ភ្នំពេញ ៖ គណបក្សហ៊្វុនស៊ិនប៉ិច ប្រកាសទាត់ចោល សម្តីរបស់លោក លឺ ឡាយស្រេង បន្ទាប់ពីបាន ផ្តល់ បទសម្ភាសន៍ ជាមួយប្រព័ន្ធផ្សព្វផ្សាយ មួយចំនួនទាក់ទង នឹងការបោះឆ្នោតជ្រើស តាំងតំណាងរាស្រ្ត នីតិកាល ទី៥ ដោយគណបក្សហ៊្វុនស៊ិនប៉ិច ចាត់ទុកសម្តីរបស់ លោក លឺ ឡាយស្រេង ថាជាមតិផ្ទាល់ខ្លួនសុទ្ធសាធ ពុំមែនជាគោលជំហររបស់បក្សនោះឡើយ។នេះបើយោងតាមសេចក្តី ប្រកាសព័ត៌មានរបស់ គណបក្សហ៊្វុនស៊ិនប៉ិច ដែលយើងទទួលបាននៅថ្ងៃទី១៤ ខែកញ្ញា ឆ្នាំ២០១៣នេះ។សេចក្តីប្រកាសបន្តថា គណបក្សហ៊្វុនស៊ិនប៉ិច សូមធ្វើការបញ្ជាក់ និងបំភ្លឺជូន សាធារណជន សារព័ត៌មានជាតិ និងអន្តរជាតិ ឲ្យបានជ្រាបថា កន្លងទៅថ្មីនេះ លោក លឺ ឡាយស្រេង ប្រធានក្រុមប្រឹក្សាជាតិ គណបក្ស ហ៊្វុនស៊ិនប៉ិច តែងបានផ្តល់កិច្ចសម្ភាសន៍ និងជម្រាបអ្នកសារព័ត៌មានជាតិ និងអន្តរជាតិ អំពីកិច្ចការពាក់ព័ន្ធ នឹងការបោះឆ្នោត ជ្រើសតាំងតំណាងរាស្រ្ត អាណត្តិទី៥។
ប្រសាសន៍ និងការបញ្ចេញមតិ ទាំងឡាយរបស់ លោក លឺ ឡាយស្រេង ជាមតិផ្ទាល់ខ្លួនសុទ្ធសាធ ពុំមែនជាគោលជំហរ របស់គណបក្ស ហ៊្វុនស៊ិនប៉ិចឡើយ។សេចក្តីប្រកាសបញ្ជាក់ថា អាស្រ័យហេតុនេះ គណបក្សហ៊្វុនស៊ិនប៉ិច សូមធ្វើការបំភ្លឺថា រាល់សម្តីរបស់លោក លឺ ឡាយស្រេង គឺជាទស្សនៈ និងមតិផ្ទាល់ខ្លួន របស់បុគ្គលប៉ុណ្ណោះ មិនមែនជាគោលជំហររបស់ គណបក្ស ហ៊្វុនស៊ិនប៉ិចនោះទេ៕ដោយ ៖ ស.ស្អាត