ភ្នំពេញ៖ ក្រុមបណ្ដាញពហុវិស័យប្រមាណជា៥០០នាក់ ដែលមកពី២៤ខេត្ត-រាជធានី បានជួបជុំគ្នា នៅព្រឹកថ្ងៃច័ន្ទ ទី២១ ខែតុលានេះ ដើម្បីធ្វើសមាជប្រជាជនទាមទារឲ្យគណបក្សឈ្នះឆ្នោតទាំងពីរគឺគណបក្សប្រជាជនកម្ពុជានិងគណបក្សសង្គ្រោះជាតិដោះស្រាយតម្រូវការរបស់ពួកគាត់ ។
តាមគម្រោងបណ្តាញពហុវិស័យដែលមានកម្មករកសិករអាជីវកម្មគ្រូបង្រៀនសកម្មជនដីធ្លីជាដើមជាសមាជិកគ្រោងធ្វើសមាជនៅទីលានប្រជាធិបតេយ្យ ប៉ុន្ដែនៅទីលានប្រជាធិបតេយ្យកម្លាំងសមត្ថកិច្ចប្រមាណ១០០០នាក់កំពុងហាត់សមដោយមានរថយន្តពន្លត់អគ្គិភ័យជាច្រើនគ្រឿងនៅទីនោះ ទើបពួកគេសម្រេចចិត្ត ជួបជុំគ្នា នៅលើសួនច្បារស្ពាននាគខាងត្បូងវត្តភ្នំវិញ ដែលស្ថិតក្រោមការឃ្លាំមើលពីកម្លាំងសមត្ថកិច្ចប្រមាណចំនួន១០០នាក់ ។
លោក ជា សុភ័គ មកពីបណ្ដាញកសិករ និងធម្មជាតិ បានឲ្យដឹង ថា សមាជប្រជាន ដែលធ្វើឡើងនៅថ្ងៃទី២១ ខែតុលានេះ មានគោលបំណងបើកឲ្យ មានកិច្ចពិភាក្សារវាងប្រជាពលរដ្ឋ និងថ្នាក់ដឹកនាំនយោបាយ នៅខណៈពេលដែលស្ថានភាព នយោបាយ កំពុងមានការជាប់គាំង និងដើម្បីបង្ហាញទៅគណបក្សនយោបាយ ជាប់ឆ្នោតទាំងពីរ ចង់អំពីតម្រូវការរបស់ប្រជាពលរដ្ឋ ។
លោក ជា សុភ័គ បានបន្ដ ថា”ពួកយើងរៀបចំ សមាជប្រជាជនកម្ពុជា បានដោយជោគជ័យនៅខេត្តចំនួន៣ កាលពីខែមិថុនា ឆ្នាំ២០១៣ ដើម្បីស្នើសុំឲ្យបេក្ខជនតំណាងរាស្រ្ដ មកពីគណបក្សនយោបាយសំខាន់ៗ៣ មកចូលរួម និងស្ដាប់ពួកយើង ដែលជាប្រជាពលរដ្ឋ ហើយពេលនេះ ពួកយើងបានបោះឆ្នោត ជ្រើសរើសតំណាងរាស្រ្ដរួចហើយ ដូច្នេះ ពួកយើងចង់អញ្ជើញពួកគាត់ម្ដងទៀត ។
ចំណែកកញ្ញា គន្ធ សុថារី មកពីក្រុមតន្រ្ដីយុវវ័យនាំសារ បានឲ្យដឹងដែរ ថា ការជួបជុំគ្នា នៅថ្ងៃនេះ នឹងមានការពិភាក្សា អំពីប្រជាធិបតេយ្យ ដែលក្រុមបណ្ដាញពហុវ័ស័យយល់ ថា មានសារៈសំខាន់បំផុត ក្នុងការយល់ដឹង ប្រសិនបើ ចង់អនុវត្ដមាត្រា៥១ នៃរដ្ឋធម្មនុញ្ញ នៃព្រះរាជាណាចក្រកម្ពុជា ។
តាមកញ្ញា គន្ទ សុថារី ប្រធានបទ នឹងយកមកពិភាក្សារួមមាន “ប្រព័ន្ធតុលាការ ឯករាជ្យ ស្ថាប័ននីតិបញ្ញត្ដិ ស្ថាប័នការបោះឆ្នោត និងស្រ្ដីក្នុងវ័ស័យនយោបាយ ហើយតាមរយៈប្រធានបទទាំងនេះ យើងនឹងទទួលបានរការរៀនសូត្រសំខាន់ ពីរដ្ឋធម្មនុញ្ញ និងបទពិសោធន៍ពិតរបស់ប្រជាពលរដ្ឋ” ។
គូរបញ្ជាក់ ថា សាលារាជធានីមិនអនុញ្ញាតឲ្យបណ្តាញពហុវិស័យរៀបចំសមាជទេនេះនោះទេ ដោយសំអាង ថា សមាជប្រជាជនមិនទាន់កំណត់ដោយច្បាប់ស្តីពីការរៀបចំនិងប្រព្រឹត្តទៅនៃសមាជនៅទ្បើយ ហើយបណ្តាញពុហវិស័យមិនទាន់បានចុះបញ្ជីទទួលស្គាល់ផ្លូវការពីស្ថាប័នមានសមត្ថកិច្ចនៅទ្បើយដែរ ។
ម្យ៉ាងទៀត ពេលវេលានៃការរៀបចំនេះមិនស្របទៅនឹងស្ថានភាពជាក់ស្តែងដែលប្រទេសជាតិកំពុងប្រឈមនឹងគ្រោះមហន្តរាយទឹកជំនន់ព្រមទាំងអាចប៉ះពាល់ដល់ជីវភាពរស់នៅប្រចាំថ្ងៃរំខានដល់ការប្រកបអាជីវកម្មព្រមទាំងប៉ះពាល់ដល់សតិអារម្មណ៍ប្រជាពលរដ្ឋក្នុងរាជធានីភ្នំពេញ ៕ ដោយ៖ រតនា