ភ្នំពេញៈ គណបក្សសង្គ្រោះជាតិបានប្រកាសជំហរជាថ្មីម្តងទៀតគោរពតាម ឆន្ទៈរាស្ត្រនិងនៅតែបន្តរកយុត្តិ ធម៌ជូនម្ចាស់ឆ្នោតបន្តទៀត។នេះបើតាមការលើកឡើងរបស់លោក សម រង្ស៊ី និង លោក កឹម សុខាក្នុងពិធីប្រារព្ធ គោរពវិញ្ញាណក្ខន្ធក្រុមបាតុករដែលបានបាត់បង់ជីវិតក្នុងមហាបាតុកម្មកាលពីថ្ងៃទី៣០ខែមិនាឆ្នាំ១៩៩៧នៅព្រឹកថ្ងៃទី៣០ កញ្ញា ឆ្នាំ២០១៣នៅមុខស្ថូបចេតិយមុខរដ្ឋសភាចាស់ ។ លោក កឹម សុខា អនុប្រធានគណបក្សសង្គ្រោះជាតិមានប្រសាសន៍ថា គោលជំហរបស់គណបក្ស សង្គ្រោះជាតិនៅតែគោរពឆន្ទៈរបស់ប្រជាពលរដ្ឋដែលបោះឆ្នោតជូនគណបក្សសង្គ្រោះជាតិ។ ទាក់ទងនិងការស្លាប់របស់បាតុករដែលស្លាប់ក្នុងបាតុកម្មការពីឆ្នំា១៩៩៧រហូតមកដល់ពេលនេះថ្ងៃនេះ ពេលនេះលោក កឹម សុខាលើកឡើងថា មិនទាន់វែករកឃាតកឃើញនៅឡើយទេ។លោកបានទម្លាក់កំហុសលើរដ្ឋាភិបាលថា អសមត្ថភាពក្នុងការក្នុងការស្វែងរកឃាតករដែលបានសំលាប់បាតុករទំាងនោះ ។ គណបក្សសង្គ្រោះជាតិមិនព្រមជាដាច់ខាតប្រសិនបើមិនរកឃើញឃាតករសំម្លាប់បាតុករនោះ ។
លោក កឹម សុខាបន្តថាប្រសិនបើប្រទេសមួយមិនមានយុត្តិធម៌ទេ ប្រទេសនោះមិនមានសន្តិភាពទេ គណបក្សកាន់អំណាចសព្វថ្ងៃ មិនទាន់បានដោះស្រាយបញ្ហាមួយរួចផង(រកឃាតកសំលាប់បាតុករថ្ងៃទី៣០ ខែមិនា១៩៩៧)ពេលនេះគណបក្សកាន់អំណាចនេះកំពុងជូបបញ្ហាមួយទៀតគឺរកយុត្តិធម៌ជូនម្ចាស់ឆ្នោត ដែលពេលនេះមិនទាន់ដោះស្រាយនៅឡើយ។ ប្រសិនបើមិនទាន់ដោះស្រាយភាពមិនប្រក្រតីនៃការបោះឆ្នោតមតិជាតិ និងអន្តរជាតិមិនអនុគ្រោះហើយប្រជាពលរដ្ឋមិនសុខចិត្តផងដែរ ។
លោក កឹម សុខានៅតែ ប្រកាស ថាគណបក្សសង្គ្រោះជាតិជាអ្នកឈ្នះឆ្នោតដោយ លើកឡើងថាប្រសិនបើ គណបក្សប្រជនកម្ពុជាជាអ្នកឈ្នះមែននោះហេតុអ្វីមិនព្រមឲ្យបើកកញ្ចប់សុវត្ថិភាពនៅបណ្តាលខេត្តផ្សេងៗទៀតនិងមិនហ៊ានបង្កើតគណៈកម្មការចម្រុះស្វែងរក ការពិតនូវភាពមិនប្រក្រតីនៃថ្ងៃ បោះឆ្នោតនិងរាប់សន្លឹក ឆ្នោតទៅ។ បែរជាហានបើកសម័យប្រជុំសភាលើកដំបូងដែលមានតែគណបក្សតែមួយដែល ខុសនិងរដ្ឋធម្មនុញ្ញបានចែងសភាអាចបើកសម័យប្រជុំលើកដំបូងលុះត្រាតែមានសមាជិក សភាយ៉ាងតិច១២០រូប ។មិនត្រឹមតែបើកសម័យប្រជុំលើកដំបូងនោះទេ ថែមទាំងហ៊ានបោះឆ្នោតជ្រើសរើសក្បាលម៉ាស៊ីនរដ្ឋសភាដែលមានតែ សមាជិករបស់ខ្លួនតែ៦៨នាក់ថែមទៀត។ លោកបញ្ជាក់ថា«ទោះបីគណបក្សប្រជាជន កម្ពុជាធ្វើយ៉ាងណាក្តី គណបក្សសង្គ្រោះជាតិមិនទុកឲ្យនយោបាយជាប់គាំងនោះទេ គឺគណបក្សសង្គ្រោះជាតិនៅតែរកគ្រប់មធ្យោបាយដើម្បីដោះស្រាយបញ្ហាជាតិបញ្ហាប្រជាពលរដ្ឋឲ្យបានសុខដុមរមនា ដូច្នេះគោលនយោបាយជាយុទ្ធសាស្ត្ររបស់យើងគឺយើងត្រូវតែបន្តរកយុត្តិធម៌ជូនម្ចាស់ឆ្នោតក៏ដូចជារកមុខអ្នកនៅពីក្រោយនិងឃាតកដែលបានសម្លាប់បាតុករ នាថ្ងៃទី៣០ មិនា ឆ្នាំ ១៩៩៧ឲ្យខានតែបាន»។
ថ្លែងចំពោះមុខព្រះសង្ឃ សាច់ញាត្តិ ជនរងគ្រោះនិងក្រុមអ្នកគំាទ្រគណបក្សសង្គ្រោះជាតិលោក សម រង្ស៊ីប្រធានគណបក្សសង្គ្រោះជាតិ បានអំពាវនាវជាថ្មីម្ដងទៀតដល់រដ្ឋាភិបាលសព្វថ្ងៃបន្តការស្រាវជ្រាវដើម្បីឈានទៅវែកមុខជនឧក្រិដ្ឋ ដែលនៅពីក្រោយ ការគប់គ្រាប់បែក។គ្រាប់បែកដែលបានសម្លាប់បាតុកអស់ប្រមាណជា ១៦នាក់និង រងរបួសធ្ងន់ស្រាលប្រមាណជា១០០នាក់ក្នុងអំឡុងមហាបាតុកម្មរបស់គណបក្សជាតិខ្មែរដឹកនាំដោយលោកសមរង្ស៊ីកាលពីថ្ងៃទី៣០ខែមីនាឆ្នាំ១៩៩៧ ។
ប្រធានគណបក្សប្រឆាំងដែលបានដឹកនាំក្រុមបាតុករមកធ្វើបាតុកម្មនាកាលនោះបានបន្ថែមថា«ខ្ញុំនៅតែមានអារម្មណ៍ភ័យព្រួយកាលនោះយើងធ្វើបាតុកម្មទាំងបារម្ភហើយមិនមែនធ្វើបានងាយៗដូចពេលនេះទេ» ។
អ្វីដែលយើងស្មានមិនដល់នោះគឺសហរដ្ឋមន្ត្រីក្រសួងមហាផ្ទៃសន្យាថានឹងជួយរក្សាការពារសន្តិសុខឲ្យក្រុមបាតុករ ប៉ុន្តែទីបំផុតយើងត្រូវរងគ្រោះដោយធ្ងន់ធ្ងរដោយមានបាតុករស្លាប់និងរបូសច្រើន តើគាត់សន្យាធ្វើអ្វី?បើមិនជួយការពារ» ។
ជាមួយគ្នានេះប្រមុខគណបក្សប្រឆាំងបានហៅការស្លាប់របស់ក្រុមបាតុករទាំងនោះថាជាការប្ដូរផ្ដាច់ និងពលី ដើម្បីសន្តិភាព សេរីភាព និងសេចក្ដីថ្លៃថ្នូរហើយថា ប្រសិនបើគ្មានអ្នកទាំងនោះទេអ្វីៗនឹងមិនដូចសព្វថ្ងៃនេះ ទេ។លោកបញ្ជាក់ថា« សព្វថ្ងៃសេរីភាពនឹងត្រូវរឹតត្បិតពលរដ្ឋកម្ពុជានិងត្រូវស្ថិតក្នុងទ្រង់ហើយយើងនឹងស្លាប់ ទាំងអស់គ្នា ដោយច្បាប់ស្ថិតនៅលើបបូរមាត់មនុស្សទេ!បើយើងមិនរើបំរាស់គេនឹងប្រើច្បាប់ជិះជាន់យើងមិនខាន ។ ច្បាប់ខ្មែរក្រហមរបស់ ប៉ុល ពត ហាមមិនឲ្យពលរដ្ឋប្រឆាំងនឹងអង្គការតែបើមិនប្រឆាំងយើងនឹងស្លាប់ទាំងអស់គ្នា»។ យ៉ាងណាក៏ដោយប្រធានគណបក្សសង្គ្រោះជាតិសូមឲ្យប្រជាពលរដ្ឋត្រូវតែនាំគ្នាចូលរួមបញ្ឈប់អំពើហិង្សា បញ្ឈប់មិនឲ្យមានឈាមពលរដ្ឋខ្មែរស្លាប់និងបិទទំព័រប្រវត្តិសាស្ត្រអាក្រក់ចាប់យកទំព័រថ្មីសម្រាប់សង្គមប្រជាធិបតេយ្យនៅកម្ពុជា ហើយថារដ្ឋាភិបាលសព្វថ្ងៃក៏ត្រូវតែវែកមុខអ្នកនៅពីក្រោយការសម្លាប់ជន ស្លូតត្រង់ពិសេសអ្នកដែលបញ្ជាឲ្យជនឧក្រិដ្ឋគប់គ្រាប់បែកសម្លាប់បាតុករដែលបក្សប្រឆាំងកំពុងធ្វើពិធីបង្សុ កូលបញ្ចូនកុសលនៅថ្ងៃនេះផងដែរ។ លោក សម រង្ស៊ី បញ្ជាក់បន្ថែមថាគណបក្សសង្គ្រោះជាតិនៅតែប្រកាន់ជំហរក្នុងការរកយុត្តិធម៌ជូនម្ចាស់ឆ្នោតហើយដរាបណាមិនបានរកឃើញនោះទេគណបក្សសង្គ្រោះជាតិមិនបឈ្ឍប់ជាដាច់ខាត ៕ ដោយៈ រតនា