ភ្នំពេញ ៖ យ៉ាងហោចណាស់មានរោងចក្រ សិប្បកម្មធុនតូចនិងមធ្យមប្រមាណជាង ៣០បានទទួលការគាំទ្រហិរញ្ញប្បទានពីធនាគារអភិវឌ្ឍន៍អាស៊ីហៅកាត់ថា ADB ។ ហើយការគាំទ្រផ្នែកមូលនិធិនេះក្រសួងឧស្សាហកម្មរ៉ែនិងថាមពល នៅព្រឹកថ្ងៃទី០៥ខែកញ្ញាឆ្នាំ២០១៣នេះបានប្រកាសលទ្ធផលនិងការផ្សព្វផ្សាយពីរបៀបបំពេញពាក្យស្នើសុំការគាំទ្រពីមូលនិធិអភិវឌ្ឍន៍បច្ចេកវិទ្យា(TDF)ជុំទី៣របស់ខ្លួននៅទីស្តីការក្រសួង ។
ពិធីនេះមានវត្តមានលោក ម៉េង សក្តិធារ៉ា អគ្គនាយកនៃអគ្គនាយកដ្ឋានឧស្សាហកម្មជាតំណាងលោករដ្ឋមន្ត្រី ស៊ុយ សែម និងមានការចូលរួមពីបណ្តាដៃគូរអភិវឌ្ឍន៍ដូចជាតំណាងទីភ្នាក់ងារសហប្រតិបត្តិការអន្តរជាតិជប៉ុន JICA តំណាងធនាគារអភិវឌ្ឍន៍អាស៊ី ADB សម្ព័ន្ធសមាគមសហគ្រាសធុនតូច និងមធ្យមរាជធានីភ្នំពេញ សមាគមសហគ្រិនវ័យក្មេងកម្ពុជា សមាគមសហគ្រិននារី ក្រុមការងារគម្រោងមូលនិធិអភិវឌ្ឍន៍បច្ចេកវិទ្យា ព្រមទាំងមន្រ្តីស្ថាប័នពាក់ព័ន្ធ និងម្ចាស់រោងចក្រសិប្បកម្មប្រមាណ៧០នាក់។
.JPG)
ជាមួយគ្នានេះ មន្ត្រីក្រុមការងារគម្រោង លោក ស៊ុយ ឌីម៉ង់ បានឲ្យដឹងថា គម្រោងមូលនិធិអភិវឌ្ឍន៍បច្ចេកវិទ្យាជាគម្រោងសាកល្បងមួយ ដែលធ្វើឡើងរួមគ្នារវាងធនាគារអភិវឌ្ឍន៍អាស៊ី ADB និង ក្រសួងឧស្សាហកម្ម រ៉ែ និងថាមពល ដែលទទួលបានហិរញ្ញប្បទានឥតសំណងពីធនាគារអភិវឌ្ឍន៍អាស៊ី ADB ក្នុងគោលបំណងបង្កើតភាពប្រកួតប្រជែងរបស់សហគ្រាសធុនតូច និងមធ្យមកម្ពុជាដែលស្ថិតនៅក្នុងវិស័យឧស្សាហកម្មផ្នែកម្ហូបអាហារ ឲ្យពួកគេមានភាពប្រកួតប្រជែងកាន់តែប្រសើរឡើងនៅក្នុងប្រទេស និងតំបន់ តាមរយៈអភិវឌ្ឍន៍បច្ចេកវិទ្យា និងការផ្លាស់ប្តូរការគ្រប់គ្រងផ្សេងៗក៏ដូចជានិរន្តភាពគុណភាព។
លោក ស៊ុយ ឌីម៉ង់ បន្ថែមថា គម្រោងនេះបានជួយដល់រោងចក្រ សិប្បកម្មណា ដែលមានលក្ខណៈគ្រប់គ្រាន់តាមការវាយតម្លៃរបស់ក្រុមគ្រប់គ្រងគម្រោងមូលនិធិ ដោយទឹកប្រាក់ផ្តល់ជូន៥០%នៃទឹកប្រាក់សរុបដែលបានលើកឡើងនៅក្នុងគម្រោងរបស់ម្ចាស់រោងចក្រ សិប្បកម្មហើយមានកម្រិតក្នុងចន្លោះចាប់ពី៥ពាន់ដល់ ៣ម៉ឺនដុល្លារអាមេរិក។
លោកបញ្ជាក់ថា ចំពោះលក្ខ័ណ្ឌដែលម្ចាស់រោងចក្រ សិប្បកម្មត្រូវបំពេញគឺមានចុះបញ្ជីត្រឹមត្រូវ មានកម្មករបំរើការតិចជាង១០០នាក់ មានទ្រព្យសកម្មតិចជាង៥០ម៉ឺនដុល្លារអាមេរិក មានបទពិសោធន៍ប្រកបអាជីវកម្មតាមលក្ខណ្ឌដែលបានកំណត់ដោយស្ថាប័នជំនាញផ្តោតលើការកែលម្អស្តង់ដាអនាម័យ ដើម្បីទទួលបានស្តង់ដារជាតិ ឬអន្តរជាតិលើសុវត្ថិភាពចំណីអាហារឬយ៉ាងហោចណាស់ឲ្យមានភាពអនុលោមតាមក្បួនអនុវត្តន៍ផលិតកម្ម និងអនាម័យល្អ ។ ម៉្យាងទៀតផ្តោតលើការបង្កើនផលិតភាព កាត់បន្ថយការចំណាយថ្លៃដើមផលិតកម្មនិបង្កើនប្រាក់ចំណេញ។ហើយគម្រោងនេះមិនធ្វើការគាំទ្រដល់សិប្បកម្ម ដែលផលិតនូវ គ្រឿងស្រវឹងនិងថ្នាំជក់នោះទេ។
ថ្លែងទៅកាន់ក្រុមធុរកិច្ច លោក ម៉េង សក្តិធារ៉ា បានណែនាំដល់ម្ចាស់រោងចក្រ និងសិប្បកម្មទាំងអស់ដែលស្ថិតនៅក្នុងវិស័យកសិឧស្សាហកម្មកែច្នៃម្ហូបអាហារ ឲ្យមកបំពេញពាក្យស្នើស្នើសុំការគាំទ្រពីគម្រោងមូលនិធិអភិវឌ្ឍន៍បច្ចេកវិទ្យានេះឲ្យអស់លទ្ធភាព ដើម្បីចូលរួមទាំងអស់គ្នាក្នុងការពង្រឹងគុណភាព សុវត្ថិភាពផលិតផលក្នុងស្រុក និងបង្កើនសមត្ថភាពផលិតតាមរយៈការអភិវឌ្ឍន៍បច្ចេកវិទ្យា និងឈានទៅប្រកួតប្រជែងថ្នាក់តំបន់នាឆ្នាំ២០១៥ខាងមុខ។ ដោយឡែកចំពោះសហគ្រាសដែលមិនបានជ្រើសរើសសូមយកការការចូលរួមនេះសម្រាប់ជាបទពិសោធន៍ដើម្បីធ្វើឲ្យប្រសើរឡើងនូវសង្វាក់ផលិតកម្មរបស់ខ្លួននៅថ្ងៃអនាគត។
សូមបញ្ជាក់ថា កន្លងមកគម្រោងនេះបានផ្តល់ការគាំទ្រជាថវិកាបដិភាគដល់ម្ចាស់រោងចក្រនិងសិប្បកម្មចំនួន១០មូលដ្ឋាននៅជុំទី១ដែលមានទឹកប្រាក់ប្រមាណ ២៧៤.៣៤២ដុល្លារអាមេរិកនិង១០មូលដ្ឋានទៀតនៅជុំទី២ដែលមានទឹកប្រាក់ប្រមាណ ២៨៣.៣៥០ដុល្លារហើយសម្រាប់ជុំទី៣ថ្ងៃនេះមានរោងចក្រ និងសិប្បកម្មចំនួន៧មូលដ្ឋានបានបំពេញគម្រោងដាក់មកគម្រោងមូលនិធិនិងបានជ្រើសរើសបន្ត។ បច្ចុប្បន្ននៅកម្ពុជាមានមូលដ្ឋានសហគ្រាសខ្នាតតូច និងមធ្យមសរុបប្រមាណជាង ៥សែន៦ម៉ឺនសហគ្រាសកំពុងដំណើរការ៕
ដោយ ៖ សស្អាត