ភ្នំពេញ: រដ្ឋាភិបាលបានប្រកាសផ្អាករៀបចំបុណ្យអុំទូកសារថ្មី បន្ទាប់ពីការផ្អាកពីរឆ្នាំជាប់គ្នាកន្លងមក ដោយសារឆ្នាំនេះកម្ពុជាបានរងគ្រោះទឹកជំនន់យ៉ាងធ្ងន់ធ្ងរនិងខូចខាតទ្រព្យសម្បត្តិប្រជាពលរដ្ឋច្រើន តម្រូវអោយរដ្ឋាភិបាលត្រូវដោះស្រាយបញ្ហាចំពោះមុខនេះជាអាទិភាព។
នេះជាលើកទីបីហើយដែលរដ្ឋាភិបាលកម្ពុជាផ្អាកការប្រារព្ធព្រះរាជពិធីបុណ្យអុំទូក បណ្តែបប្រទីប អកអំបុក និងសំពះព្រះខែ នៅរាជធានីភ្នំពេញ។យោងតាមសារាចររបស់រាជរដ្ឋាភិបាលលេខ ០៥ ស.រ ចុះហត្ថលេខាដោយសម្តេចអគ្គមហាសេនាបតី តេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា កាលពីថ្ងៃទី០៦ខែតុលា បានអោយដឹងថា តាមទម្លាប់រដ្ឋាភិបាលតែងរៀបចំបុណ្យអុំទូករយៈពេលបីថ្ងៃនៅតាមដងទន្លេសាបនៅមុខព្រះរបមរាជវាំង និងនៅតាមបណ្តាខេត្តមួយចំនួន ដើម្បីបន្តរក្សាទំនៀមទំលាប់ប្រពៃណីជាតិដែលមានជាយូរលង់ណាស់មកហើយ។
ដោយឡែកឆ្នាំនេះ ស្ថានភាពទឹកជំនន់ទន្លេមេគង្គមានសភាពធ្ងន់ធ្ងរ ដែលបណ្តាលអោយ វត្តអារាម មន្ទីរពេទ្យ ផ្ទះសម្បែងរបស់ប្រជាពលរដ្ឋ ផលដំណាំ និងសត្វពាហនៈជាច្រើនត្រូវរងការបំផ្លិចបំផ្លាញនិងធ្វើអោយប្រជាពលរដ្ឋក្នុងតំបន់រងការលិចលង់មួយចំនួនបាត់បង់ជីវិតផងដែរ។ដូច្នេះដើម្បីប្រមូលកម្លាំង ដោះស្រាយបញ្ហាប្រឈមទាំងនេះ រដ្ឋាភិបាលបានធ្វើការណែនាំចេញជាគោលការណ៍៤ចំណុចគឺ៖ ១.ផ្អាកការប្រារព្ធព្រះរាជពិធីបុណ្យអុំទូក បណ្តែបប្រទីប អកអំបុក និងសំពះព្រះខែ នៅតាមដងទន្លេសាបមុខព្រះបរមរាជវាំងរាជធានីភ្នំពេញដែលគ្រោងនឹងប្រព្រឹត្តិទៅនៅថ្ងៃទី១៦, ១៧និង១៨ខែវិច្ឆិកាឆ្នាំ២០១៣។២.ការរៀបចំព្រះរាជពិធីបុណ្យអុំទូក បណ្តែបប្រទីប អកអំបុក និងសំពះព្រះខែនៅតាមទីកន្លែងដទៃទៀតអាចប្រព្រឹត្តិទៅជាធម្មាតា តាមទំនៀមទម្លាប់ប្រពៃណី និងតាមលទ្ធភាពរបស់ប្រជាពលរដ្ឋ។៣.ការឈប់សំរាករបស់មន្ត្រីរាជការ និយោជិតកម្មករចំនួនបីថ្ងៃនៅក្នុងពិធីនេះ នៅរក្សាដដែល។និង៤.គ្រប់ក្រសួង ស្ថាប័ន រាជធានី និងខេត្តត្រូវបន្តយកចិត្តទុកដាក់ត្រូវបន្តប្រុងប្រយ័ត្នយកចិត្តទុកដាក់ខ្ពស់ក្នុងការជួយសង្គ្រោះដល់ប្រជាពលរដ្ឋរងគ្រោះ ដើម្បីដោះស្រាយកង្វះខាតស្បៀង ជម្រក ថ្នាំពេទ្យ និងត្រូវយកចិត្តទុកដាក់ស្តារឡើងវិញ នូវដំណាំស្រូវ ដំណាំផ្សេងៗ និងហេដ្ឋារចនាសម្ព័ន្ធដែលបានរងការខូចខាត។
យោងតាមរបាយការណ៍ទិន្នន័យប៉ះពាល់ និងខូចខាត ដោយជំនន់ទឹកភ្លៀងលើកទី២ និងជំនន់ទន្លេមេគង្គ របស់ គណៈកម្មាធិការជាតិគ្រប់គ្រងគ្រោះមហន្តរាយ គិតត្រឹមថ្ងៃទី៣០ខែកញ្ញា ជំនន់ទឹកភ្លៀង និងជំនន់ទន្លេមេគង្គ បាន និងកំពុងវាយប្រហារ ខេត្ត-ក្រុងមួយចំនួននៅកម្ពុជា ក្នុងនោះ មានខេត្តព្រះវិហារ, កំពង់ធំ, បន្ទាយមានជ័យ, សៀមរាប, ឧត្តរមានជ័យ, កំពង់ចាម, ក្រចេះ, ស្ទឹងត្រែង, ព្រៃវែង, កណ្តាល, ព្រះសីហនុ, រតនគិរី និងរាជធានីភ្នំពេញ ដែលធ្វើអោយប៉ះពាល់ដល់ស្រុកចំនួន៦៦ និងឃុំចំនួន ៣០០ ក្នុងចំណោមបណ្តាខេត្ត-ក្រុងនានា ។របាយការណ៍បន្តថា គ្រោះទឹកជំនន់ទាំង១៣ខេត្ត-ក្រុងនេះ មានប្រជាពលរដ្ឋចំនួន ១០០.៣៣៤ គ្រួសារ បានរង ផលប៉ះពាល់ និងប្រជាពលរដ្ឋចំនួន ៩.៩៥៦គ្រួសារ ត្រូវបានក្រុមអាជ្ញាធរជួយសង្គ្រោះ និងបានជម្លៀសចេញ ទៅរកទីទួលមានសុវត្ថិភាព។ ក្នុងនោះ មានផ្ទះរបស់ប្រជាជនចំនួន ៨៩.១៨៦ខ្នង បានរងការប៉ះពាល់ និងធ្វើអោយ ផ្ទះចំនួន ២៩ខ្នងទៀត បានខូចខាត និងធ្វើឲ្យមនុស្សចំនួន ៣៩នាក់ បានស្លាប់បាត់បង់ជីវិត ហើយមិនបានធ្វើ អោយមនុស្សណាម្នាក់ រងរបួសនោះទេ ។របាយការណ៍បន្ថែមថា ចំពោះសាលារៀន ដែលរងផលប៉ះពាល់ មានចំនួន ៥៣៣ខ្នង, វត្តអារាមចំនួន២៩១ និង មន្ទីរពេទ្យចំនួន ២៩ផងដែរ ហើយសត្វពាហនៈ ដែលត្រូវបានគេជម្លៀសចេញមានចំនួន ១៧.០៣៣ក្បាល និង មានសត្វពាហនៈងាប់ចំនួន ៣៤ក្បាល។ សន្ទូងដែលបានប៉ះពាល់មានចំនួន៩៨.២២៧ហិកតា។ ចំពោះសំណាប ដែលបានខូចខាតមានចំនួន ៣៥៧ហិកតា និងប៉ះពាល់ដំណាំផ្សេងៗ ចំនួន ៥.៣៤៧ហិកតា ពុំមានការខូចខាត ឡើយ។ ដោយឡែកផ្លូវជាតិ និងខេត្ត ប៉ះពាល់ចំនួន ៤៥.២៨២ម៉ែត្រ ពុំមានការខូចខាតទេ ហើយផ្លូវលំបាន ប៉ះពាល់ចំនួន ៧៤៤.២៣២ម៉ែត្រ មិនមានការខូចខាតឡើយ។ប្រភពខាងលើបញ្ជាក់ថា ស្ពានលិចមានចំនួន ១៣៣កន្លែង និងប៉ះពាល់ទំនប់ចំនួន ៩០កន្លែងនៅ ខេត្តកណ្តាល ឧត្តរមានជ័យ៥កន្លែង កំពង់ចាម១៤កន្លែង ហើយមានច្រាំងបាក់មួយកន្លែងនៅខេត្តកណ្តាល និងខេត្តកំពង់ចាម ១កន្លែង លិចស្ពានចំនួន ២កន្លែង និងនៅខេត្តក្រចេះ លិចស្ពានចំនួន ៣៨៥កន្លែង ៕ ដោយ៖ រតនា