ខេត្តកំពត ៖ សិស្សសាលា ៧នាក់ ក្នុងខេត្តកំពត បានរងការដួលសន្លប់នៅថ្ងៃចូលរៀនដំបូងក្រោយពិធីបុណ្យភ្ជុំបានបញ្ចប់។ សេចក្ដីរាយការណ៍ពីខេត្តកំពតបានឲ្យដឹងថា នៅ ពេលកំពុងគោរពទង់ជាតិ នៅវេលាម៉ោង៧និង៣០នាទីព្រឹកថ្ងៃ ៧ ខែតុលា ឆ្នាំ២០១៣នេះ មានសិស្សសាលាអនុវិទ្យាល័យឧត្តមមានជ័យចំនួន៧នាក់ បានដូលសន្លប់នៅក្នុងបរិវេណសាលា ស្ថិតនៅភូមិអង្គរជ័យ ឃុំដំណាក់កន្ទូតខាងត្បូង ស្រុកកំពង់ត្រាច ខេត្តកំពត។
សិស្សដែលដួលសន្លប់នោះ ភាគច្រើនជាសិស្សស្រី ។ មិនអាចទាក់ទងជាមួយអ្នកគ្រប់គ្រងនៅសាលាអនុវិទ្យាល័យនោះអំពីមូលហេតុនៃការដួលសន្លប់នោះទេ ។ ប៉ុន្តែគ្រូ និងសិស្សមួយចំនួនបាននិយាយថា អាចមកពីសិស្សខ្លះមិនបានទទួលទានអាហារពេលព្រឹក ពេលឈរនៅកន្លែងប្រជុំដងទង់ជាតិយូរ ក៍មានអាការៈវិលមុខ ខ្យល់គរ។ យ៉ាងណាក៍ដោយសិស្សទាំង៧នាក់ត្រូវបានគេជួយសង្គ្រោះ ដោយអោយទទួលទានទឹកផ្លែឈើមានជាតិផ្អែម និងឲ្យសំរាកដើម្បីទាក់ទងអាណាព្យាបាលមកទទួលយកទៅផ្ទះវិញរួចហើយដែរ៕ ដោយ៖ អភិរក្ស