំជាងគេ គឺលោកឧកញ៉ា ស៊ិន ឃីម ដែលឧកញ៉ារូបនេះ ត្រូវបានគេរាយការណ៍ថា មានឥទ្ធិពលមានអំណាចលុយកាក់គ្របលើសមត្ថកិច្ចខេត្តទាំងពីរនេះ ធ្វើឱ្យសមត្ថកិច្ចទាំងនោះ ធ្វើអ្វីគាត់មិនកើតដោយសារតែឧកញ៉ារូបនេះជាអ្នកឧបត្ថម្ភលុយកាក់ ដាក់ហោប៉ៅឱ្យពួកគេយកទៅស្អំ មេជើង មេដៃ ស្រីញីអូនបងបានយ៉ាងសប្បាយរាល់ខែៗតែម្តង តាំងពីថ្នាក់លើ ដល់ថ្នាក់ក្រោម។
ពិសេសជាមួយលោក ស្រី បាន ស្រីមុំដែលបច្ចុប្បន្នជាអ្នកតំណាងរាស្ត្រប្រចាំខេត្តបៃលិនភរិយា លោក អ៊ី ឈាន អភិបាលខេត្តប៉ៃលិន ហើយដែលកន្លងមកលោកស្រីដ៏ល្បីល្បាញធ្លាប់ប្រឡូកក្នុងការរកស៊ីដឹកជញ្ជូនទំនិញបង់ពន្ធមិនគ្រប់តាមខេត្តប៉ៃលិននោះ ប៉ុន្តែជាញឹកញាប់គេមិនដែលឃើញលោកស្រី បាន ស្រីមុំមានប្រតិកម្មចំពោះរឿងដែលឧកញ៉ា ស៊ិន ឃីមយកឈ្មោះរបស់លោកជំទាវទៅប្រើប្រាស់នោះទេ ធ្វើឲ្យគ្រប់ៗគ្នាសង្ស័យថាជំនួញរកស៊ីនាំចូលប្រេងសាំងបង់ពន្ធមិនគ្រប់របស់ឧកញ៉ា ស៊ិន ឃីមទំនងជាមានភាគហ៊ុនរបស់លោកជំទាវភរិយា អភិបាលខេត្តប៉ៃលិនហើយមើលទៅ។
ពាក់ព័ន្ធទៅនឹងការចោទប្រកាន់ខាងលើនេះ សារព័ត៌មានអរិយធម៌បានព្យាយាមទំនាក់ទំនងសុំការបំភ្លឺពីលោកឧកញ៉ា ស៊ិន ឃីម លោក លឹម សម្បត្តិ លោក អ៊ុក វណ្ណច័ន្ទ និងលោកជំទាវ បាន ស្រីមុំ ដែរ ប៉ុន្តែទូរស័ព្ទសុទ្ធតែទំនាក់ ទំនងមិនបាន។ ក្នុងរឿងហ្នឹងទោះបីជាយ៉ាងណាក៏សារព័ត៌មានយើងខ្ញុំ នៅរង់ចាំការបកស្រាយណាមួយពីអ្នកទាំងអស់គ្នា៕
ដោយ៖ ភីនរ៉ា